1 USamuyeli 25 - iBhayibhili Elingcwele 1978

UDavida loAbigayili

¹ USamuweli wafa; bahlangana bonke abakoIsrayeli ukumlilela, bamngcwabela emzini wakhe eRama. UDavida wasuka waya enkangala yaseParani.

² Kwakukhona indoda eKarmeli eliseMahoni eyayilemfuyo enengi. Yayinothile kakhulu; yayilezimvu eziyizinkulungwane ezintathu lembuzi eziyizinkulungwane. Yayigunda izimvu zayo eKarmeli.

³ Ibizo laleyondoda lalinguNabali, lebizo lomkayo linguAbigayili. Owesifazana wayehlakaniphile, emuhle, kodwa indoda yakhe yayilukhuni elezenzo ezimbi; yayingeyakoKalebi.

⁴ UDavida wezwa esenkangala ukuba uNabali ugunda izimvu zakhe.

⁵ UDavida wasethuma insizwa ezilitshumi, wathi kuzo: Hambani eKarmeli, liye kuNabali, limbingelele ebizweni lami,

⁶ lithi: Ukuthula kakube kuwe, lasendlini yakho, lakukho konke olakho.

⁷ Ngizwile kuthiwa uyagunda izimvu zakho. Abelusi bakho bebelathi; kasibalimazanga, futhi kabalahlekelwanga lutho zonke insuku beseKarmeli.

⁸ Buza insizwa zakho, zizakukutshela. Yamukela ngomusa insizwa zami, ngoba sifike ngosuku lomkhosi. Akunike inceku zakho lendodana yakho uDavida lokho olakho.

⁹ Sezifikile insizwa zikaDavida, zakhuluma kuNabali konke lokho ebizweni likaDavida; zasezilinda.

¹⁰ UNabali waziphendula inceku zikaDavida, wathi: Ngubani uDavida na? Ngubani lindodana kaJese na? Lamuhla zinengi inceku ezibalekayo emakhosini azo.

¹¹ Ngithathe ukudla kwami, lamanzi ami, lenyama engiyihlabele abagundi bami, ngikuphe abantu engingabazi ukuthi bavela ngaphi na?

¹² Zaseziphenduka inceku zikaDavida, zabuyela kuye, zambikela konke.

¹³ UDavida wasesithi ebantwini bakhe: Wonke umuntu kahlome ngomkhonto wakhe! UDavida laye wahloma ngomkhonto wakhe; bamlandela uDavida abantu abangamakhulu amane, kodwa abangamakhulu amabili basala empahleni.

¹⁴ Enye insizwa yamtshela uAbigayili umkaNabali yathi: UDavida wathuma izithunywa zivela enkangala ukubingelela inkosi yethu, kodwa yazithethisa.

¹⁵ Kanti labobantu basiphatha kuhle kakhulu, kasilimalanga, kasilahlekelwanga lutho lapho sasilabo emmangweni.

¹⁶ Babengumduli osivikelayo ebusuku lemini, sonke isikhathi silabo saluse izimvu.

¹⁷ Cabanga kuhle ngokufanele ukwenze; ngoba inkosi yethu kanye lendlu yayo yonke izachitheka impela; lokhu ingumuntu omubi kangaka, umuntu okungeke kukhulunywe laye.

¹⁸ UAbigayili wasephangisa ethatha izinkwa ezingamakhulu amabili, lembodlela ezimbili zewayini, lezimvu ezinhlanu ezihlatshiweyo, lamagokoko amane omumbu okhanzingiweyo, lamahlukuzo alikhulu ezithelo zevini ezomisiweyo, lezinkwa ezingamakhulu amabili zomkhiwa, wakuthwalisa obabhemi.

¹⁹ Wathi ezinsizweni: Hambani phambili; ngiyalilandela. Kodwa kamtshelanga umkakhe uNabali.

²⁰ Kwathi esagade ubabhemi esehlela endaweni esithekileyo yentaba, kwathutshela kuye uDavida labantu bakhe; wahlangana labo.

²¹ UDavida wayethe: Impela ngachitha isikhathi ngokugcina impahla yalumuntu enkangala, kakwaze kwalahleka lutho. Usengibuyisele okuhle ngokubi.

²² UNkulunkulu enze njalo kimi ngokwengezelelweyo, uba kusasa ngitshiya loyedwa owesilisa kwabangabakhe.

²³ Lapho uAbigayili ebona uDavida, waphangisa ukwehla kubabhemi wakhe, wathi mbo ngobuso phansi phambi kukaDavida.

²⁴ Wawela ngasenyaweni zakhe wathi: Lobobubi kabube phezu kwami ngedwa, nkosi yami; akuvumele incekukazi yakho ikhulume lawe, uzwe amazwi encekukazi yakho.

