1 AbaseKhorinte 12 - iBhayibhili Elingcwele 1978

Iziphiwo zikaMoya ezehlukeneyo

¹ Mayelana leziphiwo zokomoya, bazalwane, kangithandi ukuba lingazi.

² Liyazi ukuthi lapho lalisengabezizwe, laholelwa ezithombeni eziyizimungulu, langaziphi indlela elaholelwa ngazo.

³ Ngakhoke ngiyalazisa ukuthi kakho umuntu okhuluma ngoMoya kaNkulunkulu ongathi: Kathukwe uJesu. Futhi kakho umuntu ongathi uJesu uyiNkosi; kuphela ngaye uMoya oNgcwele.

⁴ Kukhona iziphiwo ezehlukeneyo, kodwa uMoya munye.

⁵ Kukhona izinkonzo ezehlukeneyo, kodwa iNkosi yinye.

⁶ Kukhona imisebenzi yamandla eyehlukeneyo, kodwa munye uNkulunkulu osebenza konke kibo bonke.

⁷ Kodwa ilowo lalowo uphiwa okubonakalisa uMoya kube ngokokusiza.

⁸ Omunye uphiwa ngoMoya ukukhuluma ngokuhlakanipha, omunye aphiwe ilizwi lokwazi ngaye lowoMoya,

⁹ omunye aphiwe ukukholwa ngalowoMoya, lomunye aphiwe iziphiwo zokusilisa ngaye uMoya lowo,

¹⁰ omunye aphiwe ukwenza izimangaliso, omunye aphiwe ukutshumayela, omunye aphiwe ukwahlukanisa omoya, lomunye ukukhuluma indimi ngendimi, lomunye ukuchasisa indimi.

¹¹ Konke lokho kungumsebenzi walowoMoya munye, ebabela ilowo lalowo njengokuthanda kwakhe.

¹² Ngoba njengoba umzimba umunye kodwa ulezitho ezinengi, loba zizinengi, zonke zingumzimba munye, kunjaloke loKristu.

¹³ Ngoba ngoMoya munye thina sonke sabhaphathizwa sibe mzimba munye, loba singabaJuda loba singamaGriki, loba siyizigqili loba singabakhululekileyo. Thina sonke sanathiswa Moya munye.

¹⁴ Umzimba kawusiso isitho sinye kodwa ungezinengi.

¹⁵ Uba unyawo lusithi: Lokhu ngingesisandla, kangisikho okomzimba; lokho kungeze kwalwenza ukuba lungabi yikho okomzimba.

¹⁶ Uba indlebe isithi: Lokhu ngingesilo ilihlo, kangisikho okomzimba; lokho kungeze kwayenza ukuba ingabi yikho okomzimba.

¹⁷ Uba umzimba wonke ubuyilihlo, ngabe kungaphi ukuzwa na? Uba umzimba wonke ubuyindlebe, ngabe kungaphi ukunuka na?

¹⁸ Kodwake uNkulunkulu umisile izitho zonke emzimbeni, yileso laleso njengokuthanda kwakhe.

¹⁹ Uba zonke beziyisitho sinye, umzimba ngabe ungaphi na?

²⁰ Kodwake izitho zinengi, kanti umzimba munye.

²¹ Ilihlo kalilakutsho esandleni ukuthi: Kangikudingi wena. Futhi lekhanda kalilakutsho enyaweni ukuthi: Kangikudingi wena.

²² Impela lezozitho zomzimba ezikhangeleka zibuthakathaka kulezinye ziyadingeka;

²³ lalezozitho zomzimba esithi zidelelekile kulezinye, yizo esizazisa kakhulu; lezitho zethu esilenhloni ngazo siziphatha ngokuhlonipheka okukhulu.

²⁴ Kanti izitho zethu ezilesimo esihle kazikudingi lokho. Kodwa uNkulunkulu wawuhlanganisa umzimba, enika ingxenye edelelekileyo yomzimba udumo olukhulu,

²⁵ ukuze kungabi khona ukwahlukana emzimbeni, kodwa ukuze izitho zonke zomzimba zinanzelelane ngokufananayo.

²⁶ Uba kuhlupheka isitho sinye, zonke zihlupheke kanye laso; uba kudunyiswa sibe sinye, zonke zijabule kanye laso.

²⁷ Linake lingumzimba kaKristu lezitho zakhe ngamunye.

²⁸ UNkulunkulu umisile abathile ebandleni; kuqala abaphostoli, okwesibili abaprofethi, okwesithathu abafundisi, besekusiba abenzi bezimangaliso, besekusiba abasilisayo, labasizayo, labaphathi, labakhuluma ngendimi ezehlukeneyo.

²⁹ Bonke bangabaphostoli na? Bonke bangabaprofethi na? Bonke bangabafundisi na? Bonke bayazenza izimangaliso na?

³⁰ Bonke baleziphiwo zokusilisa na? Bonke bakhuluma ngendimi na? Bonke bangachasisa na?

³¹ Kodwa fisani kakhulu iziphiwo ezingcono. Ngizakulitshengisa indlela eyiyona inhle kakhulu.