အွန်လိုင်း သမ္မာကျမ်းစာ

Ɔ̀rɔ̀mùnka reè 12 - Bible Dzùùngoo Unicode

Ŋaablà blabèù'n kuru dziitsyɛunmaà

¹ Tà doùn, n neema ì, è ɲɛn Ŋaablà re màtsur'la tsɛ, mun ye màxɔ̀ɔn, ci ye e yɛrɛ sin Ŋaablà ra saaka jaama, nìi fɛnɛɔ̀, è bà dzi Ŋaablà ra. Tɔ̀ rii nà bà Ŋaablà blabèù'n kuru taki ye re.

² E maà e raa goo fau'n kur'la ko nèe dziɲan ree raà bà soo waa, ŋà y'a to làkere ye dɔ̀n e re jaamabee doùn akiri ye ka, ye bà ni Ŋaablà saɔ tɔ̀: nìi wù, à dzi à ra, à dzii yè bà tsyɛɔ̀n.

³ È ɲɛn Ŋaa ɲanwùɔ tsɛ mun kàjaa tsɛ, mun nìi dèe e soo sookɔɔn sapɛ ra, tɔ̀ rii yɛ ci mòo mà bà geren ci wò tsuru na ni waa. Ŋà, ye akir'lì tàrà, è kòrò e soo sookɔɔn sapɛ re ɲɛynaà bɛ̀r'la ka, Ŋaablà nìi siɔ̀n, ye e bɛrɛ tɔ.

⁴ Àwà mùn gɔɔ̀n soo pe rii, ŋà à kàjaa giri, è bà kàjaa soo soo sapɛ ko e raa faadzii.

⁵ Tɔ̀ soo tsuru, ɲe sa giri, ŋà Kirisà ɲàn mùn gɔnkungɔ soo rii, mùn soo sookɔɔn sapɛ yeè bà e si gɔɔ̀n gàneè sɔn.

⁶ È kòrò ko Ŋaablà ɲanwùɔ ka, mùn kwɛ̀yge ì tàraɔ̀ nìì reè yè e si e si ra. È ba kɛɛrabe rii fakɔɔn è bo Ŋaablà re, è fa è kòrò ɲɛynaà ka.

⁷ Nìi raà faagoo, tɔ̀ yeè tɔ̀ fa. Nìi raà mòdzìn karan, tɔ̀ yeè mòdzian kàr'na.

⁸ Nìi raà mòdzìn màxɔn, tɔ̀ yeè mòdzian màxɔ̀ɔn. Nìi raà kwɛ̀yfa, tɔ̀ yeè kwɛ̀ɛ faa, à mà e bonè siin waa. Nìi raà jɔundzinbe, tɔ̀ yeè tɔ̀ fa ko sɔ̀bɛ̀nbe ka. Mòò riì màtsur'la, tɔ̀ yeè tɔ̀ fa ko taamadzibe ka.

Jaamabee fau'n kuru wuɔ

⁹ Ye kɛ̀nbààbee fa ko duun fyɛ ka. Ye ɲaan xɔbe e ma, ye e shi wùɔ rà.

¹⁰ Ye e si kɛ̀n, a ci neema ì wù yè e si kɛ̀n nìi tsuru. Ye e si dàn blàbee kàjaa tsɛ.

¹¹ Ye ɲanshì, e maà bà sàànmaan ì waa. Ye faagoò fa Tsìfaà rè ko gɔun ta ka.

¹² E si xɔ nìi tsɛ, ye taama dzibe tɔ̀ ra. Byɛnbee doùn ye e mɔɲɔn, ye e maxɔ̀n màfyɛɛ̀n nà.

¹³ Ŋaablà re mòdzin neè màgoo ni nìi rà, ye è dzwɛ̀ma tɔ̀ ka, ye bà ni tɔnɔn ladɔɔn ɲan tsuù ɲàn.

¹⁴ Nìi reè yè e byɛɛn, ye dzwɛ ji twɛy rà. Ye dzwɛ rìì ji, e maà danga fa waa.

¹⁵ Ye e taamadzibe, taamadzibekɔɔn reè ka, ye gɛyn ko gɛynbaa rèè ka.

¹⁶ Ye byɛ̀n soo ma. Nìi blà e maà tɔ̀ gaa waa, ŋà nìi majaaŋnà, ye tɔ̀ rii gaa. E maà ba akiritsi ì e yɛrɛ jaa ra waa.

¹⁷ E maà mòò pɛn ne ɲaan tsiì sàrà ko ɲaan ka, y'a gaa ye wùɔ rìì fa mòdzian sapɛ jaa ra.

¹⁸ È be dàn e ma, y'a to jaancin yè bà ni e ko mòdzian sapɛ fi, è ba dzia fa.

¹⁹ Mun ne kɛ̀niunma rèè, e maà e yɛrɛ wɛyn bo waa, ŋà ye gàne to Ŋaablà re vununtaà rè, kàtsu, Tsìfaà y'à deò e re Goomaa doùn ci: «Wɛyn boo mun nì naa, mun nì nà tsìì sar'la fa.

²⁰ Ŋà nìi fa, tɔ̀ rii yɛ, dzu ye ba ni a ɲaàn nà, ɲwɛyn sìn à ra, à y'à ɲɔn. Mìnoo to ye ba ni à ra, yu sìn à ra è min. Tà tsuru à nà bà a ci wo sàtsììn taa rii tsùuŋnà à kùùn.»

²¹ Maà à to ɲaan yè dzi tarà a tsɛ waa, ŋà wo rìì yè dzi tarà ɲaan tsɛ, ko wùɔ ka.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