အွန်လိုင်း သမ္မာကျမ်းစာ

Piyɛrì fiiraa 2 - Bible Dzùùngoo Unicode

Piyɛrì nìi dèu kààmoo doo de reè tsɛ
( Yudè 4-13 )

¹ Àwà kɛɛra doo de reè fùu Ŋaablà re mòò rèè fi nìì tsuru dan, tɔ̀ soo tsuru, kààmoo doo de reè sa nà fù ye fi, nìì reè nà karan ì dɔ̀n ye sàn dzuun, nìi reè doò, yè bà baragoò faa. À nà bè wɔ fɔ yè e nɔn Kùntsiɛ̀ rè, tɔ̀ niì yè è kùngɔ màbou, è to nà e bar'la jaa ka e yɛr'la tabe.

² Mòò giri nà e gban è kpɛyn e re seeybɛybe goo reè doùn. È kamà, Ŋaablà re sààbèn shià tsoo nà bara.

³ È re ɲɛyn goo ɲanbee kamà, è nà ye bà durukun, e re doo kar'neè ka. Fɔ waatsi gbaan è kitsia ni sààn, è bar'la dàn to na gbàn dɛ.

⁴ Àwà, mɛ̀rɛ̀kɛ nìì reè gooɲaan fau, Ŋaablà na twɛy to mɔn waa. À jɔ̀rɔ̀kɔ wɔu è ra, à yè è ji tsitsiì brìsià ɲàn jààndamaan doùn, è ni min niì, yè bà kitsia jisee màshua.

⁵ Nìi dan dziɲaan mòdzin neè, Nuùn bwèy mòdzin neè, à na twɛy tsu to mɔn waa. Twɛy nìi reè na shia Ŋaablà jɔun waa, à ŋaa brìsià bàji nau è tsɛ. Nuùn nìi na terenbee gbango faa, è tɔ̀ ko e re mòò rèè rìì bàsɔùn tsi, è mòkun ŋaalon.

⁶ È kitsi mɛɛy Sodomùn ko Gomɔrɔ̀n wɔ̀ùndzin neè tsɛ, nìi yɛ è dzu kpaan peu, è bà shi. Nìì reè na shia Ŋaablà jɔun waa, è bà ni à kpàdè twɛy waatsi nakɔɔn mòdzin neè rà, nìi nà è tàrà.

⁷ Ŋà Lotsì, è tɔ̀ tsi kàtsu tɔ̀ na mòdzin tereunma, twɛy gooɲaan fa reè rè seeybɛy goo reè yè bà na à xɔn biiŋnà fɔ è bè geren.

⁸ È ɲɛn à tsɛ, è tɔ̀ tereunmaà to è fi, à na nìi jàa tà ko à nìi myɛ̀ɛn è ɲɛn è re ɲaan fakɔɔn tsɛ, jisee sapɛ, tɔ̀ na à xɔn tɔɔrɔɔ̀ fɔ è bè geren.

⁹ Tɔ̀ y'a kpàdèe ci nìì reè shia Ŋaablà jɔun, Tsìfaà twɛy tsiu'n kuru tɔ e byɛɛn goo rèè rà, è bà terenbɛy reè to tsùuŋnà, è bà ni è byɛn kitsia jisee sii sèè.

¹⁰ Gooma na ni nìì reè vwɛ̀ɛ gɔɔn raa goo rèè kpɛyn è ɲɛn è kur'la goo nooŋma rèè tsɛ, yè bà Tsìfaà rè kùntsììbee ɲanfyɛnbee. È kùun xɔ, è blà e yɛr'le, è to yè bà ni jìrànxɔɔ̀ nɔɔrɔ ge reè tsoo bara, tɔ̀ shiɲaanbe na ni è ra.

¹¹ Tɔ̀ to y'à tàrà, arì mɛ̀rɛ̀kɛ nìì reè fàan ko è re dzibaabee blà twɛy mòdzin neè raà mà, twɛy tsu na tɔ̀ tsuru tsoo bara goòmà ì ka kitsi kun'na è tsɛ Tsìfaà jaa dzuun waa.

