အွန်လိုင်း သမ္မာကျမ်းစာ

Marikì 8 - Bible Dzùùngoo Unicode

Yesù buru kunun ɲɛɛ̀nun ko ji myɛyn danman ka jàmaà dziira gaaŋ min niì
( Matsiyù 15.32-39 )

¹ Àyìwà, twɛy jisee reè sii sèè, jàma brìsi na e ladzyèeŋnà Yesù ka kɔn yeu. Tɔ̀ y'a tàrà, ɲɔɔ̀n gè naà ni è re waa. Àwà, Yesù yè e re kàràndzin neè kiri kpɛ̀rɛ̀ e ra tɔ̀un, è dzin è ra ci:

² «Jàmaà màtsuru mun kuɔn fɔ è bè geren, kàtsu à bwèy zhììgi rii yɛ nèe è ni mun ka, ɲwɛyn to na ni y'à ɲɔn.

³ Mun ye è dzukɔɔn baji be e re tsii, è nà gba shia rè, kàtsu swey boo jeenà yè nà.»

⁴ Kàràndzin neè yè dzin à ra ci: «Mòo dzia nèe rèè cɛɛ̀n ɲwɛyn jà mìin jènjàà kor'nèe doùn ɔ̀n ?»

⁵ À yè è tey kɔn ci: «Buru kunun fɛrɛn ni ni ye re ?» È ci «ɲɛ̀ɛ̀nun.»

⁶ Tɔ̀un, à y'à gaa jàmaà rè, ci yè e tsuù dzɔn nɔ̀n. Tà shɔ̀ùn è buru kunun ɲɛɛ̀nun nèe tsi, è baraka sìn Ŋaablà ra, à yè è tara tara, è wɔ kàràndzin neè suun, ci y'à tanan. Àwà twɛy sa y'a tanan jàmaà nà.

⁷ Ji myɛyn danman sa na ni è re. Yesù yè twɛy sa tsi è Ŋaa tswà, è twɛy sa sin, ci kàràndzin neè y'à tanan jàmaà nà.

⁸ Mòdzian yè ɲwɛɛ̀n ɲɔn yè cɛn kpan. Y'à dzyee kùnkwììn touma rèè ka sèè ɲɛ̀ɛ̀nun tsyɛn.

⁹ Nìì reè tɔ̀ ɲwɛɛ̀n ɲɔun, è na mòkun gbaa nààlen tsuru boò. Tà shɔ̀ùn, Yesù yè shi sin è ra.

¹⁰ Tɔ̀ faumaà shɔ̀ùn, à ko e re kàràndzin neè yè dɔ̀n konkoron sɔn doùn suu, yè dɔ̀n be màrà sɔn ɲan, nìi kir'là Dalimanutà.

Yesù ci wò re kàràndzin neè yè e kaàwɔ nìi rà
( Matsiyù 16.1-4 )

¹¹ Àyìwà, è bèu dzi mɔn, Faridziɲɛn rèè yè bo na, yè nà e maa yè sɔ̀swɛy faa Yesù ka. È ni à re y'à dzuun bo nìi fa, y'à gaa à re, ci è tàànmàshɛn kabagoomaa sɔn fa ye jaa ra, è bo jìrànxɔ rɔ̀n.

¹² Tɔ̀ goò rè Yesù byɛunmaà e akir'là ɲàn, è ŋɔ̀n tɔ̀un fààn, è dzin ci: «Feera nèe waatsi ree mòdzian yè bà tàànmàshɛn kabagooma gaa ? Sààben na, mun nì ci e ra, tàànmàshɛn kabagooma pɛn fa fa è jaa ra waa.»

¹³ Tà goomaa shɔ̀ùn, Yesù yè bo è tɛyn è bè dɔ̀n konkor'na doùn, è dɔ̀n be yu blàa kɛ̀yn.

¹⁴ Àwà kàràndzin neè taa na to yè buru sen waa. Buru kunun soo pe rii na ni è kùùn konkor'na doùn.

¹⁵ Yesù to y'à dè màxɔbe è ra ci: «Y'a jàa dɛ, ye e yɛrɛ kaàwɔ Faridziɲɛn rèè rè buru fu geè, ko Erodzì rè buru fu geè rà.»

¹⁶ Kàràndzin neè yè e kɛsɛ, yè dzin e si ra ci: «Buru na ni ɲe re nìi fa dɛ, tɔ̀ rii kamà à nèe dèe.»

¹⁷ Yesù yè è duùn naà tɔ̀u nìi fa, è dzin è ra ci: «Feera ye yè bà à kɛ̀sɛɛ̀ ci buru na ni ye re nìi fa ci à tɔ̀ rii ? Arì she ye akir'là na jɛ̀y fa ŋe o ? Ye akir'là ŋununbeò gbɛ ?

¹⁸ Jaadzin ì na ni ye re ye yè bà jɛ̀y faa gbɛ ? Toro ì na ni ye re ye yè bà myɛ̀yn fara ɔ ? Ye taa na ni gbɛ ?

¹⁹ Mun buru kunun nuàn ka mòkun gbaa nùn nìi dziira gaaŋ, y'a dzyeè ka sèè fɛ̀rɛ̀n ni tsyɛun ?» È ci «teeŋ fii.»

²⁰ È tey kɔn ci: «Mun ɲɛ̀ɛ̀nuàn ka mòkun gbaa nààlen nìi dziira gaaŋ y'a dzyee toumaà ka sèè fɛ̀rɛ̀n ni tsyɛun ?» È ci «ɲɛ̀ɛ̀nun»

²¹ È dzin è ra ci: «Arì she ye akir'là to na jɛ̀y fa ŋe o ?»

