1 ImiLando 22 - iBhayibhili Elingcwele 1978

¹ UDavida wasesithi: Le izakuba yindlu yeNkosi uNkulunkulu, laleli libe lialtare lomnikelo wokutshiswa kaIsrayeli.

UDavida ulungiselela ukwakhiwa kwethempeli

² UDavida waselaya ukuba kubuthaniswe abezizweni ababekhona koIsrayeli; wakhetha abanye babo ukuba babaze amatshe okwakha indlu kaNkulunkulu.

³ UDavida wadinga insimbi enengi kakhulu yokwenza izipikili zezivalo lensimbi zokuhlanganisa, wadinga lethusi elinengi elingelakulinganiswa,

⁴ lezigodo zemikusu ezingelakubalwa; abaseSidoni labaseTire bamlethela imikusu eminengi.

⁵ UDavida wathi: USolomoni indodana yami usengumfana, kakabi lakwazi, indlu ezakwakhelwa iNkosi uNkulunkulu kumele ibe nkulu, ibatshazwe ibe lodumo emazweni wonke. Ngakhoke mina ngizakwenza amalungiselelo ngayo. Ngakho uDavida wasedingake impahla ezinengi zokwakha engakafi.

⁶ Wasebiza uSolomoni indodana yakhe, wamlaya ukuba akhele iNkosi uNkulunkulu kaIsrayeli indlu.

⁷ Wathi kuSolomoni: Mntanami, ngangizimisele ukwakhela ibizo leNkosi uNkulunkulu kaIsrayeli indlu.

⁸ Kodwa ilizwi leNkosi lafika kimi lisithi: Wena uchithe igazi elinengi, walwa izimpi ezinkulu; ngakho kawuyikwakhela ibizo lami indlu, ngoba uchithe igazi elinengi kangaka emhlabeni.

⁹ Kodwa, uzazala indodana ezakuba ngumuntu othanda ukuthula; ngizakuyiphumuza ezitheni zayo zonke inxa zonke. Izakuthiwa nguSolomoni okutsho umuntu othanda ukuthula, ngizamphumuza uIsrayeli ngimnike ukuthula ensukwini zakhe.

¹⁰ Yena uzakwakhela ibizo lami indlu. Uzakuba yindodana yami, mina ngibe nguyise, ngiqinise ubukhosi bakhe koIsrayeli kuze kube nininini.

¹¹ Wena mntanami, iNkosi ibe lawe ukuze uphumelele ukwakha indlu yeNkosi uNkulunkulu wakho, njengokutsho kwayo ngawe.

¹² INkosi ikunike ukuhlakanipha lokuqedisisa, ukuba kuthi lapho ikunika amandla koIsrayeli, uwulondoloze umlayo weNkosi uNkulunkulu wakho.

¹³ Uzakuphumelelake uba unanzelela ukugcina izimiso lemithetho iNkosi uNkulunkulu eyayinika uIsrayeli ngoMose. Qina, ube lesibindi, ungesabi utshaywe luvalo.

¹⁴ Ngayo yonke imizamo yami ngilungisele indlu yeNkosi amathalenta egolide ayizinkulungwane ezilikhulu, lamathalenta esiliva ayizinkulungwane eziyinkulungwane, lethusi lensimbi engelakulinganiswa, ngoba yinengi kakhulu; ngiyilungisele lezigodo lamatshe. Wenake uzakwengezelela kulokho.

¹⁵ Ulezisebenzi ezinengi, ababazi bamatshe, labakha ngamatshe, lababazi bezigodo, lazo zonke inhlobo zezingcitshi ezingelakubalwa,

¹⁶ ezikwaziyo ukusebenza ngegolide lesiliva lethusi lensimbi. Qalisake ukusebenza; iNkosi ibe lawe!

¹⁷ UDavida waselaya zonke izinduna zakoIsrayeli ukumsiza uSolomoni indodana yakhe,

¹⁸ wathi: INkosi uNkulunkulu wenu kayilani na? Kayilinikanga ukuthula inxa zonke na? Ngoba inikele abantu belizwe esandleni sami, lelizwe linqotshelwe iNkosi labantu bayo.

¹⁹ Vusani ingqondo zenu lenhliziyo zenu ukudinga iNkosi uNkulunkulu wenu. Qalisani ukwakha indlu yeNkosi uNkulunkulu, ukuze umtshokotsho wesivumelwano seNkosi lezitsha zikaNkulunkulu ezingcwele zingeniswe endlini eyakhelwe ibizo layo.