1 UJohane 2 - iBhayibhili Elingcwele 1978

UJesu Kristu unguMmeli

¹ Bantwana bami, ngililobela lokhu ukuba lingoni; kodwa uba umuntu esona, siloMmeli kuBaba, uJesu Kristu olungileyo.

² Yena uyinhlawulo yezono zethu, kungesizo ezethu zodwa, kodwa lezomhlaba wonke.

³ Lokho okutshengisa ukuthi siyamazi yikuba sigcine imilayo yakhe.

⁴ Lowo othi: Ngiyamazi; kodwa engagcini imilayo yakhe ungumqambi wamanga, leqiniso kalikho kuye.

⁵ Kodwa lowo ogcina ilizwi lakhe, uthando lukaNkulunkulu luphelelisiwe kuye impela. Lokho okutshengisa ukuthi sikuye yikuthi

⁶ lowo othi uhlala kuye, ufanele yena ahambe njengalokhu ahamba uKristu.

Umlayo omutsha

⁷ Bathandekayo, kangililobeli umlayo omutsha, kodwa ngililobela umlayo omdala elalilawo kusukela ekuqaleni; lumlayo omdala uyilizwi elalizwayo.

⁸ Kanti ngililobela umlayo omutsha, wona uliqiniso kuye lakini; ngoba umnyama uyadlula, lokukhanya kweqiniso sekukhanya.

⁹ Lowo othi esekukhanyeni abezonda umzalwane wakhe, usesemnyameni kuze kube lakhathesi.

¹⁰ Othanda umzalwane wakhe uhlala ekukhanyeni; kakukho okungamkhuba.

¹¹ Kodwa ozonda umzalwane wakhe usemnyameni, uhamba emnyameni, kakwazi lapho aya khona, ngoba umnyama uwaphumputhekisile amehlo akhe.

¹² Ngiyalilobela bantwana, ngoba izono zenu zithethelelwe ngenxa yakhe.

¹³ Ngiyalilobela bobaba, ngoba liyamazi yena okhona kusukela ekuqaleni. Ngiyalilobela lani zinsizwa, ngoba limnqobile uSathane. Ngilobele lina bantwana, ngoba liyamazi uBaba.

¹⁴ Ngilobele lina bobaba, ngoba liyamazi yena okhona kusukela ekuqaleni. Ngilobele lina zinsizwa, ngoba lilamandla, ilizwi likaNkulunkulu lihlala kini, limnqobile uSathane.

¹⁵ Lingawuthandi umhlaba lezinto zasemhlabeni. Uba umuntu ethanda umhlaba, uthando lukaYise kalukho kuye.

¹⁶ Ngoba konke okwasemhlabeni, inkanuko zomzimba lokukhanga amehlo lokuziqakisa kwalokhukuphila, kakuveli kuBaba, kuvela emhlabeni owonakeleyo.

¹⁷ Umhlaba uyadlula kanye lenkanuko zawo; kodwa owenza intando kaNkulunkulu uhlala kuze kube nini lanini.

Ukufika koMphikukristu

¹⁸ Bantwana, sekuyisikhathi sokucina. Njengalokhu lezwa kuthiwa uMphikukristu uyeza, lakhathesi sebekhona abanengi abaphikukristu; ngalokhu siyazi ukuthi sekuyisikhathi sokucina.

¹⁹ Baphuma kithi, kodwa babengesibo abakithi; ngoba uba babengabakithi ngabe bahlala lathi; kodwa baphuma ukuze babonakalise ukuthi kabasibo bonke abakithi.

²⁰ Kodwa lina ligcotshiwe ngoNgcwele, lilokwazi lonke.

²¹ Kangililobeli ngoba lingalazi iqiniso, kodwa ngoba liyalazi, liyazi ukuthi amanga kawasiwo aweqiniso.

²² Ngubani ongumqambi wamanga uba kungesuye ophikayo ukuthi uJesu unguKristu na? Nguye onguMphikukristu, ngoba ephika uBaba leNdodana.

²³ Ophika iNdodana kalaye uBaba; ovuma iNdodana uloBaba.

²⁴ Lokho elakuzwayo kusukela ekuqaleni kakuhlale kini. Uba lokho elakuzwayo kusukela ekuqaleni kuhlala kini, lani lizakuhlala kiyo iNdodana lakuye uBaba.

²⁵ Yilokhu asithembisa khona, ukuphila okungapheliyo.

²⁶ Ngililobela lokhu ngalabo abalikhohlisayo.

²⁷ Kodwa linake, ukugcotshwa elakwamukela kuye kuhlala kini, kalisweli muntu ukuba alifundise. Lokugcoba kwakhe kuyalifundisa ngakho konke, futhi kuqinisile, kakuqambi manga; njengoba lifundile, hlalani kuye.

²⁸ Ngakhoke, bantwana, hlalani kuye ukuze kuthi lapho ebonakala, sibe lesibindi, singabi lanhloni simcatshele ekufikeni kwakhe.

²⁹ Uba lisazi ukuthi ulungile, yazini ukuthi ilowo lalowo owenza ukulunga uzelwe nguye.