1 UPhethro 1 - iBhayibhili Elingcwele 1978

Isibingelelo

¹ Mina Petro, umphostoli kaJesu Kristu, ngibhalela abahlakazekileyo abasePontusi, laseGalathiya, laseKaphadosiya, laseAsiya, laseBithiniya,

² abakhethiweyo ngokwazi ngaphambili kukaNkulunkulu uBaba, bahlukaniselwa nguMoya ukulalela uJesu Kristu lokufafazwa ngegazi lakhe; ngithi: Kakwandiswe kini umusa lokuthula.

UPetro ubonga uNkulunkulu ngethemba eliphilileyo

³ Kabongwe uNkulunkulu uYise weNkosi yethu uJesu Kristu, owasizala kutsha ngesihawu sakhe esikhulu ukuba sibe lethemba eliphilileyo ngokuvuka kukaJesu Kristu kwabafileyo,

⁴ lokuba sibe lelifa elingapheliyo, elingangcolanga, elingabuniyo. Lilondolozelwe lona ezulwini,

⁵ lina elilondolozwe ngamandla kaNkulunkulu ngokukholwa ukuba libe lokusiliswa okulungiselwe ukwambulwa ngesikhathi sokucina.

⁶ Thokozani ngalokhu, lanxa okwesikhatshana lisazakuhlupheka ngezilingo eziyizinhlobonhlobo uba kudingeka,

⁷ ukuze ubuqotho bokukholwa kwenu, okuligugu okwedlula igolide eligugayo loba lihlolwe ngomlilo, bulethe ukubonga lobukhosi lodumo ekwambulweni kukaJesu Kristu.

⁸ Yena liyamthanda lingambonanga, elithi lakhathesi lingamboni likholwe kuye, lithokoze ngentokozo enkulu engakhulumekiyo,

⁹ lizuze umvuzo wokukholwa kwenu oyikusiliswa kwemiphefumulo yenu.

¹⁰ Abaprofethi abatshumayela ngomusa obuzakuza kini bafunisisa babuzisisa ngalokhukusiliswa.

¹¹ Babuza ukuthi yisiphi lokuba sinjani isikhathi esikhonjwa nguMoya kaKristu owayekibo, etshengisa ngaphambili izinhlupheko eziqondene loKristu lobukhosi obuzakuzilandela.

¹² Bambulelwa ukuthi kabazisebenzeli bona kodwa basebenzela lina, ezintweni eselitshunyayezwe zona ngabalitshumayeze izindaba ezinhle ngoMoya oNgcwele othunywe evela ezulwini, izinto izithunywa ezilangatha ukuzibona.

UPetro ukhuthaza abakholwayo ukuba bahambe ngobungcwele

¹³ Vusani ingqondo zenu, liqonde, lithembe ngokupheleleyo umusa elizakuwamukela ekwambulweni kukaJesu Kristu.

¹⁴ Njengabantwana abalalelayo lingahambi ngokwenkanuko zenu zakuqala zokungazi kwenu,

¹⁵ kodwa njengoba owalibizayo engcwele wobani ngcwele lani ekuhambeni kwenu konke,

¹⁶ njengokulotshiweyo ukuthi: Lizakuba ngcwele ngoba mina ngingcwele.

¹⁷ Uba likhuleka lisithi Baba kuye owahlulela ilowo lalowo ngokwemisebenzi yakhe engabandlululi, hambani ngokwesaba esikhathini senu liyizihambi emhlabeni.

¹⁸ Liyazi ukuthi kalihlengwanga ngezinto ezibhubhayo ezinjengesiliva legolide ekuhambeni kwenu okuyize elakwamukela kubokhokho benu;

¹⁹ kodwa lahlengwa ngegazi likaKristu eliligugu kungathi ligazi lewundlu elingelasici, elingelabala.

²⁰ Wamiswa ngaphambili umhlaba ungakabi khona, kodwa wabonakaliswa esikhathini sokucina ngenxa yenu;

²¹ elikholwa kuNkulunkulu ngaye, yena owamvusa kwabafileyo wamnika ubukhosi, ukuze ukukholwa kwenu lethemba lenu libe kuNkulunkulu.

²² Ngokulalela iqiniso selihlambulule imiphefumulo yenu ukuthanda abazalwane ngobuqotho; ngakhoke thandanani ngokupheleleyo ngenhliziyo yonke.

²³ Selizelwe ngokutsha, kungesikho ngenhlanyelo ebolayo, kodwa ngengaboliyo, ngelizwi likaNkulunkulu eliphilayo lelimiyo.

²⁴ Ngoba kuthiwa: Abantu bonke banjengotshani, lobukhosi babo bonke bunjengamaluba otshani; utshani buyabuna, lamaluba awohloke,

²⁵ kodwa ilizwi leNkosi limi kuze kube nini lanini. Lelolizwi lilivangeli elalitshunyayezwayo.