အွန်လိုင်း သမ္မာကျမ်းစာ

Yàkubà 2 - Bible Dzùùngoo Unicode

Maà mòò fyanbe mòò mà waa

¹ N neema ì, e ɲɛn niì faɔ̀ mùn Tsìfa Yesù Kirisà rà, blàbee Tsìfaà, tɔ̀ ɲɛynaà doùn, e maà mòò bo mòò ɲàn waa.

² Àwà, mòkun fii tsuru ye be dɔ̀n ye re ŋaablabegbaà doùn, sɛnu daaniin ni soo si ra, vya wùu ì yè bà ni à mà, soo gbakɔɔn, vya nooŋma ì yè bà ni à mà,

³ ye ye vyawuutsià siin, yeè dzin tɔ̀ ra ci: «Wo y'à tsuù nèe tsùùma wùù ree ɲan.» Gbakɔɔn, yeè dzin tɔ̀ ra ci: «Wo y'à tsiì a saàn, tàmafa a tsuù dzɔn nɔ̀n mìin n san dzuun.»

⁴ Tɔ̀ faumaà, ye to na è si fyanbe e si mà fyeu ɔ ? Ŋɛ̀nɛ̀ɲàn ɲaan niì ni ye ɲan, tɔ̀ na ye bà ɲànkɛ̀rɛ̀nfabaa ì fyeu ɔ ?

⁵ N neema ì, mun ye nìì reè kɛ̀niɔ̀n fɔ è bè geren, ye e toro wɔ. Dziɲan dzin nèè nìì reè jàa gbakɔɔn, Ŋaabla twɛy ɲankɛrɛɔ̀n rìì, yè bà gètsi ɲɛynaà kàjaa tsɛ, tà ko è re màsàbe riì làyiri seòn e kɛnbaa rèè rè, yè tɔ̀ tàrà shɛn.

⁶ Ŋà nìi ye, ye gbakɔɔn reè cèù boò. Tsi ì rìì ye xɔn biɛ, yè bà bèe ye ka kitsi kunun neè rè ? À na gètsi rèè ɔ̀ ?

⁷ Yesù tsoo wùù riì ɲɛɔ̀n ye tsɛ, ye rìì na tɔ̀ barabaa rèè gbɛ ?

⁸ E kpɛyn ye ba Ŋaablà re màsàbee shi kpadèuma rèè shi jiɛ a ci à sɛbɛɔ̀n à re Goomaa doùn nìi tsuru ci: «A modzìnsia kɛ̀n jàci a yɛr'la», tɔ̀ fakɔɔn wù e re.

⁹ Ŋà, ye ye ba mòdzian fyanbee e si mà, ye gooɲaan faa tɔ̀ ka, shi kpadèuma rèè to kitsi mɛɛ̀ ye tsɛ, kàtsu ye na è shi jiɛ waa.

¹⁰ Àwà, mòò riì kɛ̀nsɛɛn ye ba shi kpadèuma rèè sapɛ shi jiɛ, à ye dzi soo bara nòn, à y'à dzyeè sapɛ rii barau.

¹¹ À dzyeè sapɛ barau, kàtsu, mòò riì dziun ci: «Maà ɲànmɔ̀ɔ̀be fa waa», tɔ̀ rii dziun kɔn ci: «Maà mòò vu waa.» Tà doùn wo to kɛ̀nsɛɛn ma ɲànmɔ̀ɔ̀be fa, w'e mòò vu, wo to na shi kpadèuma rèè jìì dɛ ?

¹² Tà doùn, shi kpadèuma nìì reè mòò labaà, e goomau'n kur'la ko e goo fau'n kur'la yè kòrò tɔ̀ ka, kàtsu ye nà kitsi ɲɛn tɔ̀ rii tsɛ.

¹³ Mòò riì ma matsuru dzyee rèè rà, Ŋaabla nà kitsia kùnùn tɔ̀ tsɛ, arì à fa màtsuru waa. Àwà màtsur'la rìì kitsia mɛɛ̀.