Yesù jaana kpiri sɔn jaa dzii saun min niì

²² Àyìwà, tà shɔ̀ùn, Yesù ko e re kàràndzin neè yè dɔ̀n be Bɛtsisayidà wɔ̀ rɔ̀n. È bèu dzi mɔn, yè nà jaana kpiri sɔn ka Yesù rè. Y'à màfyɛ̀n, è bà ni e dzyɛn à ra, è cɛrɛmabe.

²³ Àwà, Yesù yè jaana kpir'là kun e si ra tɔ̀un, è bo à ka wɔ̀ɔ̀ bònè. À bèu wɔ, è dzweeyuà ji à jaa ra, è si rèè tsùù à tsɛ, à y'à tey ci: «Wo gè jàra ɔ ?»

²⁴ Kpir'la yè e jaà ɲansen, è dzin ci: «Mun mòdzian jàa a ci gɔ̀ɔ̀ku ì. Ŋà è jìì beè.»

²⁵ Tà shɔ̀ùn Yesù yè e sià tsùù à jaa rèè tsɛ kɔn. Tɔ̀un, è jɛ̀y fa fasɛyn. Kpir'la yè cɛrɛmabe, è dzia gè rèè sapɛ jaà, è lafyɛ bo e si ɲan.

²⁶ Tà shɔ̀ùn Yesù y'à bàji be e re tsii, è dzin à ra ci: «Maà dɔ̀n wɔ̀ɔ̀ tsu rii doùn waa.»

Piyɛrì ci Yesù Ŋaablà Jaara Modzìàn
( Matsiyù 16.13-23 ; Lukì 9.18-22 )

²⁷ Yesù ko e re kàràndzin neè yè bo mɔn tà shɔ̀ùn. Wɔ̀ nìì reè ni Sezare Fìlipù wɔ̀ɔ̀ tɛyn, yè bè mɔn kèrè. À yè è to shia tsɛ, Yesù yè kàràndzin neè tey ci: «Mòdzian dziàn ci mun tsì rii ?»

²⁸ Twɛy ci à ra ci: «Swey ci wo Mòdzìn Jààràfoobaa Yùxanà, swey ci kɛɛra Àliì, swey yɛ̀rɛ̀ ci wo kɛɛra reè sɔn.»

²⁹ Yesù yè è tey ci: «Ye do ? Ye ci mun tsì rii ?» Piyɛrì yè dzin à ra ci: «Wo Ŋaablà Jaara Modzìàn nì.»

³⁰ Tɔ̀un, Yesù y'à dè màxɔbe è ra, ci è mà wò gooma de mòò pɛn na.

³¹ Àyìwà, tà shɔ̀ùn, à yè e maa è kàr'na. À ci è ra ci: «Fɔ Adamà dziàn yè byɛn cɛyn. Bɔɔ rèè, ko Saaka Jɔundzin neè ko Sàrìyà Kaamoo reè yè e nɔn à re, è vu. Bwèy zhììgi à saunmaà shɔ̀ùn, è sèè kpunan bo saàn ɲàn.»

³² Yesù yè tɔ̀ goomaa dè fyɛ è ra tɔ̀ tsuru. Piyɛrì tɔ̀ myɛ̀un min niì, è Yesù kiri bo tɔnmà, è bè e maa è vu xɔù dèe à ra tɔ̀ kamà.

³³ Yesù yè e jaa kere tɔ̀un è re kàràndzin neè siin, è fù Piyɛrì kpɛyn. À ci à ra ci: «Bo n tɛyn, e bè jɔun, Sùtànà modzìn ! Wo nìi kɛ̀sɛɛ̀, tɔ̀ ko Ŋaablà raà na soo waa, à mòdzin ì kɛ̀sɛu'n kur'li.»

Mòò yè e gbaàn Yesù kpɛyn nìi tsuru
( Matsiyù 16.24-28 ; Lukì 9.23-27 )

³⁴ Twɛy goo rèè shɔ̀ùn, Yesù yè jàmaà ko e re kàràndzin neè sa dzyeèmaa kiri kpɛ̀rɛ̀ e ra, è dzin è ra ci: «Mòò riì ye ba ni à re è gban mun kpɛyn, fɔ è ɲɛyn bo e yɛrɛ tsɛ, è gbaàn gɔɔ̀ sen, è kòmànà e gban mun kpɛyn.

³⁵ Àwà mòò riì y'à gaa ci wò yeè e xɔɔn tsi, tɔ nà fɔn à ɲan. Ŋà mòò o moò nà fɔn e xɔn nɔn mun ko Kùnàgoo Dziɔ̀ kamà, wo nà à tsi.

³⁶ À to fee wùbee mòò mà è dziɲaan sapɛ tarà bà e raa, è fɔn e xɔn nɔn ?

³⁷ Àwà mòo dzia fee soo rii sìn, à y'à ka e xɔɔn màbo ?

³⁸ Nèe she raa mòdzin niì reè yè e nɔɔ̀n Ŋaablà re, yè bà gooɲaan faa, àwà mòò riì ci wo seè twɛy jɔun mun ko n ne gooma reè kamà, Adamà dziàn sa ye na nà sii rìi sèè e Fa Ŋaablà nɔɔrɔɔ̀ doùn, ko e re mɛ̀rɛ̀kɛ̀ fɛnɛ reè ka à sa nà seey, ci wò na tɔ̀ tsìfa tɔ̀ waa.»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