1 ImiLando 26 - iBhayibhili Elingcwele 1978

Izigaba zabalindi bamasango lezabaphathi bemisebenzi

¹ Nanzi izigaba zabalindi bamasango. KwabakoKora kwakunguMeshelemiya indodana kaKore kaEbiyasafi.

² UMeshelemiya wayelamadodana, izibulo lakhe linguZekariya, elandelwa nguJediyayeli, kulandela uZebadiya, kulandela uJathiniyeli,

³ kulandela uElamu, kulandela uJehohanani, kulandela uEliyeho‐Enayi.

⁴ UObedi‐Edoma wayelamadodana, izibulo linguShemaya, elandelwa nguJehozabadi, kulandela uJowa, kulandela uSakari, kulandela uNethaneli,

⁵ kulandela uAmiyeli, kulandela uIsakari, kulandela uPewulithayi; ngoba uNkulunkulu wayembusisile.

⁶ Lendodana yakhe uShemaya wazala amadodana ayezinhloko zezindlu, ngoba ayengamadoda ahlakaniphileyo.

⁷ Amadodana kaShemaya ayengoOthini loRefayeli loObedi loElizabadi, labafowabo uElihu loSemakhiya ababengamadoda alamandla.

⁸ Bonke laba babengamadodana kaObedi‐Edoma, bona lamadodana abo lezihlobo zabo bengamadoda ahlakaniphileyo ayewufanele umsebenzi, bengamatshumi ayisithupha lambili.

⁹ UMeshelemiya wayelamadodana lezihlobo, amadoda alamandla elitshumi lesificaminwembili.

¹⁰ UHosha owakoMerari wayelamadodana, uShimiri engomkhulu; ngoba lanxa wayengesilo izibulo, uyise wamenza waba ngomkhulu;

¹¹ walandelwa nguHilikiya, kulandela uTebaliya, kulandela uZekariya; wonke amadodana lezihlobo zikaHosa babelitshumi lantathu.

¹² Abalindi bamasango babehlukaniswe izigaba ngosendo lwabo, banikwa umsebenzi ethempelini ofanana lowezihlobo zabo.

¹³ Benza inkatho ngesango ngesango ngezindlu zabo abancinyane labakhulu ngokufananayo.

¹⁴ Inkatho yesango langasempumalanga yadla uShelemiya; basebesenza inkatho ngoZekariya indodana yakhe, umeluleki ohlakaniphileyo, wadliwa yinkatho yesango langasenyakatho.

¹⁵ UObedi‐Edoma wadliwa yinkatho yesango langaseningizimu; amadodana akhe kwathiwa kawalinde isiphala.

¹⁶ UHosa wadliwa yinkatho yesango langasentshonalanga, leyesango laseShalekethi elingasemgwaqweni oya phezulu. Kwalinda abalindi ngabalindi.

¹⁷ Ngasempumalanga babeyisithupha insuku zonke, ngasenyakatho bebane langaseningizimu bebane, kanye lababili ngababili esiphaleni,

¹⁸ laseParibari ngasentshonalanga babebane emgwaqweni bebabili eParibari uqobo.

¹⁹ Yizo lezo izigaba zabalindi bamasango phakathi kwamadodana kaKorahi laphakathi kwamadodana kaMerari.

²⁰ AmaLevi, izihlobo zabo, ayephethe inotho yethempeli lenotho yezinto ezingcwele.

²¹ Emadodaneni kaLadani awosendo lwabakoGerishoni ayezalwa nguLadani, inhloko zezindlu esigabeni sikaLadani owakoGerishoni,

²² uJehiyeli labafowabo uZethamu loJoweli babephethe inotho yethempeli.

²³ KwabakoAmramu labakoIzihari labakoHebroni labakoUziyeli

²⁴ uShebuweli indodana kaGereshoma kaMose wayephethe inotho.

²⁵ Usendo lomfowabo uEliyezeri lwalungoRehabiya, loJeshaya kaRehabiya, loJoramu kaJeshaya, loZikiri kaJoramu, loShelomothi kaZikiri.

²⁶ UShelomothi lezihlobo zakhe babephethe inotho yonke yezinto ezingcwele uDavida inkosi, lezinhloko zezindlu, lezinduna zezinkulungwane lezinduna zamakhulu, labaphathi bempi, ababezahlukanisele uNkulunkulu.

²⁷ Empangweni yempi banikela izipho zokulungisa ithempeli.

²⁸ Konke uSamuweli umboni loSawuli kaKishi loAbineri kaNeri loJowabi kaZeruya ababenikele ngakho, yebo, zonke izinto ezingcwele zaziphethwe nguShelomothi lezihlobo zakhe.

²⁹ KwabakoIzihari uKenaniya lamadodana akhe babephethe umsebenzi wangaphandle koIsrayeli beyizinduna labahluleli.

³⁰ KwabakoHebroni uHashabiya lezihlobo zakhe, amadoda alamandla ayinkulungwane lamakhulu ayisikhombisa, babevikela uIsrayeli ngasentshonalanga kweJordani ezintweni zonke zomsebenzi kaNkulunkulu lowenkosi.

³¹ KwabakoHebroni uJeriya wayengomkhulu — Ngomnyaka wamatshumi amane wokubusa kukaDavida kwadingwa phakathi kwezizukulwana zabakoHebroni; kwafunyanwa amadoda alamandla amakhulu phakathi kwazo eJezeri laseGileyadi —

³² Inkosi uDavida yakhetha amadoda alamandla ayizinkulungwane ezimbili lamakhulu ayisikhombisa, ayizihlobo zikaJeriya lezinhloko zezindlu, wawenza abaphathi babakoRubeni labakoGadi labengxenye yesizwe sakoManase ezintweni zonke zomsebenzi kaNkulunkulu lowenkosi.