1 USamuyeli 12 - iBhayibhili Elingcwele 1978

USamuweli ukhuluma labakoIsrayeli ngokuphila kwabo

¹ USamuweli wathi kuye wonke uIsrayeli: Khangelani, ngililalele kukho konke elikucelileyo kimi, ngalibekela inkosi.

² Nansike inkosi ezalikhokhela; mina sengiluphele, ngiyimpunga, nanka lamadodana ami akini; minake ngilikhokhele kusukela ebutsheni bami kuze kube lamuhla.

³ Sengikhonake; fakazani ngami phambi kweNkosi uNkulunkulu logcotshiweyo wayo. Ngubani engimthathele inkabi yakhe, loba ubabhemi wakhe na? Ngikhohlise bani na? Ngicindezele bani na? Ngiwamukele kubani umvuzo wokuthengwa ukuze ngivale amehlo ami ngawo na? Ngitshelani, ngizakukubuyisela kini.

⁴ Bathi kuye: Kawusikhohlisanga, kawusicindezelanga, njalo kawamukelanga lutho kithi.

⁵ Wasesithi kibo: INkosi uNkulunkulu ingufakazi ngani kanye logcotshiweyo wayo ungufakazi lamuhla wokuthi kalifumananga lutho esandleni sami. Bathi: Ingufazaki.

⁶ USamuweli wathi ebantwini: Yebo, iNkosi ingufakazi, yona eyalinika uMose loAroni, yakhupha okhokho benu elizweni laseGibithe.

⁷ Sukumanike, khona lapha phambi kwayo ngizaphendulana lani, ngilandise ngezenzo zonke ezinkulu zeNkosi eyazenza kini lakubokhokho benu.

⁸ Lapho uJakobe lamadodana akhe sebefikile eGibithe, abaseGibithe babahlupha; okhokho benu bakhala eNkosini; yona yabathumela uMose loAroni ababakhupha eGibithe, babahlalisa kulindawo.

⁹ Kodwa bayikhohlwa iNkosi uNkulunkulu wabo; yabanikela kuSisera induna yempi kaJabini, inkosi yaseHazori, lakumaFilistiya, lakuyo inkosi yaseMowabi; labo balwa labo.

¹⁰ Bakhala eNkosini bathi: Sonile ngoba siyilahlile iNkosi, sakhonza izithombe zikaBali lezikaAshitorethi. Kodwa khathesi sophule ezitheni zethu, sizakukukhonza.

¹¹ INkosi yasithuma uJerubali, loBaraki, loJefta, loSamuweli ukulikhulula ezitheni zenu inxa zonke; lavikeleka.

¹² Lapho libona ukuthi uNahashi inkosi yaseAmoni uyalihlasela, lathi kimi: Atshi bo, sifuna inkosi ezasibusa; kanti iNkosi uNkulunkulu wenu yiyo inkosi yenu.

¹³ Nansoke inkosi eliyicelileyo; liyikhethile, leNkosi uNkulunkulu yalibekela yona.

¹⁴ Uba liyesaba iNkosi uNkulunkulu liyikhonza, lilalela ilizwi layo, lingayihlamuki imilayo yayo, uba lina lenkosi elibusayo lilandela iNkosi uNkulunkulu wenu, kuzalilungela.

¹⁵ Kodwa uba lingalilaleli ilizwi layo, lihlamuka imilayo yayo, isandla sayo sizamelana lani lenkosi yenu.

¹⁶ Ngakhoke manini, libone linto enkulu iNkosi uNkulunkulu ezayenza phambi kwenu.

¹⁷ Angithi sekuyisikhathi sokuvuna amabele na? Ngizakhuleka eNkosini ukuba ithumele ukuduma lezulu, ukuze lizone, lazi ukuthi kubi kangakanani emehlweni ayo ukuzicelela kwenu inkosi.

¹⁸ USamuweli wasekhuleka eNkosini, yathumela ukuduma lezulu mhlalokho, bonke abantu bayesaba kakhulu iNkosi loSamuweli.

¹⁹ Bonke abantu bathi kuSamuweli: Khulekela inceku zakho eNkosini uNkulunkulu wakho, ukuba singafi; ngoba sengezelele ezonweni zethu zonke lobububi bokuzicelela inkosi.

²⁰ USamuweli wasesithi ebantwini: Lingesabi; loba lenzile bonke lobububi, lingaphambuki ekuyilandeleni iNkosi uNkulunkulu, kodwa liyikhonze ngenhliziyo yenu yonke.

²¹ Lingaphambuki ukuba lilandele izinto eziyize ezingabuyiseli lutho lezingasizi lutho, ngoba ziyize.

²² Ngoba iNkosi kayikubalahla abantu bayo ngenxa yebizo layo elikhulu, ngoba kwaba kuhle kuyo ukuzenzela lina libe ngabantu bayo.

²³ Minake kakube khatshana lami ukuba ngone eNkosini ngokuyekela ukulikhulekela; ngizalifundisa indlela enhle lelungileyo.

²⁴ Yesabani iNkosi kuphela, liyikhonze ngeqiniso langenhliziyo yenu yonke. Khangelani okukhulu elenzele khona.

²⁵ Kodwa uba lisenza okubi, lizachitheka lina kanye lenkosi yenu.