အွန်လိုင်း သမ္မာကျမ်းစာ

Marikì 9 - Bible Dzùùngoo Unicode

¹ Àyìwà Yesù yè dzin è ra kɔn ci: «Sààben na, mun nì ci e ra, nìì reè tsìiŋnà mìin, swey fa san fyeu, ni è na Ŋaablà re Màsàbee nàkɔɔn ja ko dzibaabe ka waa.»

Yesù lakereu min niì jèèn tsɛ
( Matsiyù 17.1-13 ; Lukì 9.28-36 )

² Bwèy tsùnmɛn tà shɔ̀ùn, Yesù yè Piyɛrì, ko Yàkubà, ko Yùxanà kiri, è bè tèyn è ka jèn gbààn sɔn tsɛ, yè bà ni mɔn e soone. Tɔ̀un, y'à jà Yesù lakereu.

³ À mà vya reè yè fyɛ tɛrɛ tɛrɛ tɛrɛ, fɔ yè bè den deèn. Tɔ̀ gè na ni dzɔ̀nxɔɔ̀ tsɛ nìi dzia à fyɛ tɔ̀ fyɛu'n kur'la rà.

⁴ Kàràndzin neè yè nà kɛɛra Àliì ko Musà jà, è goomaa ko Yesù ka.

⁵ Piyɛrì yè goomaa sen tɔ̀un è dzin Yesù rà ci: «Kàrànfaà mìn bà ni mìin tɔ wù dɛ. Mùn nà bùù gba vyama zhiigi kun, wo raa soo, Musà raa soo, ko Àliì raa soo.»

⁶ Piyɛrì kpɛ̀yn na goomaa nì, ŋà à naà à tɔ̀ wo nà nìi dè waa, kàtsu è na shiɔ̀ fɔ è bè geren.

⁷ Ŋaamunun sɔn yeè dan jìran nɔ̀n tɔ̀ nɔ̀nkɔɔrɔn, tɔ̀ yeè nà è tsyee, ciàn yè bà ni è tsɛ. Vu sɔn yeè bo ŋaamun'na ɲàn, tɔ̀ yeè dzin ci: «Nèe mun dzin kpir'la rìì yɛ nèe, mun nìi kɛ̀niɔ̀n fɔ è bè geren. Ye e toro wɔ à re !»

⁸ Àwà kàràndzin neè bàràmau yè siin fa e lagur'la ɲàn, è na mòò pɛn jà dɛ, fɔ Yesù soo, ko è yɛ̀r'leè.

⁹ Àwà, è jàà bokɔɔn jèèn tsɛ, Yesù y'à dè màxɔbe è ra, ci è nìi jàu, è mà tɔ̀ lakɛɛ̀y mòò pɛn jaa ra, fɔ Adamà dziàn yè bè sèè kpunan bo fùn nèè fi.

¹⁰ Kàràndzin neè yè tɔ̀ goomaa to e duùn. Ŋà nìi saàn ɲàn raa sèè kpunan boò goomaa, yè e si teè tɔ̀ dzuun ma.

¹¹ Tɔ̀un yè Yesù tey ci: «Feera Sàrìyà Kaamoo reè yè bà dziàn ci fɔ kɛɛra Àliì yè nà ŋe ?»

¹² È dzin è ra ci: «À sààben, kɛɛra Àliì nà nà, è goò sapɛ dzii mà sɛ̀rɛ̀nbe e shɔùn. Feera à to yè sɛbɛn Adamà dziàn raa goò tsɛ, ci à nà byɛn cɛyn, tà ko y'à kɔn.

¹³ Ŋà, mun nì ci e ra, Àliì nàu nòn, nìi to dzibeu è ra, è tɔ̀ fau à ra, a ci à sɛbɛɔ̀n à re goò tsɛ nìi tsuru Ŋaablà re Goomaa doùn.»

Yesù dziin kweykɔɔn sɔn cɛrɛmabeu min niì
( Matsiyù 17.14-21 ; Lukì 9.37-43 )

¹⁴ Àyìwà, è sèè naumaà yè nà dzi kàràndzìn dzyee reè tsɛ, y'à jà jàma brìsi twɛy laguruɔ̀, Sàrìyà Kaamoo ì ko yè bà e si sɔ̀swɛɛ̀.

¹⁵ Jàmaà jaa dziu ɲɛn Yesù mà min niì, è ji è dzii tsɛ fɔ è bè geren. Yè vwɛ̀yn be yè b'a tswà.

¹⁶ Yesù yè kàràndzin neè tey ci: «Ye ko Sàrìyà Kaamoo reè yè e si sɔ̀swɛɛ̀ fee tsɛ ?»

