1 ImiLando 18 - iBhayibhili Elingcwele 1978UDavida unqoba izizwe 1 Emva kwalokho uDavida wahlasela amaFilistiya, wawahlula, wawathathela iGathi lemizana yalo. 2 Wanqoba lamaMowabi, aba yizinceku zakhe, athela kuye. 3 UDavida wanqoba loHadadezeri inkosi yaseZoba eHamathi owayesiya ukuqinisa umbuso wakhe ngasemfuleni iYufrathi. 4 UDavida wathumba kuye inqola zokulwa eziyinkulungwane, labamabhiza abazinkulungwane eziyisikhombisa, lamabutho ahamba ngenyawo azinkulungwane ezingamatshumi amabili; waquma imisipha yawo wonke amabhiza enqola zokulwa, kodwa watshiya amabhiza alingana izinqola zokulwa ezilikhulu. 5 Lapho amaSiriya aseDamaseko efika ukusiza uHadadezeri inkosi yaseZoba, uDavida wabulala abantu abazinkulungwane ezingamatshumi amabili lambili kuwo; 6 wasebeka amabutho okulinda eSiriya laseDamaseko; amaSiriya aba zinceku zakhe, athela kuye. INkosi yamnika uDavida ukunqoba endaweni zonke aya kuzo. 7 UDavida wathatha izihlangu zegolide ezaziphethwe yizinceku zikaHadadezeri, waziletha eJerusalema. 8 Emizini kaHadadezeri, iTibhathi leKuni, uDavida wathatha ithusi elinengi kakhulu; uSolomoni wenza ngalo ulwandle lwethusi lezinsika lezitsha zethusi. 9 Lapho uTowu inkosi yaseHamathi esizwa ukuthi uDavida uyahlule yonke impi kaHadadezeri inkosi yaseZoba, 10 wathumela indodana yakhe uHadoramu enkosini uDavida ukuyibingelela lokuyenzela amhlophe, ngoba ilwe loHadadezeri yamahlula; ngoba uHadadezeri wayandise ukulwa loTowu. UTowu wathumela lenhlobo zonke zezinto zegolide lezesiliva lezethusi; 11 lalezo inkosi uDavida yazahlukanisela iNkosi kanye lesiliva legolide ayekuthumbe ezizweni zonke, eEdoma, eMowabi lakumaAmoni lakumaFilistiya leAmaleki. 12 UAbishayi indodana kaZeruya wabulala amaEdoma azinkulungwane ezilitshumi lesificaminwembili esihotsheni seTshwayi; 13 wabeka amabutho okulinda eEdoma; abasEdoma baba zinceku zikaDavida. INkosi yamnika uDavida ukunqoba endaweni zonke aya kuzo. 14 UDavida wambusake wonke uIsrayeli, wahlulela wenza ukulunga kubo bonke abantu bakhe. 15 UJowabi indodana kaZeruya wayephethe impi, uJehoshafati indodana kaAhiludi wayengumbhali; 16 uZadoki indodana kaAhitubi loAhimeleki indodana kaAbiyatha babengabapristi; uShavisha wayengumabhalane; 17 uBenaya indodana kaJehoyada wayephethe amaKerethi lamaPelethi ayengabalindi; lamadodana kaDavida ayezinduna ezinkulu emsebenzini wenkosi. |
Bible Society of Zimbabwe 1978
Bible Society of Zimbabwe