¹² È mòdzin neè ni a ci dzwɛkà akiribɛy ì, nìì reè kere kùn yɛ, yè kun yè vu. È na nìi tɔ̀ waa, è tɔ̀ rii tsoo bar'la. È sa nà fyee, a ci dzwɛkà rèè fyeè nìi tsuru.

¹³ È ni terenbɛybe rìi rà, tɔ̀ terenbɛybe soo rìì nà ka è sàrà. È dzibee goo rìì yɛ, yè e yɛrɛ sin seeybɛybe goo reè rà bwèytaaruùn fàxe rɔ̀n. È mòdzin nooŋma seeybɛy ì. Yè ba ni ɲwɛyn bla ɲɔɔn nà ye ka waatsi riì bwèy, yè e re sàn fìrì goo reè dzibe boò tɔ̀ bwey.

¹⁴ È jaà tsyɛɔ̀n ɲànmɔ̀ɔ̀beè rìì là, è to na cɛn jàa gooɲaan faa rà. Nìì reè sàn na gbaɔn waa, è twɛy màniɛ̀n, gè ɲɛyn goo to na ɲan è mà. È mòdzin dangauma ì.

¹⁵ È shi tereunmaà bàjiu, yè e gban Bòzɔrì dzin kpiri Bàlaamùn naa shia kpɛyn, terenbɛybee sàr'là dzibeu tɔ̀ niì rà.

¹⁶ Ŋà à re fìr'là dèu à ra. Ɔ̀ɔn, shùkwɛ̀yna, dzwɛkà rìi na goomaa waa, tɔ goomau a ci mòdzin, è tɔ̀ kɛɛraa bo e re akiribɛy shià tsɛ.

¹⁷ Twɛy mòdzin neè ni a ci donkungɔ yu bɛy. È ni a ci ŋaatsi, fyɛn bla nìi sen dɔn bèe. Tsitsiì tsìù bian nì màrà tsùuŋnà è tɛyn.

¹⁸ Gooma bla blaa ni è dzu, dzin to na ni à doùn. Tà tsuru, mòdzin niì reè ni fìr'là gè doùn, nìì reè yè e tsiɔ twɛy rà yeu, è twɛy màniɛ̀n gɔɔ̀n kur'la goo seeybɛyma reè ka, yè è kùnànban.

¹⁹ È dzian è ra ci ye nà è bo jònbee ɲàn, tɔ̀ to y'à tàrà, è sa goo fyeeŋmaà rè jòn. È ɲɛn à tsɛ goo rìi dzi taraɔ̀ a tsɛ, a tɔ̀ re jòn.

²⁰ Àwà, nìì reè tsi boò dziɲaun goo nooŋma rèè ɲàn mùn Tsìfa ko Tsibaa Yesù Kirisà tɔ̀umaà baraka rɔ̀n, twɛy y'a to twɛy goo rèè yè dzi tarà è tsɛ kpɛrɛ, è re goo rèè lataan ɲanbee rìì, è geren jɔ̀naà tsɛ.

²¹ È ma ba na shi tereunmaà tɔ̀u fyeu, tɔ̀ na fyan è mà sani y'à tɔ̀, yè sèè bo Ŋaablà dzugooma xɔù fɛnɛɛ kpɛyn, tɔ̀ niì sìun è ra.

²² Tɔ̀ rii yɛ a ci nèe tàlen nèe rèè, nìi sààben: «Vìà sèeŋ e yɛr'la sòngoò kpɛyn, bɛɛ̀ fòoŋma shɔ̀ùn, è bè e muù bɛr'lɔùn kɔn.»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ

﻿Piyɛrì fiiraa 2 - Bible Dzùùngoo Unicode

Piyɛrì fiiraa 2 - Bible Dzùùngoo Unicode