အွန်လိုင်း သမ္မာကျမ်းစာ

Matsiyù 24 - Bible Dzùùngoo Unicode

Yesù nìi dèu Ŋaablà re gbà blàa ci goo tsɛ
( Marikì 13.1-2 ; Lukì 21.5-6 )

¹ Àyìwà, Yesù yè bo Ŋaablà re gbà blàa doùn tɔ̀un. À bèkɔɔn, à re kàràndzin neè yè e kpɛrɛ̀ à ra, yè gbà blàa jiu'n kur'la kpàdè à ra.

² Tà doùn, è dzin è ra ci: «Ye jaa ni tɔ̀ sapɛ ra ɔ ? Sààben na, mun nì ci e ra, kpàà dzin soo fa to soo tsɛ mìin waa, à sapɛ nà jee bo e si tsɛ.»

Yesù ci goo nìì reè nà fa sani dziɲaan dò bwey
( Marikì 13.3-13 ; Lukì 21.7-19 )

³ Àyìwà, Yesù yè bè tɔ̀un, è bè e tsuù oliviku rèè jèèn tsɛ. À tsùuŋmaà mɔn, à re kàràndzin neè yè e kpɛrɛ̀ à ra e si, yè dzin à ra ci: «Tɔ̀ goò nà fa waatsi riì bwèy, tɔ̀ dè mùn na. Goo rìi to nà bà wo nàà tàànmàshɛn, ko dziɲaan lataan tàànmàshɛn, tɔ̀ sa de mùn na.»

⁴ Yesù yè dzin è ra ci: «Ye e yɛrɛ kaàwɔ, mòò pɛn mà nà e san fìrì waa.

⁵ Mòò giri nà nà mun tsoo ra, ci ye rìì Ŋaablà Jaara Modzìàn, è to nà mòò giri sàn fìrì.

⁶ E ye na kaa goo ɲan gooma reè myɛ̀ɛn waatsi riì bwèy, kaa blà blaa màànkaan yè bà ni, e maà shi waa, fɔ tɔ̀ yeè fa ŋe, ŋà, tɔ̀ fa bà dziɲaan dò bwey ŋe waa.

⁷ Kun ko kun nà fù e si kpɛyn, màsà gane ko màsà gane yeè fù e si kpɛyn, dzuà ko dzɔ̀nxɔ̀ɔ̀mà kpin'na yè bà ni gàne giri.

⁸ Twɛy goo rèè sapɛ nà bà byɛnbee dziikuan nì, a ci ɲìnìnbe riì ni tàan donkunkɔɔn tsɛ.

⁹ È nà ye wɔ mòdzin ì suun, yè byɛnbe ɲɛn ye tsɛ, yè ye vu. Mun tsoò kamà, ye goo nà xɔbe mòdzian sapɛ ma.

¹⁰ Tà doùn, mòò giri nà mɛɛy ɲɛynaà doùn. È nà bo e si kpɛyn, è goo yè xɔbe e si mà.

¹¹ Kɛɛra doodebaa giri to nà fù, yè mòò giri sàn fìrì.

¹² Gooɲaan fàan nà blàbe, fɔ è bè wɔ mòò giri ɲan kɛ̀nbààbe yeè dzyɛ̀nbe.

¹³ Àwà mòò riì sàn gbaunma nà to fɔ è bè suu à lataan dzu, tɔ nà tsi.

¹⁴ Ŋaablà re Màsàbee Kùnàgoo Dziù rèe nà dè dziɲantsiɛ min niì sapɛ, è bà shɛɛrɛbe dziɲantsiɛ kun neè sapɛ re. Tà shɔ̀ùn, dziɲan lataan yè kòmànà wɔ.

¹⁵ Kɛɛra Daniyɛlì "gè cɛnbarabaa kurushiuma" nìi goo dèu, e ye na tɔ̀ tsìiŋma jà Ŋaablà re gbà blàa gànè fɛnɛɛ doùn waatsi riì bwèy, nèe gooma ree kàrànbaà y'à dzin sen !

¹⁶ Tɔ̀ waatsia ye wɔ, nìì reè nà bà ni Yude mar'la ɲàn, twɛy yè vwɛ̀yn be jèn nèè kpàkèrè.

¹⁷ È mòò riì tàrà e re gbàma tsɛ, tɔ mà jàà, ci wo nà gè sen gbàà doùn waa.