¹⁷ Sɔn yeè dzin à ra jàmaà ɲàn ci: «Kàrànfaà, mun naɔ̀ n dzin kpir'la rìì ka wo re. Kwey sɔn ni à kpɛyn nìi y'à baɔ̀ bobo.

¹⁸ Kwey rèe y'a kun min niì, à y'à sen mɛɛ̀ dzɔn nɔ̀n, dzweeyuà yè kànkan boò à dzu, è ɲiun taa, à gɔɔ̀n sapɛ yeè gɔ̀rɔ̀. Mun y'à dèu wo re kàràndzin neè rà ci y'à kaa bo à kpɛyn, ŋà è na dzi waa.»

¹⁹ Yesù yè dzin è ra tɔ̀un ci: «Ye she mòdzin niì reè na ɲɛɔ̀n Ŋaablà ra, mun nà to ye ka min ye re goo rèè ku n ɲan fɔ waatsi kɛn ? Ye nà dziɛ̀n ka n kɔ.»

²⁰ Àwà yè nà à ka à kɔ̀. Kweè dziu Yesù jà min niì, è dziɛ̀n yuuyuu fààn na. È mɛɛy dzɔn nɔ̀n, è koròngor'nà, à dzweeyuà yè kànkan boò.

²¹ Yesù y'à fàà tey ci: «Fɔ waatsi kɛn nèe y'à tàrau ?» Fàmaa ci: «Fɔ à dziinkoomɛynkɔɔn nà.

²² Waatsi giri à y'a kun, à y'à mɛɛ̀ sa rɔ̀n, tà ko yu rɔ̀n, sànko è bà ni à vu. E ba dzia sɔn fa, màtsuru mùn na, e cinan mùn mà.»

²³ Yesù ci à ra ci: «Wo ci: "E ba dzia." Àwà mòò riì ɲɛɔ̀n Ŋaablà ra, goo sɔn pɛn na tɔ̀ jaan waa.»

²⁴ Dziɛ̀n fàà yè e vu bo tɔ̀ nɔ̀nkɔɔrɔn fààn na, è dzin ci: «Mun ɲɛun Ŋaablà ra ! Arì she, ɲɛynaà gba niì faɔ̀ mun mà, cinan n ma tɔ̀ ra.»

²⁵ Àwà Yesù jàmaà ladzyeèkɔɔn jau min niì, è cerè kweè tsɛ, è dzin à ra ci: «Wo kwey rìi mòò bàa bobo torokperen, mun ci e bo dziin nèe kpɛyn, a to mà a gban à kpɛyn dɛ byɛ !»

²⁶ Kweè yè gɛyn bla bo tɔ̀un, è dziɛ̀n yuuyuu fààn na è bo à kpɛyn. Dziɛ̀n yè bà a ci à saɔn rìì, fɔ giri yè dziàn ci à saun.

²⁷ Ŋà Yesù y'à kun e si ra, à y'à fù, è tsiì e san tsɛ.

²⁸ Àwà Yesù nàu bè dɔ̀n gbàà doùn waatsi riì bwèy, à y'à ko e re kàràndzin neè to e soone mɔn, twɛy y'à tey ci: «Feera ɲe na dzi kwey rèe kaa bo dziɛ̀n kpɛyn do ?»

²⁹ À ci è ra ci: «À kwey kaatsi rèe na dzia bo bou'n kuru pɛn na màfyɛɛ̀n shɔ̀ùn waa.»

Yesù yè e saàn ko e seè kpunaàn dèu e re kàràndzin neè rà min niì kɔn
( Matsiyù 17.22-23 ; Lukì 9.43-45 )

³⁰ Àwà Yesù ko e re kàràndzin neè yè bo mɔn tɔ̀un, yè nà Galile mar'la fi shɛn dɔ̀n. À sàò naà ni à re mòò y'à ɲantɔ waa,

³¹ kàtsu à na e re kàràndzin neè kàr'na, nìi doùn à na à dèe è ra ci: «Mòo nà Adamà dziàn wɔ mòdzian suun, y'à vu. Bwèy zhììgi à saunmaà shɔ̀ùn, è sèè kpunan bo saàn ɲàn.»

³² Àwà kàràndzin neè naà gooma ree dzin seòn waa, ŋà è na shiɔ̀ y'à tey.

Yesù ci mòò riì blà dzyee rèè mà
( Matsiyù 18.1-5 ; Lukì 9.46-48 )

³³ Àyìwà yè dɔ̀n be Kapɛrinaxumùn wɔ̀ rɔ̀n. È bèu dzi tsii rɔ̀n, Yesù yè kàràndzin neè tey ci: «Ye na ni kɛ̀n tsuru gooma ni nà shia rè ?»

