1 AbaseThesalonika 4 - iBhayibhili Elingcwele 1978

UPawuli ubalaya ngokuhamba kwabo

¹ Elokucinake, bazalwane, siyalincenga, sililaya ngeNkosi uJesu ukuba njengalokhu lakufunda kithi ukuthi lifanele ukuhamba lokumthokozisa kanjani uNkulunkulu, njengalokho lihamba ngokunjalo, kwenzenike lokhu kakhulu.

² Ngoba liyayazi imilayo esalinika yona ngayo iNkosi uJesu.

³ Intando kaNkulunkulu yikuba libe ngcwele, lizithinte ekuphingeni;

⁴ ilowo lalowo wenu kakwazi ukuphatha umzimba wakhe ngobungcwele langokuhlonipha.

⁵ Lingabuswa yinkanuko njengabangakholwayo abangamaziyo uNkulunkulu;

⁶ kakungabi khona loyedwa owonayo, aphambe umfowabo ngolutho, ngoba iNkosi ingumphindiseli kukho konke lokho, njengoba salitshela, saqinisa ngaphambili.

⁷ Ngoba uNkulunkulu kasibizelanga emanyaleni, kodwa wasibizela ebungcweleni.

⁸ Ngakhoke lowo odelela lokhu kadeleli muntu, kodwa udelela uNkulunkulu olinika uMoya wakhe oNgcwele.

⁹ Mayelana lothando lobuzalwane kalidingi ukuba ngililobele, ngoba lina uqobo lifundisiwe nguNkulunkulu ukuba lithandane.

¹⁰ Lempela liyakwenza lokhu, liyabathanda bonke abazalwane abaseMakedoniya lonke. Kodwa siyalilaya, bazalwane, ukuba likwenze lokhu kakhulu,

¹¹ likhuthalele ukuhlala ngokuthula, ngokwenza okwenu, lisebenze ngezandla zenu, njengoba salilaya,

¹² ukuze lizuze ukuhlonitshwa ngabangaphandle, lingasweli lutho.

Ukuvuka kwabafileyo

¹³ Kasithandi, bazalwane, ukuba lingabi lakwazi ngalabo asebefile, ukuze lingadabuki njengabanye abangelalo ithemba.

¹⁴ Ngoba uba sikholwa ukuthi uJesu wafa, wabuya wavuka, ngokunjaloke uNkulunkulu uzakubavusa ngaye uJesu labo asebefile.

¹⁵ Ngoba lokhu sikutsho kini ngelizwi leNkosi ukuthi thina, esisekhona esitshiywe kuze kube sekufikeni kweNkosi, kasiyikubandulela isibili labo asebafa;

¹⁶ ngoba iNkosi uqobo izakwehla ivela ezulwini ngomdumo, ngokumemeza kwesithunywa, langokukhala kophondo lukaNkulunkulu; labafileyo kuKristu bazakuvuka kuqala;

¹⁷ thinake esisekhona sisasele sizakuhluthunelwa kanye labo emayezini, sihlangabeza iNkosi emoyeni; sihlale layo kokuphela.

¹⁸ Ngakhoke duduzanane ngalamazwi.