1 AbaseKhorinte 14 - iBhayibhili Elingcwele 1978

Isiphiwo sokutshumayela sidlula esokukhuluma ngendimi

¹ Nxwanelani uthando, lifise kakhulu iziphiwo zomoya, ikakhulu ukuba litshumayele.

² Ngoba okhuluma ngendimi kakhulumi ebantwini, kodwa ukhuluma kuNkulunkulu; ngoba kakho omuzwayo, kodwa ukhuluma imfihlakalo ngomoya.

³ Otshumayelayo ukhuluma ebantwini amazwi okuba abakhe, abakhuthaze, abaduduze.

⁴ Okhuluma ngendimi uyazakha yena, kodwa otshumayelayo wakha ibandla.

⁵ Ngiyathanda ukuba likhulume ngendimi lonke, kodwa kakhulu ukuba litshumayele. Otshumayelayo mkhulu kulokhuluma ngendimi, uba engachasisi, ukuze ibandla lakheke.

⁶ Phoke, bazalwane, uba ngifika kini ngikhuluma ngendimi, ngizalisiza ngani, uba ngingakhulumi kini ilizwi lokwambulela, loba elokwazi, loba elokutshumayela, ingabe elokufundisa, na?

⁷ Lezinto ezingelakusila ezikhalayo ezinjengomhlanga, loba ichacho, uba zingakhali ngokwehlukeneyo, kuzakwaziwa kanjani okutshaywayo na?

⁸ Uba uphondo lukhala ngelizwi elingaqondakaliyo, ngubani ozakuzilungisela ukulwa na?

⁹ Kunjaloke lani, uba lingakhulumi amazwi acacileyo, kuzakwaziwa kanjani okukhulunywayo na? Ngoba lizakuba likhuluma umoya nje.

¹⁰ Kukhona indimi ezinengi emhlabeni, kodwa kalukho olungatsho lutho.

¹¹ Ngakhoke uba ngingalwazi ulimi, ngizakuba ngowezizweni kulowo okhulumayo, lalowo okhulumayo uzakuba ngowezizweni kimi.

¹² Lanike, lokhu litshisekela iziphiwo zomoya, zamani ukuba libe lalezo kakhulu ezakhayo ibandla.

¹³ Ngakhoke okhulumayo ngendimi kakhulekele ukuba abe lamandla okuchasisa.

¹⁴ Uba ngikhuleka ngendimi kukhuleka umoya wami, kodwa ingqondo yami kayilasithelo.

¹⁵ Pho, ngenza njani na? Ngizakukhuleka ngomoya, futhi ngizakukhuleka langengqondo. Ngizakuhlabelela ngomoya, futhi ngizakuhlabelela langengqondo.

¹⁶ Uba kungenjalo, nxa ubonga ngomoya, lowo ongafundanga angatsho kanjani ukuthi Ameni ekubongeni kwakho, lokhu engakwazi okutshoyo na?

¹⁷ Ngoba impela ubonga kuhle, kodwa lowo omunye kakheki.

¹⁸ Ngiyambonga uNkulunkulu ngoba mina ngikhuluma ngendimi kakhulu kulani lonke;

¹⁹ kodwake ebandleni ngingathanda ukukhuluma amazwi amahlanu ngengqondo yami, ukuze ngifundise abanye, kulokuba ngikhulume ngendimi amazwi ayizinkulungwane ezilitshumi.

²⁰ Bazalwane, lingabi ngabantwana ngengqondo zenu; kanti ebubini wobani msulwa njengezingane, kodwa ekunakaneni libe ngabakhulileyo.

²¹ Emlayweni kulotshiwe ukuthi: Ngabantu bezinye indimi, langomlomo wabezizwe, ngizakukhuluma kulesisizwe; kodwa loba kunjalo kabayikungizwa, kutsho iNkosi.

²² Ngakhoke indimi ziyisibonakaliso kwabangakholwayo, kungesikho kwabakholwayo; kanti ukutshumayela kuyisibonakaliso kwabakholwayo, kungesikho kwabangakholwayo.

²³ Ngakhoke uba ibandla lonke libuthene ndawonye, bonke bakhulume ngendimi, besekungena abangafundanga loba abangakholwayo, kabazukuthi liyahlanya na?

²⁴ Kodwa uba bonke betshumayela, kungene ongakholwayo loba ongafundanga, uzakuhlatshwa yibo bonke, ahlolwe yibo bonke;

²⁵ okufihliweyo kwenhliziyo yakhe kuyadalulwa; njalo uzakuwa ngobuso phansi akhonze uNkulunkulu, aqinise ukuthi uNkulunkulu uphakathi kwenu.

Indlela yokukhonza kwebandla

²⁶ Phoke, bazalwane? Nxa libuthana, ilowo lalowo uba lehubo, loba isifundiso, loba isambulelo, loba ulimi, ingabe ukuchasisa ulimi; konke kakwenzelwe ukwakhiwa kwebandla.

²⁷ Uba umuntu ekhuluma ngendimi, kakube ngababili ingabe abathathu, badedelane, omunye achasise;

²⁸ kodwa uba kungekho ochasisayo, kathule ebandleni, azikhulumele yedwa lakuNkulunkulu.

²⁹ Abatshumayelike, kukhulume ababili loba abathathu, abanye bahlolisise okutshiwoyo;

³⁰ uba kusambulelwa ulutho komunye ohlezi khona, kathule owokuqala.

³¹ Ngoba lingatshumayela lonke ngamunye, ukuze bafunde bonke, bakhuthazwe bonke.

³² Imimoya yabatshumayeli iyathobela abatshumayeli;

³³ ngoba uNkulunkulu kasuye uNkulunkulu wesiphithiphithi kodwa ungowokuthula. Njengoba kunjalo emabandleni wonke abangcwele,

³⁴ abesifazana kabathule emabandleni; ngoba kabavunyelwa ukuba bakhulume; kodwa kabazithobe, njengokutsho komlayo.

³⁵ Uba bethanda ukwazi ulutho, kababuze kubomkabo emakhaya; ngoba kulihlazo ukuba owesifazana akhulume ebandleni.

³⁶ Kanje ilizwi likaNkulunkulu lavela kini yini, kumbe lafika kini lodwa na?

³⁷ Uba umuntu esithi ungumtshumayeli, loba ungowomoya, kaqonde ukuthi lokhu engililobela khona kungumlayo weNkosi.

³⁸ Uba umuntu engakwazi lokhu, kahlale engaziwa.

³⁹ Ngakhoke, bazalwane, tshisekelani ukutshumayela, lingakuvimbeli ukukhuluma ngendimi.

⁴⁰ Kodwa konke kakwenziwe ngemfanelo langendlela.