အွန်လိုင်း သမ္မာကျမ်းစာ

Matsiyù 20 - Bible Dzùùngoo Unicode

Yesù gooma bɔɔ rìi ka tàlen baun dzùtsi sɔn ko e re faagoofadzin ì tsɛ

¹ Àyìwà Yesù yè gooma bɔɔ sɔn ka tàlen ban kɔn, nìi yɛ nèe ci: «Àwà Ŋaablà re Màsàbee boo dzùtsi sɔn ne, nìi bou gbishɛɛ̀mà nɔ̀n, è bè faagoofadzin ì gaa, ci yè bè faagoo fa wò re ɛ̀rɛ̀nzhɛ̀ndzu rɔ̀n.

² À ko faagoofadzin neè byɛ̀unma shɔ̀ùn faagoo sar'la rà, nìi cɛ̀ɛ̀n fii bwèè doùn, à yè bàji be ɛ̀rɛ̀nzhɛ̀ndzu rɔ̀n.

³ À sèè bou kɔn bwèy ɲin'na tèrounmaà shɔ̀ùn, è bè swey jà wɔ̀ɔ̀ jàmà làdzyeema nɔ̀n, faagoo na ni twɛy rè waa.

⁴ È dzin twɛy rà ci: "Ye sa y'a wa faagoò rà ɛ̀rɛ̀nzhɛ̀ndzu rɔ̀n. Ye wù sàr'lìi ka mun nà tɔ̀ sìn ye ra."

⁵ Twɛy yè dɔ̀n be. Bwèè wɔumaà sènfi, è bo kɔn, è tà soo fa. Bwèè nàu e jɛngɛ kɔn, è bo kɔn, à y'à fa tà tsuru.

⁶ Ɲɛ̀rɛ̀ɛ̀ dziɛ rè kɔn, è bo. Arì she, è bè swey tsìiŋma jà wɔ̀ɔ̀ jàmà làdzyeema nɔ̀n. È tey ci: "Fee ye tsìiŋnà mìin bwèè ko e kur'la sapɛ, ye na ni faagoo ra ?"

⁷ È ci à ra ci: "Mòò pɛn na ɲe seòn faagoo ra nìi fa waa, tɔ̀ rii kamà, ɲe ni mìin." À ci: "E sa yeè bè faagoò rà mun ne ɛ̀rɛ̀nzhɛ̀ndzu rɔ̀n."

⁸ Àwà bwèè nàu dò, dzùtsià yè dzin e re ɲɛyn goojaabobaà rà ci: "Faagoofadzin neè kiri e sàrà. A jɔ̀n bònèdzin neè tsɛ, è bè suu fɔ jɔundzin neè rà."

⁹ Tɔ̀un, nìi reè bèu faagoò rà ɲɛ̀rɛ̀ɛ̀ dziɛ rè, twɛy jɔ̀na yè e kpɛrɛ̀, è soo sookɔɔn sa sarà cɛ̀ɛ̀n fii fii.

¹⁰ Nìì reè jɔ̀na bèu faagoò rà, twɛy na à siɛ̀n ci ye nà giri tàrà è geren bònè be reè tsɛ. Ŋà, è sapɛ yeè tɔ̀ sàrà soo tàrà, nìi yɛ cɛ̀ɛ̀n fii fiɛ̀.

¹¹ Tɔ̀ ɲɛɛn tàraumaà twɛy rè, yè maa, yè dzùtsià ŋùnùnŋun'na e dzii dzuun.

¹² È ci: "Nèe rèè nàu bònè, yè nà waatsi soo pe fa faagoò rà, è ko ɲe sa to yɛ sàraɔ̀ dzii soo. Ɲe to faagoò fau bwèè ko e kur'la sapɛ, ɲe yè byɛnbee ko bwèy ŋɔɔn sapɛ tsi e ma."

¹³ Dzùtsià yè mòò sɔn latsi è ɲan ci: "N dzunwɛynsi, wo ni dzin ci mun na tereòn wo ka ɔ ? Wo ko mun na byɛn cɛ̀ɛ̀n fii rìì mà bwèè doùn ɔ̀n ?

¹⁴ A sar'là tsi a wa. À dzibeu mun na ni, min sàrà soo sin wo ko nèe bònè dzin nee sa ra.

¹⁵ Tàà à na dàaŋnà min n sao fa n suun ge reè ka gbɛ ? Tàà mun wù nìi fa tɔ̀ rii jaaɲininbe wo kuɔn gbɛ ?"

¹⁶ Bònèdzin neè nà bà tɔ̀ rii tsuru jɔundzin ì, jɔundzin neè yè bà bònèdzin ì.»

Yesù yè e saàn ko e seè kpunaàn gooma deu min niì kɔn
( Marikì 10.32-34 ; Lukì 18.31-34 )

¹⁷ Àyìwà, Yesù rè shia kuunmaà è bà bèe Yerusalɛmùn, è re kàràndzin teeŋ fiɛ̀ kiri e si, è dzin è ra ci:

¹⁸ «Àwà mùn tèyn bekɔɔn yɛ Yerusalɛmùn nèe, Adamà dziàn nà bè wɔ Saaka Jɔundzin neè ko Sàrìryà Kaamoo reè suun mɔn, yè kitsia mɛɛy à tsɛ, ci è vu.

