1 ImiLando 19 - iBhayibhili Elingcwele 1978

Ukwahlulwa kwamaAmoni lamaSiriya

¹ Kwathi emva kwalokho uNahashi inkosi yamaAmoni wafa, indodana yakhe yaba yinkosi esikhundleni sakhe.

² UDavida wathi: Ngizamenzela umusa uHanuni indodana kaNahashi, ngoba uyise wangenzela umusa. UDavida wasethuma izithunywa ukuyamkhalela ngoyise. Zafika kuHanuni elizweni lamaAmoni ukumkhalela.

³ Izikhulu zamaAmoni zathi kuHanuni: Kambe ucabanga ukuthi ngoba uDavida ethumele abaduduzi kuwe, uyamhlonipha uyihlo na? Izinceku zakhe kazizanga kuwe ukuba ziphenye ilizwe, zilihlole, zilichithe na?

⁴ UHanuni wasezibamba inceku zikaDavida, wazigela, waquma ingubo zazo zafika ezinqeni, wasezixotsha.

⁵ Esekubikelwe lokho uDavida wathumela umuntu ukuzihlangabeza, ngoba ayeselenhloni kakhulu lawomadoda; wasesithi: Hlalani eJeriko zize zihlume indevu zenu, beselibuyake.

⁶ Lapho amaAmoni esebonile ukuthi aseyisinengiso kuDavida, uHanuni lamaAmoni bathumela amathalenta esiliva ayinkulungwane ukuqatsha inqola zokulwa labagadi bamabhiza eMesopotamiya leAramu‐Mahaka laseZoba.

⁷ Baqatsha inqola zokulwa ezizinkulungwane ezingamatshumi amathathu lambili kanye lenkosi yaseMahaka lempi yayo eyeza yamisa eduze leMedeba; lamaAmoni aphuma emizini yawo, eza ekulweni.

⁸ Kwathi lapho uDavida esekuzwile lokho wathumela uJowabi layo yonke impi yamaqhawe.

⁹ AmaAmoni aphuma amisa impi ngasesangweni lomuzi, lawomakhosi ayeze ekulweni amisa wodwa egangeni.

¹⁰ Lapho uJowabi esebonile ukuba impondo zempi zimhanqile ngaphambili langemuva, wakhetha abanye babakhethiweyo bakoIsrayeli, wabahlela ukuba balwe lamaSiriya;

¹¹ abanye abaseleyo wabanikeza kuAbishayi umfowabo, owabahlela ukuba balwe lamaAmoni.

¹² UJowabi wathi kuye: Uba amaSiriya engahlula, uze ungisize; uba amaAmoni ekwahlula, ngizakuza ukukusiza.

¹³ Mana isibindi, udode ngenxa yabantu bakithi langenxa yemizi kaNkulunkulu wethu; intando yeNkosi uNkulunkulu kayenziwe.

¹⁴ UJowabi labantu ababelaye basebesondela ukuba balwe lamaSiriya; abaleka phambi kwabo.

¹⁵ Lapho amaAmoni ebona ukuba amaSiriya ayabaleka, abaleka lawo phambi kukaAbishayi umfowabo kaJowabi, angena emzini. UJowabi wasebuyela eJerusalema.

¹⁶ AmaSiriya esebonile ukuthi ahluliwe nguIsrayeli athuma izithunywa, abiza amaSiriya ayengaphetsheya komfula iYufrathi, eholwa nguShofaki owayengumphathi wempi kaHadadezeri.

¹⁷ Lapho uDavida ebikelwa lokho, wabuthanisa wonke uIsrayeli, wachapha iJordani, wafika kibo, wahlela impi yakhe. Lapho ewahlasela amaSiriya, alwa laye.

¹⁸ AmaSiriya abaleka phambi kukaIsrayeli; uDavida wabulala amaSiriya ezinqola zokulwa ayezinkulungwane eziyisikhombisa, labahamba ngenyawo abazinkulungwane ezingamatshumi amane, wabulala loShofaki umphathi wempi yawo.

¹⁹ Lapho inceku zikaHadadezeri sezibonile ukuthi zehlulwe nguIsrayeli, zaxolisana loDavida, zathela kuye. Ngalokho amaSiriya asesesaba ukusiza amaAmoni futhi.