1 USamuyeli 17 - iBhayibhili Elingcwele 1978

UDavida ubulala uGoliyathi

¹ AmaFilistiya abutha izimpi zawo ukuba aphume impi; abuthana eSoko elakoJuda, amisa phakathi kweSoko leAzeka, eEfesi‐Damimi.

² USawuli labantu bakoIsrayeli labo babuthana, bamisa esigodini saseEla, bawahlela amabutho ukuba balwe lamaFilistiya.

³ AmaFilistiya ema entabeni ngakwelinye icele, loIsrayeli wema entabeni ngakwelinye, kukhona isigodi phakathi kwabo.

⁴ Kwaphuma ezihonqweni zamaFilistiya iqhawe elithiwa nguGoliyathi waseGathi, ubude bakhe babusedlula ingalo ezine lengxenye.

⁵ Wayethwele ingowane yethusi ekhanda, egqoke ibhatshi lensimbi; ubunzima bebhatshi bungamashekeli ethusi ayizinkulungwane ezinhlanu.

⁶ Wayefake imigwamazi yethusi emibaleni yakhe, egaxe umdikadika wethusi emahlombe.

⁷ Ubuqatha boluthi lomkhonto wakhe babulingana logodo lomaluki, ubunzima besihloko sawo bulingana lamashekeli ensimbi angamakhulu ayisithupha; ophatha isihlangu sakhe wayehamba phambi kwakhe.

⁸ Wema, wamemeza ezinhlwini zakoIsrayeli wathi: Liphumelani ukuzakulwa na? Mina kangisuye umFilistiya yini? Lina kalisizo izinceku zikaSawuli na? Zikhetheleni umuntu ukuba azeqondana lami.

⁹ Uba engalwa lami angibulale, sizakuba yizigqili zenu; kodwa uba ngimahlula ngimbulale, lizakuba yizigqili zethu, lisisebenzele.

¹⁰ UmFilistiya wathi: Ngiyazeyisa lamuhla izimpi zakoIsrayeli; nginikani umuntu ukuba silwe.

¹¹ Kwathi lapho uSawuli loIsrayeli wonke besizwa lamazwi, batshaywa luvalo, besaba kakhulu.

¹² UDavida wayeyindodana yomEfrathi waseBetlehema koJuda, othiwa nguJese; wayelamadodana aficaminwembili. Ngesikhathi sikaSawuli lowomuntu wayeseluphele eseleminyaka eminengi.

¹³ Amadodana amathathu kaJese amadala ayemlandele uSawuli empini. Amabizo alawomadodana akhe amathathu ayeyile empini ayenguEliyabi owayelizibulo, loAbinadaba omelamayo, lowesithathu enguShama.

¹⁴ UDavida nguye owayengomncinyane. Amathathu amadala alandela uSawuli,

¹⁵ kodwa uDavida wayesiya kuSawuli, abuyele ukuyakwalusa izimvu zikayise eBetlehema.

¹⁶ UmFilistiya wayelokhu esiza, eme, ekuseni lantambama okwensuku ezingamatshumi amane.

¹⁷ UJese wasesithi kuDavida indodana yakhe: Ake uthathele abafowenu ihefa lomumbu okhanzingiweyo, lezinkwa ezilitshumi, uzise masinyane kubafowenu ezihonqweni.

¹⁸ Lezizinkwa zetshizi ezilitshumi uzaziphathela induna yabo; ubone ukuthi abafowenu basaphila kuhle yini, ubuye lesibonakaliso esivela kibo.

¹⁹ USawuli kanye labo, labo bonke abantu abakoIsrayeli babesesigodini saseEla besilwa lamaFilistiya.

²⁰ UDavida wavuka ekuseni kakhulu, wathatha impahla, watshiya izimvu kumlindi, wahamba njengokutshelwa kwakhe nguJese. Wafika ezihonqweni nxa impi iphumayo ukuyakulwa, yayimemeza isiga sempi.

²¹ UIsrayeli lamaFilistiya bawahlela amabutho akhangelana.

²² UDavida watshiya impahla kumlindi wempahla, wagijimela emabuthweni ukubingelela abafowabo.

²³ Kwathi esakhuluma labo, iqhawe lamaFilistiya, uGoliyathi, laphuma emabuthweni amaFilistiya, lakhuluma wona lawomazwi afana lawakuqala; loDavida wawezwa.

²⁴ Bonke abantu bakoIsrayeli bathi bembona lowomuntu bambalekela, besaba kakhulu.

²⁵ Bathi: Limbonile lowana umuntu ophumileyo na? Impela uphumele ukweyisa uIsrayeli. Lowo ombulalayo, inkosi izamnika inotho lendodakazi yayo, lendlu kayise ibe ngekhululekileyo koIsrayeli.

²⁶ UDavida wathi ebantwini ababemi laye: Uzakwenzelwani umuntu obulala lumFilistiya, asuse ihlazo koIsrayeli na? Ngoba ungubani lumFilistiya ongasokanga ukuba azeyise izimpi zikaNkulunkulu ophilayo na?

²⁷ Abantu bamphendula ngokunjalo bathi: Kuzakwenziwa njalo kulowomuntu ombulalayo.

²⁸ UEliyabi umnewabo wezwa lapho ekhuluma labantu; uEliyabi wamthukuthelela kakhulu uDavida, wathi kuye: Ufunani lapha na? Izimvu leziyana ezingengaki uzitshiye lobani egangeni na? Ngiyakwazi ukuziphakamisa kwakho, lobubi benhliziyo yakho; ngoba uzebona impi.

²⁹ UDavida wathi: Ngenzeni na? Bengingabuzi kuphela na?

³⁰ Wasemfulathela, wakhangela komunye ebuza lowombuzo; abantu bamphendula njengakuqala.

