1 AbaseKhorinte 15 - iBhayibhili Elingcwele 1978

Ukuvuka kwabafileyo

¹ Bazalwane, ngithanda ukulikhumbuza ngevangeli engalitshumayeza lona, lelalamukelayo lelimi kulo,

² lelisiliswa ngalo uba libambelela kulo, uba kambe lingakholwanga ize.

³ Okokuqala ngalinika lokho engakwamukelayo okukuthi uKristu wafela izono zethu njengokwemibhalo,

⁴ lokuthi wambelwa, lokuthi wavuswa kwabafileyo ngosuku lwesithathu njengokwemibhalo,

⁵ lokuthi wabonakala kuKefasi, wasebonwa ngabalitshumi lambili.

⁶ Ngemva kwalokho wabonakala ngesikhathi sinye kubazalwane abedlula amakhulu amahlanu, ubunengi babo basekhona lalamhla, lanxa abanye sebafa.

⁷ Wabuya wabonakala kuJakobe, wasebonakala lakubaphostoli bonke.

⁸ Ekucineni kwabo bonke wabonakala kimi enginjengozelwe kungakabi yisikhathi.

⁹ Ngoba ngingomncinyane kubaphostoli, engingafanele ukuthiwa ngumphostoli, ngoba ngazingela ibandla likaNkulunkulu.

¹⁰ Kodwa ngomusa kaNkulunkulu ngiyikho lokho engiyikho khona, umusa wakhe kimi kawubanga yize; isibili, ngisebenze kakhulu kulabo bonke; kanti kasimi engasebenzayo, kodwa ngumusa kaNkulunkulu okimi.

¹¹ Ngakhoke loba kuyimi loba kuyibo, sitshumayela ngokunjalo, lakholwa ngokunjalo.

¹² Uba uKristu etshunyayelwa ukuthi uvusiwe kwabafileyo, batsho kanjani abanye phakathi kwenu ukuthi kakukho ukuvuka kwabafileyo na?

¹³ Uba kungekho ukuvuka kwabafileyo, kavuswanga laye uKristu.

¹⁴ Uba uKristu engavuswanga kwabafileyo, ukutshumayela kwethu kuyize, lokukholwa kwenu kuyize.

¹⁵ Lathi sifunyanwa singofakazi bamanga ngoNkulunkulu, ngoba safakaza ukuthi uNkulunkulu wamvusa uKristu; kodwa yena engamvusanga, uba kanti abafileyo bengavuswa.

¹⁶ Ngoba uba abafileyo bengavuswa, kavuswanga laye uKristu.

¹⁷ Uba uKristu engavuswanga, ukukholwa kwenu kuyize, lisesezonweni zenu.

¹⁸ Lalabo asebafa bekuKristu sebaphela.

¹⁹ Uba singabathembela kuKristu kulokhukusila kuphela, singabokukhalelwa kulabantu bonke.

²⁰ Kodwake uKristu wavuswa isibili kwabafileyo, waba yingqabutho yabafileyo.

²¹ Ngoba lokhu ukufa kweza ngomuntu, ukuvuka kwabafileyo lakho kweza ngomuntu.

²² Njengalokhu kuAdamu bonke bayafa, ngokunjalo futhi kuKristu bonke bazakuvuswa baphile.

²³ Kodwa yilowo lalowo ngesigaba sakhe, uKristu kuqala, besekusiba ngabakaKristu ekufikeni kwakhe,

²⁴ andubana kufike ukuphela, lapho esenikela umbuso kuNkulunkulu uYise, lalapho esechithile konke ukubusa, lobukhosi, lamandla.

²⁵ Ngoba umele ukubusa, aze abeke izitha zakhe ngaphansi kwenyawo zakhe.

²⁶ Isitha sokucina esizakuchithwa siyikufa.

²⁷ Ngoba izinto zonke uNkulunkulu uzibekile ngaphansi kwenyawo zakhe. Kodwa nxa kuthiwa izinto zonke zibekiwe ngaphansi kwakhe, kusobala ukuthi ungaphandle kwazo yena ozibekileyo izinto zonke ngaphansi kwakhe.

²⁸ Nxa izinto zonke sezibekiwe ngaphansi kwakhe, laphoke layo iNdodana izakuzibeka ngaphansi kwalowo owabeka izinto zonke ngaphansi kwayo, ukuze uNkulunkulu abe yikho konke kukho konke.

²⁹ Pho, bazakwenza njani ababhaphathizelwa abafileyo na? Uba abafileyo bengavuki isibili, babhaphathizelwani ngenxa yabo na?

³⁰ Futhi sizifakelani thina engozini izibanga zonke na?

