1 AbaseKhorinte 11 - iBhayibhili Elingcwele 1978

¹ Ngilingisani, njengokuba lami ngilingisa uKristu.

Isambatho sowesifazana enkonzweni

² Ngiyalibonga ngoba lingikhumbula ezintweni zonke, libambelele ezifundisweni engalinika zona.

³ Kodwa ngithanda ukuba lazi ukuthi inhloko yawo wonke amadoda nguKristu, lenhloko yowesifazana yindoda yakhe, lenhloko kaKristu nguNkulunkulu.

⁴ Uba indoda ikhuleka loba itshumayela, ikhanda layo limbomboziwe, ilithela ihlazo ikhanda layo.

⁵ Kodwa ilowo lalowo owesifazana osuka akhuleke ingabe atshumayele, ikhanda lakhe lingambomboziwanga, ulithela ihlazo ikhanda lakhe; ngoba lokhu kufanana lokuthi ikhanda lakhe liphuciwe.

⁶ Uba owesifazana engagubuzeli, kagele. Kodwa uba kulihlazo kowesifazana ukugela ingabe ukuphuca, kagubuzele.

⁷ Indoda kayifanele ukumbomboza ikhanda, ngoba ingumfanekiso lodumo lukaNkulunkulu; kodwa owesifazana uludumo lwendoda.

⁸ Ngoba indoda kayivelanga kowesifazana, kodwa owesifazana wavela endodeni.

⁹ Indoda kayidalelwanga owesifazana, kodwa owesifazana wadelelwa indoda.

¹⁰ Ngakhoke owesifazana kufanele athwale ekhanda lakhe uphawu lwamandla ngenxa yezithunywa.

¹¹ Kantike eNkosini owesifazana kasilutho ngaphandle kwendoda, lendoda kayisilutho ngaphandle kowesifazana;

¹² ngoba njengalokho owesifazana wavela endodeni, ngokunjalo indoda izalwa ngowesifazana; lakho konke kuvela kuNkulunkulu.

¹³ Ziboneleni lina ngokwenu; kufanele yini ukuba owesifazana akhuleke kuNkulunkulu engambombozanga ikhanda lakhe na?

¹⁴ Imvelo uqobo lwayo kayilifundisi yini ukuthi uba indoda ilenwele ezinde, kulihlazo kuyo,

¹⁵ kodwa uba owesifazana elenwele ezinde, kakusudumo kuye na? Ngoba uphiwe inwele ukuba zibe yisimbombozo sakhe.

¹⁶ Kodwa uba umuntu ethanda ukuphika inkani, kasilawo umkhuba onjalo thina, lamabandla kaNkulunkulu kawalawo.

¹⁷ Kodwa nxa ngililaya ngalokhu, kangilibongi ngoba libuthana kungesikho ngokuhle kodwa ngokubi.

¹⁸ Okokuqala, nxa libuthana ebandleni, ngizwa kuthiwa kukhona ukwahlukana phakathi kwenu; nganxanye ngiyakukholwa lokhu.

¹⁹ Ngoba kufanele ukuba kube khona ukwahlukana phakathi kwenu ukuze labo abaqinisileyo babonakale.

²⁰ Ngakhoke nxa libuthana ndawonye, kakusikho ukudla isidlo seNkosi lokho;

²¹ ngoba ekudleni kwenu, ilowo lalowo uqalela abanye ukudla okwakhe, omunye ulambile, lomunye udakiwe.

²² Kanti kalilazo izindlu zokudlela lezokunathela na? Kumbe lidelela ibandla likaNkulunkulu, liyangise abangabayanga kulo na? Ngizakuthini kini na? Ngilibonge na? Atshi! Kangilibongi.

Indlela yokuphatha isidlo seNkosi

²³ Ngoba mina ngakwamukela eNkosini lokho, engalinika khona, ukuthi iNkosi uJesu, ngalobobusuku eyanikelwa ngabo, yasithatha isinkwa,

²⁴ isibongile yasihlephuna, yathi: Lokhu kungumzimba wami ohletshunelwa lina; lokhu kwenzeni ukuba lingikhumbule.

²⁵ Ngokunjalo yathatha inkezo sebedlile, yathi: Inkezo le iyisivumelwano esitsha egazini lami; lokhu kwenzeni ngezikhathi zonke eliyinatha ngazo ukuba lingikhumbule.

²⁶ Ngoba nxa lisidla lesisinkwa, liyinatha linkezo, litshumayela ukufa kweNkosi ize ifike.

²⁷ Ngakhoke lowo odla lesisinkwa, anathe inkezo yeNkosi ngokungafanelanga, ulecala lokona umzimba legazi leNkosi.

²⁸ Umuntu ake azihlole, andubana adle lesisinkwa, anathe linkezo.

²⁹ Ngoba odlayo anathe ngokungaqedisisi umzimba weNkosi uzidlela azinathele ukulahlwa.

³⁰ Ngenxa yalokhu banengi kini ababuthakathaka labagulayo, labanye sebefile.

³¹ Kodwa uba besizihlolisisile thina, besingayikuthonisiswa.

³² Kodwa nxa sithonisiswa, siyatshaywa yiNkosi, ukuze singalahlwa kanye lomhlaba.

³³ Ngakhoke, bazalwane, nxa libuthana ukuba lidle, kalibomelelana.

³⁴ Uba omunye elambile kabokudla ekhaya ukuze lingabuthaneli ukulahlwa. Okuseleyoke ngizakukulungisa mhla ngifikayo.