³⁴ Kàràndzin neè yè e mɛnshɛ̀n. È ɲɛn à tsɛ, è to shia rè, è na ni gooma niì nà, tɔ̀ rii yɛ y'a tɔ̀, mòò riì blà dzyee rèè mà ye ɲan.

³⁵ Yesù yè e tsuù tɔ̀un, è kàràndzin teeŋ fiɛ̀ kiri, è dzin è ra ci: «Mòò riì ye ba ni à re wò yeè bà dzyee rèè jɔundzin, fɔ tɔ̀ yeè e ba è sapɛ bonèdzin ko è re faagoofadzin.»

³⁶ È dziin sɔn kun na tɔ̀un, è tɔ̀ tsìì è fi. À y'à sen kun e suun, è dzin è ra ci:

³⁷ «Mòò o moò nèe dziin nèe tsuru kuun'n kuru wubee mun kamà, tɔ mun nì kuun'n kuru wubeu. Mòò o moò to mun kuun'n kuru wubee, tɔ na baà mun kuun'n kuru wubeò dɛ, à mun kabaà rìì kuun'n kuru wubeu.»

Yesù ci nìi ma ba wò wùù tɔ wò ɲan nì
( Lukì 9.49-50 )

³⁸ Àwà, Yùxanà yè dzin Yesù rà ci: «Kàrànfaà, ɲe kpiri sɔn jau à kwey rèè kaa boò mòdzian kpɛyn wo tsoò baraka rɔ̀n. Ɲe na ni à re ɲe y'à kaa tɔ̀ faa tsɛ, kàtsu à na gbaɔn ɲe kpɛyn waa.»

³⁹ Ŋà Yesù yè dzin ci: «E maà à kaa tɔ̀ tsɛ waa, kàtsu mòò pɛn na dzia kabagoo goo fa mun tsoo ra, è sèè tɔ̀ nɔ̀nkɔɔrɔn, è mun tsoo ɲaan kiri waa.

⁴⁰ Mòò riì ma ba ɲe ɲan fyeu, tɔ ɲe wùù rii.

⁴¹ Àwà, mòò o moò nà yukuun jaa soo yu sìn ye ra, kàtsu ye Ŋaablà Jaara Moò raa, sààben na, mun nì ci e ra, tɔ̀ tsìfa fa fɔn tɔ̀ bàràjia ɲàn fyeu.»

Yesù ci nìi ni sànfir'la ɲàn
( Matsiyù 18.6-9 ; Lukì 17.1-2 )

⁴² Yesù yè dzin kɔn ci: «Àwà nèe dziin nèe rèè tsuru nìì reè ɲɛɔ̀n mun na, mòò riì twɛy sɔn san fìr'la, è ye zhi kpaa bla shi tɔ̀ vu ra, yè b'a maa kòòyu rɔn tɔ̀ ka, tɔ fyan tɔ̀ tsìfa mà, sani è tɔ̀ fa.

⁴³ A sià ye ba bàa tsoo à y'à dɔn gooɲaan ɲan, à kùnùn bo a ra. Tɔ̀ fa, kàtsu a ko a si sɔɔ̀n yè bè dɔ̀n jaamabe dziù dòbɛɛ ɲàn, tɔ fyan, sani a ko a si fiɛ̀ yè bè maa jààndamaan doùn, sà dzibɛy rɔn. [

⁴⁴ Tɔ̀ gàneè tsùùn neè na san jàa, à sàà to na dzi jàa.]

⁴⁵ A saàn ye ba bàa tsoo à y'à dɔn gooɲaan ɲan, à kùnùn bo a ra. Tɔ̀ fa, kàtsu a ko a san sɔɔ̀n yè dɔ̀n jaamabe dziù dòbɛɛ ɲàn, tɔ fyan, sani a ko a san fiɛ̀ yè bè maa jààndamaan doùn. [

⁴⁶ Tɔ̀ gàneè tsùùn neè na san jàa, à sàà to na dzi jàa.]

⁴⁷ A jaadzian nì to ye ba bàa tsoo, à y'à dɔn gooɲaan ɲan, à kwey bo a ra, a maa. Tɔ̀ fa, kàtsu a ko a jaa sɔɔ̀n yè dɔ̀n Ŋaablà re màsàbee doùn, tɔ fyan, sani a ko à fiɛ̀ sa yeè maa jààndamaan doùn.

⁴⁸ Tɔ̀ gàneè tsùùn neè na san jàa, à sàà to na dzi jàa.

⁴⁹ Àwà, sàà nà mòò sɔn sɔɔ̀n sapɛ labo a ci kòò.

⁵⁰ Kòo gè dziù rìì, ŋà è dzi maà nòn, ye dzia à sèè dzibe fee ka kɔn ? Y'a to kòò yeè bà ni e ɲan, jaancin yè bà ni e ko e si fi.»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