1 AbaseThesalonika 1 - iBhayibhili Elingcwele 1978

UPawuli uyababingelela. Uyabonga ngokukholwa kwabo

¹ Thina oPawuli, loSilivanu, loTimothi, sithi kulo ibandla labaseTesalonika elikuNkulunkulu uBaba laseNkosini uJesu Kristu: Kakube kini umusa lokuthula.

² Sibonga uNkulunkulu ngezikhathi zonke ngani lonke, sihlala siliphatha ekukhulekeni kwethu;

³ sikhumbula phambi kukaNkulunkulu wethu uBaba izenzo zenu zokukholwa, lomsebenzi wenu wothando, lokuqina kwethemba lenu eNkosini uJesu Kristu.

⁴ Siyazi, bazalwane abathandiweyo nguNkulunkulu, ukuthi uNkulunkulu ulikhethile lina,

⁵ lokuthi ivangeli lethu kalifikanga kini ngelizwi kuphela, kodwa lafika futhi ngamandla, langoMoya oNgcwele, langokuthemba okukhulu; ngoba liyazi ukuthi sasingabantu abanjani phakathi kwenu ngenxa yenu.

⁶ Lani lalingisa thina leNkosi; ekuhluphekeni okukhulu selilamukele ilizwi ngokuthokoza kukaMoya oNgcwele,

⁷ laze laba yisibonelo kubo bonke abakholwayo baseMakedoniya laseAkaya.

⁸ Ngoba udumo lwelizwi leNkosi lwaphuma kini, lwafika, kangitsho eMakedoniya laseAkaya kuphela, kodwa lasezindaweni zonke lapho ukukholwa kwenu kuNkulunkulu kwafinyelela khona. Ngakho kakusadingeki ukuba sikhulume ulutho.

⁹ Ngoba bona uqobo lwabo balandisa ngathi ukuthi kwaba njani ukufika kwethu kini, lokuthi laphendukela kuNkulunkulu litshiya izithombe, ukuba likhonze uNkulunkulu ophilayo weqiniso,

¹⁰ lilindele iNdodana yakhe ivela ezulwini, ayivusa kwabafileyo, uJesu osophula olakeni oluzayo.