1 ImiLando 24 - iBhayibhili Elingcwele 1978

¹ Nanzi izigaba zamadodana kaAroni. Amadodana kaAroni ayengoNadabi loAbihu loEleyazare loIthamari.

² Kodwa oNadabi loAbihu bafa uyise engakafi bengelabantwana; ngakho oEleyazare loIthamari baba ngabapristi.

³ UDavida esizwa nguZadoki omunye wamadodana kaEleyazare, loAhimeleki omunye wamadodana kaIthamari, wabamisa ngezigaba zokwenza umsebenzi wabo.

⁴ Amadoda ayezinhloko ayemanengi emadodaneni kaEleyazare ukwedlula emadodaneni kaIthamari; ngakho amadodana kaEleyazare ahlukaniswa izigaba ezilitshumi lesithupha, lamadodana kaIthamari ahlukaniswa izigaba ezificaminwembili.

⁵ Izigaba zamiswa ngenkatho, ngoba kwakulezinduna zendlu engcwele lezinduna zikaNkulunkulu emadodaneni kaEleyazare lakaIthamari.

⁶ UShemaya indodana kaNethaneli, umLevi owayengumbhali, wabaloba ogwalweni phambi kwenkosi uDavida laphambi kwezikhulu laphambi kukaZadoki umpristi laphambi kukaAhimeleki indodana kaAbiyatha, laphambi kwezinhloko zezindlu zabapristi lezamaLevi; kwenziwa inkatho ngendlu nganye nganye yamadodana kaEleyazare langendlu nganye nganye yamadodana kaIthamari ngokunikezelana.

⁷ Inkatho yokuqala yadla uJehoyaribi, eyesibili yadla uJedaya,

⁸ eyesithathu yadla uHarimi, eyesine yadla uSeworimi,

⁹ eyesihlanu yadla uMalikiya, eyesithupha yadla uMijamini,

¹⁰ eyesikhombisa yadla uHakhozi, eyesificaminwembili yadla uAbija,

¹¹ eyesificamunwemunye yadla uJeshuwa, eyetshumi yadla uShekaniya,

¹² eyetshumi lanye yadla uEliyashibi, eyetshumi lambili yadla uJakimi,

¹³ eyetshumi lantathu yadla uHupha, eyetshumi lane yadla uJeshebeyabi,

¹⁴ eyetshumi lanhlanu yadla uBiliga, eyetshumi lesithupha yadla uImeri,

¹⁵ eyetshumi lesikhombisa yadla uHeziri, eyetshumi lesificaminwembili yadla uHaphizezi,

¹⁶ eyetshumi lesificamunwemunye yadla uPhethahiya, eyamatshumi amabili yadla uJehezikeli

¹⁷ eyamatshumi amabili lanye yadla uJakini, eyamatshumi amabili lambili yadla uGamuli,

¹⁸ eyamatshumi amabili lantathu yadla uDelaya, leyamatshumi amabili lane yadla uMahaziya.

¹⁹ Yizo lezo izigaba zokwenza umsebenzi wabo ukuba bangene ethempelini ngokomthetho ababewunikwe nguAroni ukhokho wabo, njengokulaywa kwakhe yiNkosi uNkulunkulu kaIsrayeli.

²⁰ Abaseleyo emadodaneni kaLevi babeyilaba; emadodaneni kaAmramu kwakunguShubayeli; emadodaneni kaShubayeli kunguJehideya;

²¹ emadodaneni kaRehabiya kunguIshiya owayengomkhulu;

²² kwabakoIzihari kunguShelomothi; emadodaneni kaShelomothi kunguJahathi;

²³ emadodaneni kaHebroni kunguJeriya owayengomkhulu, elandelwa nguAmariya, kulandela uJahaziyeli, kulandela uJekameyamu;

²⁴ emadodaneni kaUziyeli kunguMika; emadodaneni kaMika kunguShamiri;

²⁵ lomfowabo kaMika uIshiya; emadodaneni kaIshiya kunguZekariya;

²⁶ emadodaneni kaMerari kunguMahli loMushi, kanye lendodana yakhe uJahaziya;

²⁷ koMerari, emadodaneni kaJahaziya kunguShohama loZakuri loIbiri;

²⁸ emadodaneni kaMahli kunguEleyazare owayengelamadodana;

²⁹ koKishi, emadodaneni kaKishi kunguJerameli;

³⁰ emadodaneni kaMushi kunguMahli loEderi loJerimothi. Lawo ngamadodana kaLevi ngezindlu zawo.

³¹ Laba labo kanye lezihlobo zabo, amadodana kaAroni, baphosa inkatho phambi kwenkosi uDavida loZadoki loAhimeleki lenhloko zezindlu zabapristi lezamaLevi, indlu enkulu lencinyane kanyekanye.