Faadziɛ wù è ɲɛynaà kpàdè

¹⁴ N neema ì, à fee wùbee mòò mà è dzin ci: «Ɲɛynaà ni mun ne», à to na à kpàdeò e faadziɛ ɲàn waa. Tɔ̀ ɲɛynaà ni dzi à tsi ɔ ?

¹⁵ Àwà neemaa reè swey yè bà ni, kpiri tàmafa tàan, vya wɔràma na ni è re, è ɲɔɔndziɛ tsu to na ni è re waa,

¹⁶ ye sɔn yeè dzin è ra ci: «Ŋaa yè bè e ko xɛɛrɛ tsi, ye vya wɔ, ye mùnkɛɛ̀ bo e ra. Ye ɲwɛyn ɲɔn, ye cɛn.» Wo tɔ̀ sapɛ deè, è màgoo to ni nìi rà, wo na tɔ̀ siɔ̀n è ra waa. Tɔ̀ dzwɛɛ̀ fee wùbee ?

¹⁷ Ɲɛynaà sa tɔ̀ rii tsuru. È ba à bàsɔùn, faadziɛ mà bà ni à ɲan, à saɔn rìì.

¹⁸ Àwà sɔn dzia dzin ci: «Ɲɛynaà ni wo re, faadziɛ yè bà ni mun ne.» Tà doùn, a re ɲɛynaà kpàdè n na, faadzii mà bà ni à ɲan waa, mun sa nà faadziɛ ka n naà kpàdè wo ra.

¹⁹ Wo ɲɛɔ̀n à ra ci Ŋaabla soo. Tɔ wù. Ŋà e b'a tɔ̀ ci kwey rèè sa ɲɛɔ̀n tɔ̀ ra, fɔ è mà yè bà sɔ̀ɔn shiɲaanbeè rè.

²⁰ Mòdzin akiribɛy, wo na à tɔ̀ ci faadziɛ ma ba ni ɲɛynaà ɲàn ci à goo maana ɔ ?

²¹ Ɲe fàbɔɔ Ibraximà do ? À kpàdèu dzùr'li ci à tereòn ? À na à faadziɛ kamà ɔ̀n ? À na e dzin kpiri Ishakà ɲɛn saakabomaà tsɛ ci wo nà à bà saaka ɔ ?

²² W'a jàa kɛ̀, tɔ̀ raa ɲɛynaà ko à faadziɛ sa na ni faagoò rà esire. Faadziɛ rìì baraka ɲan, à re ɲɛynaà bàu goo dziitsyɛunma.

²³ Tà tsuru, Ŋaablà re Goomaa doùn gooma de dɔ̀unma sɔn yeè bo e shi tsɛ, nìi yɛ ci: «Ibraximà ɲɛun Ŋaablà ra, tɔ̀ yeè dan à re terenbe.» Tɔ̀un, è kiri Ŋaablà dzunwɛynsi.

²⁴ Y'a jàa dɛ, Ŋaablà y'a kpàdè ci mòdzian tereòn, tɔ ni faadziɛ sa suun, à na ɲɛynaà bàsɔùn waa.

²⁵ Àwà, tɔ̀ fau'n kuru soo rà, ɲànmɔ̀ɔ̀taan Àràxabù raà sa bàu tɔ̀ rii tsuru. Tɔ̀ sa raa faadziɛ rìì y'à tou, Ŋaablà y'a kpàdè ci à tereòn. Tɔ fau, kàtsu à Isirayɛlidzin neè rè kɛɛra reè ladɔun e re gàne rɔ̀n, è bèkɔɔn, à y'à to yè bo shi kpɛr'le.

²⁶ Tɔ̀ doùn, xɔn ma ba ni gɔɔ̀n rà tɔ bàa saɔn nìi tsuru, faadzii ma ba ni ɲɛynaà ɲàn, tɔ̀ sa bàa saɔn tɔ̀ rii tsuru.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