²⁵ Inkosi yami kayingamnanzi lowomuntu omubi uNabali; ngoba unjengebizo lakhe yena; ibizo lakhe litsho ukuthi: Isithutha; impela ubuthutha bukuye. Kodwa mina, ncekukazi yakho, kangizibonanga insizwa zenkosi yami eyayizithumile.

²⁶ Ngakhoke, nkosi yami, ngifunga inkosi, ngifunge lawe, njengoba iNkosi uNkulunkulu ikuthintile ukungena ecaleni lokuchitha igazi, lokuphindisela ngesandla sakho, ngalokhoke kazibe njengoNabali izitha zakho lalabo abafuna ukuyenza okubi inkosi yami.

²⁷ Lesisipho esilethwa yincekukazi yakho enkosini yami kasinikwe insizwa ezilandela inkosi yami.

²⁸ Akuthethelele icala lencekukazi yakho; ngoba iNkosi uNkulunkulu izamisa inzalo yakho kokuphela, lokhu ulwa izimpi zeNkosi. Kawuyikwehlelwa yibubi zonke insuku zokuphila kwakho.

²⁹ Loba kusuka umuntu exotshana lawe efuna ukuphila kwakho, iNkosi uNkulunkulu wakho izagoqela ukuphila kwakho, ikugcine; kodwa ukuphila kwezitha zakho izakukujikijela kungathi kuphoswa amatshe ngesavutha.

³⁰ Lapho iNkosi uNkulunkulu isikwenzile enkosini yami konke okuhle ekukhulume ngawe, isikubekile waba ngumbusi koIsrayeli,

³¹ kakungabi khona lokho okubanga usizi lokuhlupha isazela senkosi yami, ngokuthi ichithe igazi ngeze, lokuthi iphindisele. Lapho iNkosi uNkulunkulu isiyenzele okuhle inkosi yami, khumbula incekukazi yakho.

³² UDavida wasesithi kuAbigayili: Kayibusiswe iNkosi, uNkulunkulu kaIsrayeli, ekuthumileyo lamuhla ukungihlangabeza.

³³ Futhi akubusiswe ukuhlakanipha kwakho, ubusiswe lawe ongithintileyo lamuhla ukuba ngingangeni ecaleni lokuchitha igazi lokuphindisela ngesandla sami.

³⁴ Ngoba ngifunga iNkosi, uNkulunkulu kaIsrayeli, engithintileyo ukuba ngingakulimazi, uba ungahlanga wangihlangabeza, bekungayikusala kuNabali kusasa loyedwa owesilisa.

³⁵ UDavida wasesamukela kuye lokho amlethele khona. Wathi kuye: Hamba kuhle endlini yakho; ngililalele ilizwi lakho, ngasivuma lesicelo sakho.

³⁶ UAbigayili wabuyela kuNabali, wamfica eledili endlini yakhe, idili elinjengelenkosi. UNabali wayethokoza ngoba wayenathe kakhulu; ngakho uAbigayili kamtshelanga lutho kwaze kwasa.

³⁷ Kwathi ekuseni lapho iwayini seliphelile kuye, umkakhe wasemtshela lezizinto, uNabali waqaleka, walala waba njengelitshe.

³⁸ Kwathi emva kwensuku ezilitshumi iNkosi yamtshaya uNabali, wafa.

³⁹ UDavida esezwile ukuthi uNabali kasekho wathi: Kayibongwe iNkosi ephindisele ukuthukwa kwami nguNabali, yathinta inceku yayo ekwenzeni okubi, yabuyisela ububi bukaNabali kwelakhe ikhanda. UDavida wasethumela ilizwi, wakhuluma loAbigayili ukuba amthathe abe ngumkakhe.

⁴⁰ Lapho inceku zikaDavida zifika kuAbigayili eKarmeli, zathi kuye: UDavida usithumile kuwe ukuba sikuthathe sikuse kuye ube ngumkakhe.

⁴¹ Yena wathi mbo ngobuso bakhe phansi, wathi: Incekukazi yakho kayibe yisigqili sokugezisa inyawo zezinceku zenkosi yami.

⁴² UAbigayili wasephangisa esuka, wagada ubabhemi; wahamba kanye lentombi ezinhlanu ezazimphelekezela, walandela inceku zikaDavida, waba ngumkakhe.

⁴³ UDavida wathatha loAhinowama waseJezereli, bobabili baba ngomkakhe.

⁴⁴ USawuli wayesenike uPaliti indodana kaLayishi waseGalimi umkaDavida, uMikhali indodakazi yakhe.