1 ImiLando 15 - iBhayibhili Elingcwele 1978

Umtshokotsho wesivumelwano seNkosi ulethwa eJerusalema

¹ UDavida wazakhela izindlu emzini kaDavida, walungisa indawo yomtshokotsho kaNkulunkulu, wawumisela ithente.

² Wasesithi: Kakungabi lamuntu ozathwala umtshokotsho kaNkulunkulu kuphela amaLevi, ngoba iNkosi uNkulunkulu yawakhethela ukuthwala umtshokotsho wayo lokuyikhonza kuze kube nininini.

³ UDavida wasebuthanisa uIsrayeli wonke eJerusalema ukuba balethe umtshokotsho weNkosi endaweni yawo ayeyilungisele wona.

⁴ Wasebuthanisa amadodana kaAroni lamaLevi.

⁵ Kumadodana kaKohathi kwakunguUriyeli induna kanye lezihlobo zakhe ezilikhulu lamatshumi amabili;

⁶ kumadodana kaMerari kwakunguAsaya induna kanye lezihlobo zakhe ezingamakhulu amabili lamatshumi amabili;

⁷ kumadodana kaGerishoni kwakunguJoweli induna kanye lezihlobo zakhe ezilikhulu lamatshumi amathathu;

⁸ kumadodana kaElizafani kwakunguShemaya induna kanye lezihlobo zakhe ezingamakhulu amabili;

⁹ kumadodana kaHebroni kwakunguEliyeli induna kanye lezihlobo zakhe ezingamatshumi aficaminwembili;

¹⁰ kumadodana kaUziyeli kwakunguAminadaba induna kanye lezihlobo zakhe ezilikhulu letshumi lambili.

¹¹ UDavida wasebiza abapristi oZadoki loAbiyatha, lamaLevi oUriyeli loAsaya loJoweli loShemaya loEliyeli loAmanidaba,

¹² wathi kubo: Liyizinhloko zezindlu zamaLevi; zihlambululeni lina lezihlobo zenu ukuze lilethe umtshokotsho weNkosi, uNkulunkulu kaIsrayeli, endaweni engiyilungisele wona.

¹³ Ngoba lina lalingekho kuqala, iNkosi uNkulunkulu wethu yasitshaya, ngoba singakhulekanga kuyo ngendlela efaneleyo.

¹⁴ Ngakho abapristi lamaLevi basebezihlambulula ukuletha umtshokotsho weNkosi, uNkulunkulu kaIsrayeli.

¹⁵ AmaLevi awetshata umtshokotsho kaNkulunkulu ngezigodo, njengokutsho kukaMose ngelizwi leNkosi.

¹⁶ UDavida waselaya izinduna zamaLevi ukumisa izihlobo zazo zibe ngabahlabeli bokutshaya amachacho lemihubhe lezigubhu, besenza umsindo othokozisayo.

¹⁷ AmaLevi asemisa uHemani indodana kaJoweli, lasezihlotsheni zakhe uAsafi indodana kaBerekiya; kwabakoMerari izihlobo zabo bamisa uEthani indodana kaKushaya,

¹⁸ bekanye lezihlobo zabo zesigaba sesibili, ezingoZekariya loJahaziyeli loShemiramothi loJehiyeli loUni loEliyabi loBenaya loMahaseya loMathathiya loElifelehu loMikineya, labalindi bamasango oBedi‐Edoma loJeyiyeli.

¹⁹ Abahlabeleli oHemani loAsafi loEthani babezatshaya izigubhu zethusi.

²⁰ OZekariya loAziyeli loShemiramothi loJehiyeli loUni loEliyabi loMahaseya loBenaya babezatshaya amachacho akhalela phezulu;

²¹ oMathithiya loElifelehu loMikineya loObedi‐Edoma loJeyiyeli loAzaziya babezakhokhela ngamachacho akhalela phansi.

²² UKenaniya umkhokheli wamaLevi ekuhlabeleni wayezahlabelisa ngoba wayekwazi.

²³ OBerekiya loElkana babezakuba ngabagcini bamasango omtshokotsho wesivumelwano.

²⁴ OShebaniya loJoshafati loNethaneli loAmasayi loZekariya loBenaya loEliyezeri abapristi babezakhalisa izimpondo phambi komtshokotsho kaNkulunkulu. UObedi‐Edoma loJehiya labo babengabagcini bamasango omtshokotsho wesivumelwano.

²⁵ UDavida labadala bakoIsrayeli lezinduna zezinkulungwane bawulanda umtshokotsho wesivumelwano seNkosi endlini kaObedi‐Edoma ngokuthokoza.

²⁶ Ngoba uNkulunkulu ewasiza amaLevi ayewuthwele umtshokotsho wesivumelwano seNkosi banikela umhlatshelo wenkunzi eziyisikhombisa lenqama eziyisikhombisa.

²⁷ UDavida lawo wonke amaLevi ayewuthwele umtshokotsho wesivumelwano labahlabeleli loKenaniya umkhokheli wabahlabeleli babegqoke ingubo zelembu elihle; uDavida wayegqoke lengubo yamahlombe yelembu elihle.

²⁸ Ngakhoke bonke abakoIsrayeli bawuletha umtshokotsho wesivumelwano seNkosi ngokumemeza langokukhala kwezimpondo lokwezigubhu, betshaya amachacho lemihubhe.

²⁹ Kwathi lapho umtshokotsho weNkosi ungena emzini kaDavida, uMikhali indodakazi kaSawuli walunguza ngewindi wabona inkosi uDavida esina ethokoza, wamdelela enhliziyweni yakhe.