1 ImiLando 20 - iBhayibhili Elingcwele 1978

UDavida unqoba iRaba

¹ Ekuthwaseni komnyaka ngesikhathi sokuhlasela kwamakhosi uJowabi wakhokhela impi, wahlasela ilizwe lamaAmoni, wavimbezela iRaba. Kodwa uDavida wayesele eJerusalema. UJowabi walihlasela iRaba, walichitha.

² UDavida wathatha umqhele kankulunkulu wawo uMilkomu owawusekhanda lakhe, owawenziwe ngegolide elinzima kakhulu, owawulelitshe eliligugu, wawubeka kwelakhe ikhanda. Wathatha emzini lowo impango enkulu kakhulu.

³ Wakhupha abantu ababephakathi kwawo, wabasebenzisa ngamasaha langamapiki langamahloka ensimbi. Wenza njaloke uDavida kuyo yonke imizi yamaAmoni; wasebuyela eJerusalema labo bonke abantu.

Abantu bakaDavida babulala iziqhwaga

⁴ Emva kwalokho kwaba khona impi lamaFilistiya eGezeri; uSibekayi waseHushathi wabulala uSiphayi omunye wabantwana beziqhwaga; amaFilistiya ahlulwa.

⁵ Kwaba khona impi futhi lamaFilistiya; uElihanani indodana kaJayiri wabulala uLahimi umfowabo kaGoliyathi waseGithi, oluthi lomkhonto wakhe lwalungangogodo lomaluki.

⁶ Kwabuye kwaba khona impi eGathi lapho kwakukhona umuntu omude owayeleminwe eyisithupha esandleni, lamazwane ayisithupha onyaweni, kungamatshumi amabili lane kukonke; laye wayengomunye wabantwana beziqhwaga.

⁷ Lapho eseyisa uIsrayeli, uJonathani indodana kaShimeya, umfowabo kaDavida, wambulala.

⁸ Labo babezalwa yiziqhwaga eGathi; bonke babulawa nguDavida layizinceku zakhe.