³¹ Bazalwane, ngiyaqinisa ngokuziqhenya kwami ngani engilakho ngoKristu Jesu iNkosi yethu ukuthi ngiyafa insuku zonke.

³² Uba ngalwa lezilo eEfesu, njengokutsho kwesaga sabantu, ngazuzani na? Uba abafileyo bengavuki, asidle sinathe, ngoba kusasa sizakufa.

³³ Lingakhohliswa; ukujwayelana lababi kuyonakalisa ukuziphatha okuhle.

³⁴ Phaphamani ngokufaneleyo, lingoni futhi; ngoba abanye kabamazi uNkulunkulu; ngitsho lokhu ukuba libe lenhloni.

³⁵ Kodwa omunye uzakuthi: Abafileyo bavuswa kanjani, bazakuba lemizimba enjani?

³⁶ Wena siphukuphukundini! Lokho okuhlanyelayo wena kakuphili uba kungafi.

³⁷ Futhi lokho okuhlanyelayo kawuhlanyeli umzimba ozakuba khona, kodwa uhlanyela uhlamvu oluze, loba olwebele, ingabe olokunye nje.

³⁸ Kodwa uNkulunkulu ulunika umzimba njengokuthanda kwakhe, ileyo laleyo inhlanyelo owayo umzimba.

³⁹ Inyama yonke kayisiyo yohlobo lunye, kodwa ikhona enye engeyabantu, enye engeyezinyamazana, enye eyenyoni, lenye eyenhlanzi.

⁴⁰ Ikhona lemizimba yasezulwini lemizimba yasemhlabeni; kodwa inkazimulo yeyasezulwini iyodwa, lenkazimulo yeyasemhlabeni iyodwa.

⁴¹ Iyodwa inkazimulo yelanga, lenkazimulo yenyanga iyodwa, leyezinkanyezi iyodwa; enye inkanyezi yahlukile kwenye inkanyezi ngokukhazimula.

⁴² Kunjaloke ngokuvuka kwabafileyo. Okuhlanyelwayo kulokubola, kuyavuswa kungelakubola;

⁴³ kuhlanyelwa kulokudelwa, kuvuswe kulenkazimulo; kuhlanyelwa kulobuthakathaka, kuvuswe kulamandla;

⁴⁴ kuhlanyelwa kungumzimba wemvelo, kuvuswe kungumzimba womoya. Uba ukhona umzimba wemvelo, kukhona lowomoya.

⁴⁵ Ngakho kulotshiwe ukuthi: Umuntu wokuqala uAdamu waba ngumuntu ophilayo; uAdamu wokucina waba ngumoya ophilisayo.

⁴⁶ Kodwa okokuqala kakusikho okomoya kodwa kungokwemvelo; besekusiza okomoya.

⁴⁷ Umuntu wokuqala wavela emhlabeni, ungowomhlabathi; umuntu wesibili wavela ezulwini.

⁴⁸ Njengoba enjalo owayengowomhlabathi, banjalo labo abangabomhlabathi; lanjengoba enjalo ongowasezulwini, banjalo labo abangabasezulwini.

⁴⁹ Futhi njengoba silesimo somuntu ongowomhlabathi, sizakuba lesimo somuntu wasezulwini.

⁵⁰ Ngithi, bazalwane, inyama legazi kakulakudla ilifa lombuso kaNkulunkulu; lokubola kakulidli ilifa lokungaboli.

⁵¹ Khangelani, ngilitshela imfihlakalo. Kasiyikufa sonke, kodwa sizakuphendulwa sonke

⁵² ngesikhatshana, ngokuqwayiza kwelihlo, ekukhaleni kophondo lokucina; ngoba uphondo luzakukhala, abafileyo bazakuvuswa bengelakubola, thina sizakuphendulwa.

⁵³ Ngoba lokhu okubolayo kumele ukwambatha okungaboliyo, lalokho okufayo kumele ukwambatha okungafiyo.

⁵⁴ Nxa lokho okubolayo sekwambethe okungaboliyo, lalokho okufayo sekwambethe okungafiyo, kuzagcwaliseka okulotshiweyo kokuthi: Ukufa kuginyiwe ekunqobeni.

⁵⁵ Kufa, kungaphi ukunqoba kwakho na? Kufa, lungaphi udonsi lwakho na?

⁵⁶ Udonsi lokufa yisono; lamandla esono ngumlayo.

⁵⁷ Kodwa kabongwe uNkulunkulu osinika ukunqoba ngeNkosi yethu uJesu Kristu.

⁵⁸ Ngakhoke, bazalwane abathandekayo, manini, lingasikinyeki, likhuthale kakhulu emsebenzini weNkosi, lazi ukuthi ukusebenza kwenu kakusilo ize eNkosini.