1 USamuyeli 24 - iBhayibhili Elingcwele 1978

UDavida uyekela uSawuli ukuba aphile

¹ Kwathi uSawuli esebuyile ekuxotsheni amaFilistiya, wabikelwa kwathiwa: UDavida usenkangala yaseEngedi.

² USawuli wasethatha abantu abayizinkulungwane ezintathu abakhethiweyo kuye wonke uIsrayeli, wayadinga uDavida labantu bakhe ngasempumalanga kwamaDwala amagogo.

³ Wafika ezibayeni zezimvu ezazisendleleni. Kwakukhona lapho ubhalu; uSawuli wangena kulo ukuba aye ngaphandle. UDavida labantu bakhe babehlezi ngaphakathi kobhalu.

⁴ Abantu bakaDavida bathi kuye: Lufikile usuku iNkosi eyatsho ngalo kuwe isithi: Ngizanikela isitha sakho esandleni sakho, uzakwenza kuso lokho okubona kufanele. UDavida wasenyenya, wasika ensitha umphetho wengubo kaSawuli.

⁵ Ngemva kwalokho uDavida wazisola ngoba wayesike umphetho wengubo kaSawuli.

⁶ Wathi ebantwini bakhe: INkosi uNkulunkulu kayingivimbele ukuba ngingenzi okubi enkosini yami, ogcotshiweyo weNkosi uNkulunkulu.

⁷ UDavida wabehlula ngalawomazwi abantu bakhe, kabavumelanga ukuba bamhlasele uSawuli. USawuli waphuma obhalwini, wahamba.

⁸ Ngemva kwalokho uDavida laye wasuka waphuma obhalwini; wammemeza uSawuli wathi: Nkosi yami! Lapho uSawuli enyemukula, uDavida wathi mbo ngobuso phansi, wakhuleka.

⁹ UDavida wasesithi kuSawuli: Ulalelelani amazwi abantu abathi: UDavida ufuna ukukulimaza?

¹⁰ Lamuhla uzibonele ukuthi iNkosi ibikunikele esandleni sami obhalwini; abanye bebesithi kangikubulale, kodwa mina ngakuhawukela. Ngathi: Kangiyikuphakamisela isandla sami kuyo inkosi yami, ngoba ingogcotshiweyo weNkosi.

¹¹ Khangela, baba, nanku umphetho wengubo yakho usesandleni sami; ngiwusikile, kodwa kangikubulalanga. Ngalokhoke zibonele ukuba kakukho ububi lesiphambeko kimi. Kangikonanga ngalutho, loba wena ungizingela ukuba ungibulale.

¹² INkosi uNkulunkulu kayahlulele phakathi kwethu; kodwa lanxa ingaphindisela kuwe ngenxa yami, kangiyikuphakamisela isandla sami phezu kwakho.

¹³ Njengesaga sasendulo esithi: Kwababi kuvela okubi; kodwa mina kangiyikuphakamisela isandla sami phezu kwakho.

¹⁴ Inkosi yakoIsrayeli ilandelana lobani na? Uxotshana lobani na? Uxotshana lenja efileyo, indwebundwebu nje.

¹⁵ INkosi uNkulunkulu kayibe ngumahluleli, yahlulele phakathi kwethu, ihlole icala lami, ingikhulumele, ingikhulule esandleni sakho.

¹⁶ Kwathi uDavida eseqedile ukukhuluma lawomazwi kuSawuli, uSawuli wathi: Yilizwi lakho lelo, mntanami, Davida na? USawuli wadazuluka, wakhala.

¹⁷ Wasesithi kuDavida: Ulungile kulami, ngoba wena ungiphindisele ngokuhle, kodwa mina ngikuphindisele ngokubi.

¹⁸ Utshengisile lamuhla ukuthi ungenzela okuhle, ngoba kawungibulalanga lapho iNkosi ibinginikele ezandleni zakho.

¹⁹ Nxa umuntu efica isitha sakhe, uyasiyekela sihambe na? Ngalokhoke iNkosi ikunike umvuzo omuhle ngokwenzileyo kimi lamuhla.

²⁰ Manjeke ngiyazi ukuba uzakuba yinkosi impela, lokuba umbuso wakoIsrayeli uzaqiniswa esandleni sakho.

²¹ Ngakhoke funga kimi ngeNkosi ukuba kawuyikuyiqeda inzalo yami emva kwami, lokuba kawuyikulicima ibizo lami endlini kababa.

²² UDavida wasefunga kuSawuli. USawuli wabuyela ekhaya; kodwa uDavida labantu bakhe baya enqabeni.