1 AbaseKhorinte 10 - iBhayibhili Elingcwele 1978

Lingalwi loNkulunkulu njengabakoIsrayeli

¹ Ngithanda ukuba liqedisise, bazalwane, ukuthi okhokho babengaphansi kweyezi, bonke badabula ulwandle;

² bonke babhaphathizwa kuMose eyezini lasolwandle;

³ bonke badla ukudla kunye komoya;

⁴ bonke banatha ukunatha kunye komoya; ngoba banatha edwaleni lomoya elahamba labo; lelodwala lalinguKristu.

⁵ Kodwa ubunengi babo uNkulunkulu wayengathokozi ngabo; ngoba bachithwa enkangala.

⁶ Lezizinto ziyisixwayiso kithi, ukuba singafisi okubi, njengalokhu bona bakufisa.

⁷ Lingabi ngabakhonza izithombe njengabanye babo, njengokulotshiweyo kokuthi: Abantu bahlala phansi ukuba badle, banathe, basukuma ukuba bagide.

⁸ Asingenzi ukuphinga njengabanye babo abenza ukuphinga, bafa ngasuku lunye baba zinkulungwane ezingamatshumi amabili lantathu.

⁹ Asingayilingi iNkosi njengabanye babo bayilinga, babhujiswa zinyoka.

¹⁰ Lingasoli njengabanye babo basola, babhujiswa ngumbulali.

¹¹ Lezizinto zabehlela bona kube yisixwayiso kwabanye; zalotshelwa ukusilaya thina osekufike kithi ukucina kwesikhathi.

¹² Ngakhoke lowo osuka athi umi, kaqaphele ukuba angawi.

¹³ Kalifikelwanga yikulingwa okungejwayelekanga ebantwini. UNkulunkulu uthembekile, kayikuvuma ukuba lilingwe ngokungaphezu kwamandla enu; kodwa nxa ukulingwa kufika, uzakulinika indlela yokuphepha, ukuze libe lamandla okukuthwala.

Lingakhonzi izithombe

¹⁴ Ngakhoke, bathandiweyo bami, balekelani ukukhonza izithombe.

¹⁵ Ngikhuluma njengakwabahlakaniphileyo; qedisisani engikutshoyo.

¹⁶ Inkezo yesibusiso esiyibusisayo kasiyo eyokuhlanganyela egazini likaKristu na? Isinkwa esisihlephunayo kasiso esokuhlanganyela emzimbeni kaKristu na?

¹⁷ Njengoba isinkwa sisinye, thina esibanengi singumzimba munye, ngoba thina sonke sihlanganyela lesosinkwa sinye.

¹⁸ Khangelani isizwe sakoIsrayeli. Abadlayo imihlatshelo kabasibo abahlanganyela lealtare na?

¹⁹ Ngitshoni pho? Ngitsho ukuthi okuhlatshelwe izithombe kuyilutho na? lokuthi isithombe siyilutho na?

²⁰ Atshi, ngitsho ukuthi lokho okuhlatshwa ngabezizwe bakuhlabela omoya ababi, kabakuhlabeli uNkulunkulu. Kangithandi ukuba libe lenhlanganyelo lomoya ababi.

²¹ Lingenathe inkezo yeNkosi lenkezo yomoya ababi; lingehlanganyele isithebe seNkosi lesithebe somoya ababi.

²² Sizakuyivusa ulaka iNkosi na? Kambe silamandla kulayo na?

²³ Izinto zonke zivumelekile, kodwa izinto zonke kazisizi; izinto zonke zivumelekile, kodwa izinto zonke kazakhi.

²⁴ Kakungabi khona ozifunela okwakhe, kodwa kakube yilowo lalowo afune ukwenzela omunye okuhle.

²⁵ Konke elikuthenga esilaheni kudleni, lingabuzi lutho ngenxa yesazela,

²⁶ ngoba umhlaba ungoweNkosi, lakho konke okukuwo.

²⁷ Uba omunye kwabangakholwayo elimemela ekudleni, lithanda ukuya, kudleni konke okubekwa phambi kwenu, lingabuzi lutho ngenxa yesazela.

²⁸ Kodwa uba umuntu esithi kini: Lokhu kuhlatshelwe izithombe; lingakudli ngenxa yalowo okutshiloyo langenxa yesazela;

²⁹ kangitsho esakho isazela, ngitsho esalowo omunye. Kodwa lizakuthi: Kungani ukuba inkululeko yami isolwe yisazela somunye na?

³⁰ Uba ngisidla ngokubonga, ngisolelwani ngalokho engikubongayo na?

³¹ Ngitsho ukuthi loba lisidla, loba linatha, loba lisenzani, konke kwenzeleni udumo lukaNkulunkulu.

³² Lingakhubekisi abaJuda, lamaGriki, lebandla likaNkulunkulu.

³³ Minake ngizama ukuthokozisa bonke ngakho konke engikwenzayo, ngingafuni okokuzisiza mina, kodwa ngifuna okokusiza abanengi ukuze basiliswe.