1 AbaseThesalonika 3 - iBhayibhili Elingcwele 1978

UPawuli wabathumela uTimothi

¹ Kwathike singase lakubekezela, sathi kuhle ukuba sisale sodwa eAtene,

² sathuma uTimothi umzalwane wethu, lesikhonzi sikaNkulunkulu evangelini likaKristu, ukuba aliqinise ekukholweni kwenu lokuba alikhuthaze,

³ ukuba kungawiswa lamunye wenu ngalezizinhlupheko; ngoba liyazi lina simiselwe lokhu.

⁴ Ngoba kwathi siselani, salitshela ngaphambili ukuthi sizakuhlupheka, njengoba kwaba njalo, lani liyakwazi.

⁵ Ngenxa yalokhu, ngingaselamandla okubekezela, ngathumela ukuba ngazi ukukholwa kwenu, ngoba ngesaba ukuthi mhlawumbe umlingi ulilingile, lokuthi umsebenzi wethu ube yize.

UPawuli uyathokoza, uyabakhulekela

⁶ Kodwa khathesi uTimothi usefikile kithi evela kini, usibikela indaba ezinhle zokukholwa lothando lwenu, lokuthi lihlala lisikhumbula kuhle, lifisa ukusibona njengoba lathi sifisa ukulibona.

⁷ Ngalokhoke, bazalwane, saduduzeka ngani ngokukholwa kwenu osizini lasekuhluphekeni kwethu,

⁸ ngoba khathesi siyavuselelwa, uba lina limi liqinile eNkosini.

⁹ Singambonga kanjani uNkulunkulu ngokuthokoza konke esithokoza ngakho phambi kukaNkulunkulu wethu ngenxa yenu na?

¹⁰ Ebusuku lemini siyakhuleka ukuba sibonane lani, siphelelise okusileleyo ekukholweni kwenu.

¹¹ Kungathi uNkulunkulu loBaba uqobo leNkosi yethu uJesu angayiqondisa indlela yethu yokuza kini;

¹² leNkosi ikhulise uthando lwenu, omunye komunye lakubo bonke abantu, njengokuba sinjalo thina kini,

¹³ ukuze iqinise inhliziyo zenu, zingabi lakusoleka ebungcweleni phambi kukaNkulunkulu uBaba ekufikeni kweNkosi uJesu kanye labantu bakhe bonke.