¹⁹ È nà à wɔ kun kpɛrɛ mòdzin neè suun, twɛy y'à ɲanŋmɛn, y'à dɔrɔ sɛɛn ka, y'à gban gɔɔ̀ rà. Bwèy zhììgi à saunmaà shɔ̀ùn, è sèè kpunan bo saàn ɲàn.»

Zhebedè rè tààn dziun Yesù yè nìi fa wò dzin nèè rè
( Marikì 10.35-45 )

²⁰ Tà doùn, nìi Zhebedè raa tààn, tɔ̀ yeè nà e kpɛrɛ̀ e dzin kpiri fiɛ̀ ka Yesù rà, è kunun gban à bììn, à y'à gaa à re, ci è goo sɔn fa wò re.

²¹ Yesù y'à tey ci: «Wo gaa fee rìì là ?» À ci: «Mun dzin kpiri fiɛ̀ yɛ nèe. À dè n na ci wo ye na a tsuù a re màsàbee tsɛ waatsi riì bwèy, ci wo nà soo tsùù a sirama si jaa rè, wo yè soo tsùù a ɲɔnmà sì jaa rè.»

²² Yesù yè dzin ci: «Ye nìi gaa, ye na tɔ̀ tɔ̀ dɛ ! Byɛnbe niì nà mun tàrà, tɔ̀ ni dzi ku ye ɲan ɔn ?» È ci à ra ci: «Ɔ̀ɔn, tɔ nà dzi ku ɲe ɲan.»

²³ Yesù ci è ra ci: «À kpɛ̀yn nà dzi ku ye ɲan. Ŋà, nìi mun sirama si jaa re tsùù goo, ko ɲɔ̀nmà sì jaa re tsùù goo, tɔ̀ na ni mun suun waa. Mun Fà Ŋaablà y'a màbyɛ̀n tsùuŋnà nìì reè rè, à nà sìn twɛy rìì là.»

²⁴ Kàràndzin neè dzyee tsyeòn tɔ̀ goomaa myɛ̀un min niì, è vunun yè ta e koòsi fiɛ̀ kpɛyn.

²⁵ Yesù yè è dzyèèmaa kiri kpɛ̀rɛ̀ e ra tɔ̀un, è dzin è ra ci: «Y'a tɔ̀ ci dziɲaan doùn, jàmàan rèè kùntsii rèè yè è màraɔ̀ kùntsììbe ka, mòdzin bla reè yè bà e faan ɲinaɔn è tsɛ.

²⁶ Ŋà ye fi, à na wù è bà tɔ̀ tsuru waa. Ye ɲan, mòò riì sào ni wò yeè bà blà dzyee rèè mà, fɔ tɔ̀ yeè e ba è re faagoofadzin.

²⁷ Mòò riì sàò to ni wò yeè bà dzyee rèè jɔundzin ye ɲan, fɔ tɔ̀ yeè e ba è re jòn.

²⁸ Tà soo tsuru, Adamà dziàn na naɔ̀ ci mòò yè faagoo fa à re dɛ, ŋà à naɔ̀ nì ci è faagoo fa mòdzian rè. È xɔɔn sìn, à y'à ka mòò giri kùngɔ màbo.»

Yesù jaana fii jaa dzii saun min niì
( Marikì 10.46-52 ; Lukì 18.35-43 )

²⁹ Àyìwà, Yesù ko e re kàràndzin neè bokɔɔn Yerikò wɔ̀ɔ̀ doùn, jàma brìsi yè e gban è kpɛyn.

³⁰ Tà doùn, jaana mokun fii na tsùuŋnà shi dziɛ rè. Twɛy y'à myɛ̀un min niì ci Yesù rìì dɔ̀ɔn, yè e vu bo fààn na ci: «Tsìfaà, màsà kpiri Dawudà tsua dziàn, màtsuru mùn na !»

³¹ Jàmaà yè fù è kpɛyn tɔ̀un, sànko yè e mɛnshɛ̀n. Ŋà, yè e vuà ɲansen kɔn kpɛrɛ ci: «Tsìfaà, màsà kpiri Dawudà tsua dzin Yesù, a yɛrɛ to e màtsuru mùn na !»

³² Yesù yè e tsiì tɔ̀un, à yè è kiri, è tey ci: «Ye sào ni min fee rìì fa ye re ?»

³³ È ci à ra ci: «Tsìfaà, mùn jaa rèè rìì yè jɛ̀y fa.»

³⁴ È màtsuru yeè Yesù kun fɔ è bè geren. Tɔ̀un è dzyɛn è jaa rèè rà, tɔ̀ nɔ̀nkɔɔrɔn ko e sa, yè jɛ̀y fa. Yè e gban Yesù rà.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