¹⁸ À to ye mòò riì tàrà jòon nɔ̀n, tɔ mà dzin ci wo sèè naà, w'e nà e re mɛ̀yɛ blaa sen waa.

¹⁹ Twɛy jisee reè sii sèè, tàan fwɛynma reè ko dzina rèè, à na naà bà byɛnbe san twɛy tsɛ.

²⁰ Ye Ŋaablà mafyɛ̀n, e re vwɛ̀ɛ̀ mà bà mùnkɛɛ̀ waatsia ɲàn waa, à to mà bà ɲànwɔsii mà waa.

²¹ Àwà tɔ nà bà byɛnbe brisi waatsi, nìi tsuru na fa ja ŋe fyeu, è sen fɔ dziɲaan jɔ̀n bwey è nà suu fɔ dòònuùn dzu, à tsuru to yɛ̀rɛ̀ fa fa ja dɛ.

²² Ŋaablà ma ba na sɔn boo twɛy jisee reè rà fyeu, mòò pɛn fa ni tsi waa. Ŋà, à nìì reè boo e jaara, twɛy kamà à sɔn boo twɛy jisee reè rà.

²³ Tà doùn, mòò ye dzin e ra ci: "Ŋaablà Jaara Modzìàn yɛ mìin", tàmafa "à yɛ nuu", e maà ɲɛn tɔ̀ ra waa.

²⁴ E maà ɲɛn tɔ̀ ra waa, kàtsu doodebaa ì nà fù, ci ye rìì Ŋaablà Jaara Modzìàn, doodebaa ì yè fù, ci ye kɛɛra ì. È nà tàànmàshɛn bla bla ì, ko kabagoo goo ì fa, yè bà ni mòdzian sàn fìrì. Arì Ŋaabla nìì reè boo e jaara, yè ba na dzia twɛy sa san fìrì, è na nà tɔ̀ fa.

²⁵ Y'a myɛ̀un dɛ, min toro kɔ̀u nòn !

²⁶ È ye dzin e ra ci: "Ŋaablà Jaara Modzìàn yɛ jènjàà kor'nà doùn," e maà bè mɔn waa. È to ye dzin e ra ci: "À yɛ gbàà jaane mìin", e maà ɲɛn tɔ̀ ra waa.

²⁷ Àwà, ŋaa myɛ̀ɛn nìi tsuru è den bo kir'la rà, è bè fɔ bwèydoo rè, Adamà dziàn nàà sa nà bà tɔ̀ rii tsuru.

²⁸ Gè fuan ye ba ni min niì, dzɔ̀bɔɔ rèè sa yeè e ladzyèe mɔn nì.

²⁹ Àwà, tɔ̀ byɛnbee jisee reè ye dɔn bo min niì, bwèè nà tsitsiì wɔ, kuɔ̀ sa yeè to e vyeè bo bɛy. Ŋaablaxɔɔ̀ rà swɛyn nèè nà mɛɛy, jìrànxɔ rɔ̀n dzibaabe reè sapɛ yeè yuuyuu bo e shɔùn.

³⁰ Tà doùn, Adamà dziàn tàànmàshɛn nà e kpadè ŋaablaxɔɔ̀ rà. Tɔ̀un, dzɔ̀nxɔɔ̀ tsɛ kuan sapɛ nà gɛyn yè Adamà dziàn nàkɔɔn ja mun'na tsɛ, dzi brisi ko nɔɔrɔ brìsi doùn.

³¹ À nà e re mɛ̀rɛ̀kɛ rèè ka vuru blaa fyɛ vuà ka. À nìì reè boo e jaara, yè twɛy ladzyeè dziɲaan nɔ̀nkɔn nààleèn min niì sapɛ, è sen ŋaablaxɔɔ̀ kùngɔ soo rà, è bè fɔ kùngɔ soo rà.»

³² Àwà, Yesù yè geren goomaa rè ci: «Ye nèe goo rèe kaan kɛɛy fiigikuà tsɛ siin: À sààn neè ye e maa yè tsɔɔ gbaa nìi bwèy, ye y'à tɔ̀ɔ tɔ̀ bwèy, ci kpaan tsyɛnbeò.

³³ Tɔ̀ soo tsuru, e ye na twɛy goo rèè sapɛ ja waatsi riì bwèy, ye bà à tɔ̀, ci Adamà dziàn nà waatsia sa tsyɛnbeò, à ni dɔ̀nmàdzii reè rà nòn.

