1 USamuyeli 11 - iBhayibhili Elingcwele 1978

USawuli unqoba amaAmoni

¹ Ngemva kwenyanga eyodwa kwasuka uNahashi waseAmoni wavimbezela iJabeshi‐Gileyadi; bonke abantu baseJabeshi bathi kuNahashi: Yenza isivumelwano lathi, sizakukusebenzela.

² Kodwa uNahashi waseAmoni wathi kibo: Ngizasenzela phezu kwalokhu isivumelwano lani, ukuba ngilikhuphe amehlo enu awesokunene ukuze ngehlisele uIsrayeli wonke ihlazo.

³ Abadala baseJabeshi bathi: Ake usinike ithuba lensuku eziyisikhombisa ukuba sithume izithunywa kulo lonke ilizwe lakoIsrayeli. Uba kungekho ongasisiza, sizazinikela kuwe.

⁴ Izithunywa zafika eGibeya lakibo kaSawuli, zayilandisa indaba ebantwini, bonke abantu bakhala.

⁵ USawuli wayevela emasimini eqhuba inkabi, wathi: Abantu bakhalelani na? Basebemtshela indaba yabantu baseJabeshi.

⁶ Umoya kaNkulunkulu wehlela phezu kukaSawuli lapho esizwa lawomazwi, wathukuthela kakhulu.

⁷ Wasethatha inkabi ezimbili, wazihlahlela zaba yiziqa, wazithumela ngezithunywa kulo lonke lakoIsrayeli esithi: On gaphumi alandele uSawuli loSamuweli, kuzakwenziwa nje enkabini zakhe. Ukwesaba iNkosi uNkulunkulu kwehlela phezu kwabantu, baphuma njengamuntu munye.

⁸ Lapho ebaqoqa eBezeki, abakoIsrayeli babe yizinkulungwane ezingamakhulu amathathu, abakoJuda beyizinkulungwane ezingamatshumi amathathu.

⁹ Bathi kuzo izithunywa ezazifikile: Lizabatshela abaseJabeshi‐Gileyadi lithi: Kusasa nxa ilanga selitshisa, lizakhululwa. Lapho izithunywa zifika zabatshela abaseJabeshi; bona bathokoza;

¹⁰ bathi kuNahashi: Kusasa sizazinikela kuwe, wenze lokho okubona kufanele.

¹¹ Kwathi kusisa uSawuli wabahlela abantu ngezigaba ezintathu; bangena phakathi kwezihonqo ngomlindo wasekuseni; bawabulala amaAmoni laze latshisa ilanga; aseleyo ahlakazeka, kakusalanga kiwo abantu ababili bendawonye.

¹² Abantu basebesithi kuSamuweli: Ngobani abathi uSawuli uzasibusa na? Baletheni labobantu ukuze sibabulale.

¹³ Kodwa uSawuli wathi: Kakuyikubulawa muntu ngalolusuku, ngoba lamuhla iNkosi yenze ukukhululwa koIsrayeli.

¹⁴ USamuweli wasesithi ebantwini: Wozani siye eGiligali, sivuselele umbuso khona.

¹⁵ Bonke abantu baya eGiligali, bambeka khona uSawuli phambi kweNkosi, waba yinkosi. Bahlaba khona imihlatshelo yeminikelo yokuthula, uSawuli labo bonke abantu bakoIsrayeli bathokoza kakhulu.