³¹ Kwathi lapho sebewezwile amazwi kaDavida, bamtshela uSawuli; yena wambiza.

³² UDavida wathi kuSawuli: Ungabi lomhedehede ngalowomuntu, nkosi; inceku yakho izakuyakulwa lalowomFilistiya.

³³ USawuli wathi kuDavida: Ungeke uyekulwa lalumFilistiya; ngoba wena ungumfana nje, yena uyindoda yempi kusukela ebutsheni bakhe.

³⁴ Kodwa uDavida wathi kuSawuli: Inceku yakho ingumalusi wezimvu zikayise; lapho kufika isilwane loba ibhere ibambe imvu emhlambini,

³⁵ ngisuka ngikulandele, ngikutshaye, ngiyikhuphe imvu emlonyeni wakho; uba kungivukela, ngikubambe ngesilevu, ngikutshaye, ngikubulale.

³⁶ Inceku yakho seyabulala izilwane lamabhere; lalumFilistiya ongasokanga ngizamenza njalo, lokhu weyisile izimpi zikaNkulunkulu ophilayo.

³⁷ UNkulunkulu owangophula enzitsheni zesilwane lenzitsheni zebhere, uzangophula lesandleni salumFilistiya. USawuli wasesithi kuDavida: Hambake, iNkosi ibe lawe.

³⁸ USawuli wagqokisa uDavida ezakhe izigqoko, wamthwalisa ingowane yethusi ekhanda, wamgqokisa ibhatshi lensimbi.

³⁹ UDavida wabophela umhedla kaSawuli phezu kwezigqoko, wazama ukuhamba, kodwa wehluleka ngoba wayengazejwayelanga. Wasesithi kuSawuli: Ngiyehluleka ukuhamba ngilalezizinto ngoba kangizejwayelanga. Wasezikhupha.

⁴⁰ Wasethatha umqwayi wakhe, wakhetha amatshe amahlanu abutshelezi esifuleni, wawafaka esikhwameni sakhe sokwalusa, waphatha isavutha sakhe, wasesondela kumFilistiya.

⁴¹ Weza umFilistiya, wasondela kuDavida; umuntu wakhe ophatha isihlangu wayephambi kwakhe.

⁴² Kwathi lapho umFilistiya ekhangela wabona uDavida, wameyisa; ngoba wayengumfanyana nje obukekayo elobuso obubomvana lamehlo amahle.

⁴³ UmFilistiya wathi kuDavida: Ngiyinja yini ukuba uze kimi uphethe induku na? UmFilistiya wamqalekisa uDavida ngabonkulunkulu bakhe.

⁴⁴ UmFilistiya wathi kuDavida: Woza lapha, ngizanika inyoni zaphezulu lenyamazana zeganga inyama yakho.

⁴⁵ UDavida wathi kumFilistiya: Wena uza kimi uphethe umhedla, lomkhonto, tomdikadika; kodwa mina ngiza kuwe ngebizo leNkosi yamabandla, uNkulunkulu wezimpi zakoIsrayeli omeyisileyo.

⁴⁶ Lamuhla iNkosi izakukunikela esandleni sami, ngizakukubulala, ngikuqume ikhanda; nginike lamuhla inyoni zaphezulu lenyamazana zomhlaba izidumbu zempi yamaFilistiya, ukuze wonke umhlaba wazi ukuba kukhona uNkulunkulu koIsrayeli.

⁴⁷ Wonke lumhlangano uzakwazi ukuba uNkulunkulu kakhululi ngomhedla langomkhonto; ngoba ukulwa kungokweNkosi, izakukunikela esandleni sethu.

⁴⁸ Kwathi lapho umFilistiya esesondela kuye, uDavida wasegijima masinyane ukuba alwe laye.

⁴⁹ UDavida wafaka isandla sakhe esikhwameni sakhe, wakhupha khona ilitshe, walijikijela, wamtshaya umFilistiya ebunzini lakhe; ilitshe latshona ebunzini, wawela phansi ngobuso.

⁵⁰ UDavida wamahlula umFilistiya ngesavutha langelitshe, wamtshaya, wambulala engaphathanga mhedla esandleni.

⁵¹ UDavida wasegijima esima phezu komFilistiya, wathatha umhedla wakhe, wawukhupha esikhwameni sawo, waquma ikhanda lakhe ngawo. Kwathi lapho amaFilistiya esebona ukuba iqhawe lawo selifile, abaleka.

⁵² Abantu bakoIsrayeli labakoJuda basuka bamemeza kakhulu, baxotshana lawo baze bafika eGathi lasemasangweni aseEkroni. Abalimeleyo bamaFilistiya bawela endleleni yaseSharayimi baze bafika eGathi leEkroni.

⁵³ AbakoIsrayeli babuya ekuxotsheni amaFilistiya, baphanga izihonqo zawo.

⁵⁴ UDavida wathatha ikhanda lomFilistiya, waliletha eJerusalema; kodwa wabeka izikhali zakhe ethenteni lakhe.

⁵⁵ Kwathi uSawuli ebona uDavida ephuma ukuyakulwa lamaFilistiya, wathi kuAbineri induna yempi yakhe: Abineri, uyindodana kabani lumfana na? UAbineri wathi: Ngifunga wena, nkosi, kangazi.

⁵⁶ Inkosi yasisithi: Ake ubuze ukuba uyindodana kabani lumfana.

⁵⁷ UDavida esebuya ekubulaleni umFilistiya, uAbineri wamthatha, wamusa kuSawuli ephethe ikhanda lomFilistiya.

⁵⁸ USawuli wasesithi kuye: Mfana, uyindodana kabani na? UDavida waphendula wathi: Ngiyindodana yenceku yakho, uJese waseBetlehema.