³⁴ Sààben na, mun nì ci e ra, nèe waatsi ree mòdzian sapɛ fa san dò fyeu, twɛy goo rèè sapɛ mà bà faɔ̀ waa.

³⁵ Ŋaablaxɔɔ̀ ko dzɔ̀nxɔɔ̀ sa nà dɔ̀n bo, ŋà mun naa gooma reè, twɛy fa dɔ̀n bo fyeu.

³⁶ Àwà, nìi y'à jisee, ko à waatsia, Fà Ŋaablà soo pe boshɔ̀ùn, mòò pɛn na à tɔ̀. Jìrànxɔ rɔ̀n mɛ̀rɛ̀kɛ rèè na à tɔ̀, Ŋaablà Dzin Kpir'la tsu to na à tɔ̀.

³⁷ Àwà, goo nìì reè fau Nuùn bwèy, twɛy soo rìì nà fa Adamà dziàn nà sii sèè sa.

³⁸ Àwà, tɔ̀ waatsi rɔn, sani ŋaa blàa yè nà, mòdzian na ɲwɛɛ̀n faa, è mìɛn faa, è fur'la faa, yè e dzin nèè sìan fur'la, fɔ è bè suu Nuùn dɔ̀n jisee dzu konkoron blaa doùn.

³⁹ È taa naà ni gèsɔn mà waa, fɔ jisee riì, ŋaa brìsià nàu, yuà yè è sapɛ ɲɔn. Adamà dziàn nà sii sèè, tɔ̀ goo soo rìì nà fa.

⁴⁰ Tà doùn, kpiri fii nà bà ni esire jòon nɔ̀n, soo nà sen dɔn bè, soo yè to.

⁴¹ Tàan fii nà bà ni gè zhia rà esire gèzhima nɔ̀n. Soo nà sen dɔn bè, soo yè to.

⁴² Tɔ̀ kamà, ye to tsùù e jaa ra kudɛyn, kàtsu, ye na e Tsifaà nà jisee tɔ waa.

⁴³ Ye yɛ̀r'la y'à tɔ̀, ci gbàtsià ye ba na à tɔ̀, ci shɔɔ̀n nà nà waatsi riì bwèy feèn doùn, à fa e ɲɛn è cìi, shɔɔ̀n yè nà à re gbàà kɛɛy dɛ !

⁴⁴ Tɔ̀ kamà, e sa lamɔ̀nɔ̀n tsùuŋma yè bà ni, kàtsu ye taa na ni waatsi riì mà ci Adamà dziàn nà nà, à nà nà tɔ̀ rii bwèy.

Yesù nìi dèu faagoofadzin tereonmaà tsɛ
( Lukì 12.41-48 )

⁴⁵ Jòn kɛ̀n ni tereòn akiri yè bà ni à re ? Tɔ jòn, nìi kùntsiɛ̀ yè e re gbàà jòn dzyee reè goojaa wɔ toò à suun, è nà ɲwɛɛ̀n sìn è ra e waatsi ɲan.

⁴⁶ Àwà, tɔ̀ jòòn kùntsiɛ̀ ye seè na, è nà à jà faagoo rèe ra, a ci à dèu à ra nìi tsuru, à raà wùbeu.

⁴⁷ Sààben na, mun nì ci e ra, kùntsiɛ̀ nà à tsùù e suun ge reè sapɛ kuùn.

⁴⁸ Ŋà, tɔ̀ jòòn ye ba jòn ɲan, à nà à ji e duùn è dzin ci: "Mun kùntsiɛ̀ fa nà tabe waa."

⁴⁹ Tà doùn à nà e maa è koòsi jòn dzyee reè baan, è ɲwɛɛ̀n ɲɔɔ̀n, è mìɛn faa ko dɔ̀ɔ̀kɔɔn reè ka.

⁵⁰ Àwà, tɔ̀ jòòn kùntsiɛ̀ nà nà jisee sɔn, waatsi ɲan, à taa na ni nìi mà waa.

⁵¹ Tà doùn, à nà à kuun'n kuru ɲaan fa, a ci duungoofiitsi rèè kuàn nìi tsuru. Gɛyn boo, ko ɲiun taa rìì nà bà ni mɔn.»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