1 USamuyeli 27 - iBhayibhili Elingcwele 1978

UDavida uhlala phakathi kwamaFilistiya

¹ UDavida wathi enhliziyweni yakhe: Ngizaze ngife ngolunye usuku ngibulawa nguSawuli. Okungcono kimi yikuba ngibalekele elizweni lamaFilistiya; uSawuli uzangiyekela angabe esangidinga kulo lonke ilizwe lakoIsrayeli, ngiphephe esandleni sakhe.

² Wasesuka uDavida ehamba kanye labantu abangamakhulu ayisithupha, waya kuAkishi indodana kaMahoki, inkosi yaseGathi.

³ UDavida wahlala loAkishi eGathi, yena labantu bakhe kanye lemizi yabo; uDavida wayelabomkakhe bobabili, uAhinowama waseJezereli loAbigayili waseKarmeli umkaNabali.

⁴ Kwathi kubikwa kuSawuli ukuthi uDavida ubalekele eGathi, kabe esamdinga futhi.

⁵ UDavida wathi kuAkishi: Uba ngifumene umusa kuwe, angiphiwe indawo komunye umuzi emaphandleni ukuba ngihlale khona; ngoba inceku yakho izahlalelani lawe emzini wenkosi na?

⁶ UAkishi wasemnika iZiklagi ngalolosuku. Yikho iZiklagi ingeyamakhosi akoJuda kuze kube lamuhla.

⁷ UDavida wahlala elizweni lamaFilistiya umnyaka lenyanga ezine.

⁸ UDavida labantu bakhe babephuma bayehlasela amaGeshuri lamaGirizi, lamaAmaleki, ngoba wonke lawo ayakhe kulelolizwe kusukela eTelamu, ekuyeni ngaseShuri, kuze kube selizweni laseGibithe.

⁹ UDavida walichitha ilizwe, kazatshiya muntu ophilayo, owesilisa lowesifazana, wathumba izimvu, lenkomo, labobabhemi, lamakamela, lezigqoko, wabuyela kuAkishi.

¹⁰ Kwakuthi lapho uAkishi ebuza esithi: Belihlasela ngaphi lamuhla na? UDavida wayesithi: BesiseNegebi yakoJuda: kumbe athi: BesiseNegebi yaseJerameli; loba athi: BesiseNegebi yamaKeni.

¹¹ UDavida kabuyanga lomuntu ophilayo eGathi, owesilisa lowesifazana, ngoba wesaba ukuthi bazamhlakaza yena labantu bakhe ngalokho ababekwenza. Wawunjalo umkhubo wakhe sonke isikhathi ehlala elizweni lamaFilistiya.

¹² UAkishi wamthemba uDavida wathi: Uzenze wazondeka ebantwini bakibo koIsrayeli. Ngakhoke uzakuba yinceku yami kuze kube nininini.