အွန်လိုင်း သမ္မာကျမ်းစာ

Ɔ̀rɔ̀mùnka reè 13 - Bible Dzùùngoo Unicode

À wù mìn majàà fàan rè

¹ Àyìwà mòdzian soo sookɔɔn sapɛ yeè e majàà mùn kùùn fàànma tsuuŋma rèè rè. È ɲɛn à tsɛ, fààn pɛn na tsùuŋnà Ŋaablà shɔùn waa, nìì reè to ni, Ŋaablà rii yè è tsùuŋnà.

² È ɲɛn tɔ̀ tsɛ, mòò riì yè e mabaàn fààn mà, tɔ̀ yeè e nɔɔn Ŋaablà devuà rìì mà. Nìì reè to yè e nɔɔn Ŋaablà devuà mà, twɛy nà kitsi mɛɛy e yɛrɛ tsɛ.

³ Àwà, mòò riì wùɔ faa, tɔ̀ shi kun na ni kùntsiɛ̀ jɔun waa, fɔ ɲaanfabaà. E dzin ci a maà shi fàan jɔun, wùɔ fa, à nà wo saan.

⁴ È ɲɛn à tsɛ, à ni Ŋaablà re faagoo rìì là, wo wùbee kamà. A to ye ɲaan fa, shi, kàtsu, kaa mun'nà na ni à suun maana waa. À ni Ŋaablà re faagoò rìì là, à nà wo koron, è tɔ̀ re vununtaà kpàdè gooɲaanfabaà rà.

⁵ Tɔ̀ rii y'à to, à wù mìn majàà fàan rè. À wù mìn majàà à re, è ɲɛn à tsɛ Ŋaablà re vununtaà ni, è bà akir'la goo sa.

⁶ Tɔ̀ soo rìì kamà ye yè bà xɔnsɔɔn sa sar'la. Ye to y'à sàr'la nìì reè rè, twɛy tɔ̀ faagoò faa Ŋaablà re fa rii ɲàn.

⁷ Nìì wù nìi ka, ye tɔ̀ fa tɔ̀ re. Xɔnsɔɔn wù è sìn nìi rà, ye tɔ̀ sìn tɔ̀ ra, siigur'la to wù è sìn nìi rà, ye tɔ̀ sìn tɔ̀ ra. Nìi gàsin wù è tsùù, ye tɔ̀ gàsin tsuù, nìi to wù è blàbe, ye tɔ̀ blàbe.

Mìn kɛ̀nbààbee shi jiì

⁸ Mòò pɛn ne tsìi mà bà ni e ra, fɔ kɛ̀nbààbee tsìɛ̀ e ko e si fi, kàtsu, mòò riì dzyee rèè kɛ̀ɛn, tɔ sàrìyaa ko e kuru dzii tsyɛun.

⁹ È ɲɛn à tsɛ, Ŋaablà dzugooma xɔù nìì reè ci: «Maà ɲànmɔ̀ɔ̀be fa waa, maà mòò vu waa, maà shɔnbe fa waa, maà a jaàn bo mòò rè gè rè waa», ko dzugooma xɔù dzyee rèè sapɛ, tɔ̀ sapɛ ni nèe gooma ree ɲan, nìi yɛ ci: «A modzìnsia kɛ̀n, jàci a yɛr'la.»

¹⁰ Àwà a y'a modzìnsia kɛ̀n, a na ɲaan pɛn faa à ra waa. Tà doùn, kɛ̀nbààbee rìì sàrìyaa ko e kuru dziitsyɛunmaà.

¹¹ Ye tɔ̀ fa, è ɲɛn à tsɛ mùn ni waatsi riì ɲàn dòònuùn, ye tɔ̀ tɔ̀. Waatsi wɔu, ye kpunan bo ciɛ̀ ɲàn, kàtsu mìn tsi, tɔ̀ waatsi tsyɛnbeu mùn na dòònuùn è geren mùn ne ɲɛynaà fa waatsia tsɛ.

¹² Feèn gbànmaun, jisee yè bà tsyɛnbeò. Mìn tsitsii dzuun goo sapɛ bo e ra, mìn vyevyeè kaa faa gè rèè ji e ma.

¹³ Mìn re jaamabee fa fyɛu tsɛ, a ci bwèytaaruɔ̀n ni nìi tsuru. È bà jaamabe, ɲwɛyn ɲɔn na ni nìi ɲàn baragooma, dɔ̀ɔ̀kɔ̀ɔ̀nbe to na ni à ɲan. Ɲànmɔ̀ɔ̀be na ni nìi ɲàn, kɛ̀kɛ̀ɛ̀ybe to na ni à ɲan. Kaa na ni nìi ɲàn, jaaɲininbe to na ni à ɲan.

¹⁴ Ye Tsìfa Yesù Kirisà rìì ji e ma, nìi to gɔɔ̀n raa goo rèè, e maà e yɛrɛ to twɛy suun, y'a kur'la goo ɲaan neè fa waa.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