အွန်လိုင်း သမ္မာကျမ်းစာ

Yàkubà 3 - Bible Dzùùngoo Unicode

Nɛɛ̀n raa goò

¹ N neema ì, mòò giri mà bà e ɲan kàrànfa waa. Tɔ̀ mà fa waa, kàtsu ɲe nìì reè kàr'nà sìan, ɲe raa kitsia nà xɔbe, è geren dzyee rèè raà tsɛ.

² Mùn sapɛ fìr'la fau'n kuru gir'la. Mòò riì na fir'la goomaa kàjaa tsɛ fyeu, tɔ mòdzin dziitsyɛunma, è bà dzia dzi e gɔɔ̀n ko e kur'la sapɛ ra.

³ Mùn kààfiri wɔɔ̀ shù rèè dzu, gè riì ni à to, yè mùn sàò fa. Tà tsuru, mùn dzia è gɔɔ̀n ko e kur'la lakere be kàjaa sapɛ tsɛ.

⁴ Ye e kɛsɛ konkoron bla bla reè sa ma siin. È ko e blabee sa, fyɛn bla yeè bà è tèn beè, gèèrii rìì saabu ɲan, à vwɛ̀ynbaà y'à jaa ji beè e jaa ra gane ɲan.

⁵ Tɔ̀ soo tsuru, nɛɛ̀n gɔɔ̀n gàne kiɲaanin nì, ŋà à goo bla bla ì dèe, è tɔ̀ ka e yɛrɛ blabe. Sàà siin nèe, à kiɲaanin nì tu brìsi dzua.

⁶ Nɛɛ̀n sa sà rìì. À tsyɛɔ̀n ɲaan nà. À ni mùn gɔɔ̀n gàne rèè fi, è bà mùn gɔɔ̀n ko e kur'la sapɛ noo. À mùn ne jaamabee sapɛ dzua ko sà ka, sà rìi boo jààndamaan yɛ̀r'la doùn.

⁷ Jòònshua kuan sapɛ, ko kɛ̀yn neè, ko gè nìì reè yè e ger'na e don tsɛ, ko yuun ge reè kuan sapɛ, adamàdzin mòdzin yeè è kor'na, à to yè koroòn.

⁸ Ŋà nɛɛ̀n, mòò pɛn na dzia tɔ̀ koron waa. À gè ɲaun tsìì bɛy rii, è bà tsyɛɔ̀n mòdzìn vua bàà rà.

⁹ Mùn wò rii ka tsoo dzi ɲɛɛn mùn Tsìfa Ŋaablà tsɛ, mùn Fàà. Mìn sèè kɔn m'a ka dzwɛ ɲaan jia mòdzian nà, Ŋaabla twɛy nìì reè ɲɛun e bosi.

¹⁰ Dzwɛ wùɔ, ko dzwɛ ɲaan sapɛ boò tɔ̀ dzii soo rìì doùn. N neema ì, à na wù è bà tà tsuru waa.

¹¹ Yu dziù ko yu màaŋma sa dzia dzyèè bo yu shi soo rè ò ?

¹² N neema ì, fiigiku ni dzi olividzin ì wɔ ɔ ? Ɛ̀rɛ̀nzhɛ̀nku to ni dzi fiigidzin ì wɔ ɔ ? Kòòyua tsu na dzia yu tsiin bo waa.

Akiriblabe rìi daɔn è bo Ŋaablà re

¹³ Tsì rii ni ye ɲan è b'a jàa ci wò akiri blà, è bà dzi ? À tsìfa yè e faadziɛ ka à kpàdè e fau'n kuru wuɔ saabu rɔ̀n. È vununmacin ka à kpàdè ci wò akiri blà.

¹⁴ Ŋà jaaɲininbe ɲaun, ko si sɔɔn nì ye ba ni e duùn, e maà e yɛrɛ blabe, ye doò ka sààbeen bara waa. Tɔ̀ na akiriblabe waa.

¹⁵ Tɔ̀ akiri tsuà na daɔn è bo jìrànxɔ rɔ̀n waa. À dzɔ̀nxɔɔ̀ tsɛ raà rìì, mòdzin neè raà, Sùtan'naà.

¹⁶ Jaaɲininbeè ko si sɔɔn ni min o min, goo gbiimaunma rèè, ko goo ɲaan kaatsià sapɛ bàa ni mɔn nì.

¹⁷ Ŋà akiriblabe rìi daɔn è bo jìrànxɔ rɔ̀n, tɔ ni mòò riì ɲàn, à tsìfa fyɛɔ, à na kaa faa, à vunun ma dzi, à mɔ̀nɲɔɔ̀n, à màtsur'la fɔ è bè geren, faadzii wuu ni à ɲan, à na ɲànkɛrɛn faa, à to na duungoofiitsi.

¹⁸ Nìì reè y'à gaa jaancin yè bà ni, twɛy faagoò faa jaanciàn ɲàn. È to nìi tàr'la à tɔ̀nɔ̀n, tɔ terenbee rìì.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