1 USamuyeli 19 - iBhayibhili Elingcwele 1978

USawuli ufuna ukumbulala uDavida

¹ USawuli watshela uJonathani lazo zonke inceku zakhe ukuthi uDavida uzabulawa. Kodwa uJonathani indodana kaSawuli wayemthanda kakhulu uDavida.

² UJonathani wamtshela uDavida wathi: USawuli ubaba ufuna ukukubulala; ngakhoke uxwaye kusasa, uhlale ekusithekeni, ucatshe.

³ Mina ngizaphuma ngiye kubaba emmangweni lapha ukhona, ngikhulume laye ngawe; aluba ngibona okuthile ngizakukutshela.

⁴ UJonathani wakhuluma okuhle ngoDavida kuSawuli uyise, wathi kuye: Inkosi kayingayoni inceku yayo uDavida, ngoba wena kakonanga, lezenzo zakhe kuwe zilungile.

⁵ Wazifaka engozini ngokubulala umFilistiya; leNkosi uNkulunkulu yamnika wonke uIsrayeli ukunqoba okukhulu. Lawe wakubona lokhu, wathokoza; uzamonelani umuntu ongelacala ngokubulala uDavida engonanga lutho na?

⁶ USawuli walilalela ilizwi likaJonathani, wafunga wathi: Ngifunga iNkosi, kayikubulawa.

⁷ UJonathani wasembiza uDavida, wamtshela konke lokho. UJonathani wasemusa uDavida kuSawuli, wahlala laye njengakuqala.

⁸ Kwabuya kwaba khona impi futhi; uDavida waphuma wayakulwa lamaFilistiya, wawabulala kakhulu aze ambalekela.

⁹ Umoya omubi ovela eNkosini wamehlela uSawuli ehlezi endlini yakhe ephethe umkhonto; uDavida wayetshaya ichacho.

¹⁰ USawuli wazama ukumbandakanya lomduli ngomkhonto; kodwa wawuvika, umkhonto wahlaba umduli. UDavida waphunyuka, wabaleka.

¹¹ Ngalobobusuku uSawuli wathuma izithunywa endlini kaDavida ukuba zimqaphele, ukuze ambulale ekuseni. Kodwa uMikhali umkaDavida wamxwayisa wathi: Uba ungabaleki ngalobubusuku, uzabulawa kusasa.

¹² Ngakho uMikhali wasemehlisa uDavida ngewindi, wabaleka.

¹³ UMikhali wasethatha isithombe, wasilalisa embhedeni, wabeka umqamelo woboya bembuzi ngekhanda laso, wasembesa ngezingubo.

¹⁴ Lapho uSawuli esethuma izithunywa ukubamba uDavida, wathi: Uyagula.

¹⁵ USawuli wasezibuyisela izithunywa ukumbona uDavida esithi: Limlethe lapha kimi ngombheda ukuze ngimbulale.

¹⁶ Lapho izithunywa zingena, kwakulesithombe embhedeni, lomqamelo woboya bembuzi ungekhanda laso.

¹⁷ USawuli wasesithi kuMikhali: Ungikhohliseleni ngokunje, wavumela isitha sami sabaleka sahamba na? UMikhali waphendula uSawuli wathi: UDavida wathi kimi: Ngiyekela ngihambe, funa ngikubulale.

¹⁸ UDavida waphunyuka, wabaleka, waya kuSamuweli eRama; wamtshela konke uSawuli ayekwenze kuye. Yena loSamuweli basuka bayahlala eNayothi.

¹⁹ USawuli wabikelwa kwathiwa uDavida useNayothi eRama.

²⁰ USawuli wasethuma izithunywa ukumbamba uDavida, lapho zibona ixuku labaprofethi beprofetha, loSamuweli emi engumkhokheli wabo, umoya kaNkulunkulu wazehlela izithunywa zikaSawuli, lazo zaprofetha.

²¹ Lapho ebikelwa uSawuli, wathuma ezinye izithunywa, lazo zaprofetha. USawuli wasephinda ethuma ezinye futhi ngokwesithathu, lazo zaprofetha.

²² Wasesiya yena uqobo eRama, wafika emthonjeni omkhulu oseSeku; wabuza wathi: Bangaphi oSamuweli loDavida na? Kwathiwa: BaseNayothi eRama.

²³ Wasesuka lapho waya eNayothi eRama; umoya kaNkulunkulu wehlela laphezu kwakhe; wahamba eprofetha waze wafika eNayothi eRama.

²⁴ Laye wakhumula izigqoko zakhe, waprofetha phambi kukaSamuweli, walala phansi enqunu lonke lolosuku labo bonke lobobusuku. Yikho abantu besithi: USawuli laye uphakathi kwabaprofethi na?