အွန်လိုင်း သမ္မာကျမ်းစာ

Lukì 7 - Bible Dzùùngoo Unicode

Yesù kaadzin jɛrɛ̀blàtsi sɔn ne jòn kpiri cɛrɛmabeu min niì
( Matsiyù 8.5-13 )

¹ Àyìwà, Yesù nàu twɛy gooma reè sapɛ de dò mòdzian nà waatsi riì bwèy, è fù, è dɔ̀n be Kapɛrinaxumùn wɔ̀ɔ̀ doùn.

² Kaadzin jɛrɛ̀blàtsi sɔn na ni tɔ̀ wɔ̀ɔ̀ doùn. Jòn kpiri soo na ni à re, tɔ̀ jòn kpir'là goojaa yè bà na xɔ à re, fɔ è bè geren. Yesù dɔ̀un wɔ̀ɔ̀ doùn, tɔ̀ y'a tàrà, jòn kpir'là na ɲìniɔ̀n jàci à ni san.

³ Tɔ̀un, Kaadzin jɛrɛ̀blàtsià Yesù gooma myɛun nìi fa, è Dzyèèsìbee mòdzin neè bɔɔ rèè swey ka Yesù rè, ci twɛy yè bè à màfyɛ̀n, è nà wò re jòn kpir'là cɛrɛmabe.

⁴ Twɛy bɔɔ rèè yè bè. È bèu wɔ Yesù tsɛ min niì, yè e maa y'à màfyɛ̀ɛn cèreoma, yè dzin ci: «Wo ye nèe kpir'lee dzwɛ̀ma, tɔ wù à ka.

⁵ À Dzyèèsìbee mòdzin neè kɛ̀n gereon. Wò rii y'à tou wɔ̀ rèe doùn ŋaablabegbaà yè ji.»

⁶ Bɔɔ rèè rè goomaa shɔ̀ùn, Yesù yè e tsiì è bè ko è ka. È bèu tsyɛnbe kaadzin jɛrɛ̀blàtsià rè gbàà rà, tɔ̀ yeè to mɔn, è dzunwɛynsi reè swey ka Yesù rè, twɛy yè bè dzin à ra ci: «Tsìfaà, maà dzin ci a byɛnbe kpɛrɛkuru jia a yɛrɛ jɔun waa. Wo yè bà ni dɔn mun tsur'le tsii, mun na wɔɔ tɔ̀ mà waa.

⁷ Tɔ̀ rii y'à to, mun y'à jà ci mun ne blàbee na wɔɔ min wɔ wo tsɛ mɔn waa. Mun ne, wo kɛ̀nsɛɛn ye gooma soo rii dè, tɔ̀ goomaa baraka rɔ̀n, mun ne jòn kpir'là dzia cɛrɛmabe.»

⁸ È sèè è dzin kɔn ci: «Àwà mun mòdzin, kùntsii ì tsùuŋnà mun kùùn. Mun sa yeè bà ni kaadzin ì kùùn. Min sɔn ka, tɔ bèe, mun to ye sɔn kiri, tɔ nàa. Min dzin n ne jòòn rà, nèe fa, tɔ tɔ̀ rii faa.»

⁹ Yesù twɛy gooma reè myɛ̀un min niì, è ji à dzii tsɛ. Tɔ̀un, Jàma nìi gbaɔn à kpɛyn, è jaà lakere twɛy rà, è dzin ci: «Mun nì ci e ra, arì Isirayɛlidzin neè ɲàn, mun na mòò jà ŋe, nèe ɲɛyna brìsi rèe kaatsi ni nìi ɲàn waa.»

¹⁰ Yesù tà dè dòu min niì, kɛɛra reè yè sèè be kaadzin jɛrɛ̀blàtsià kpà. È bèu wɔ mɔn, y'à jà, ci jòn kpir'là cɛrɛmabeu.

Yesù dzunwɛyn sɔn fun kpunaun min niì

¹¹ Tɔ̀ raa gbee, Yesù ko e re kàràndzin neè yè fù, ci ye bèe wɔ̀ sɔn ɲan, ci Naxinìn. Jàma brìsi na gbaɔn è kpɛyn.

¹² È bèu wɔ wɔ̀ɔ̀ dɔ̀nmàdziɛ rà, yè mòdzin swey bokɔɔn ja wɔ̀ɔ̀ doùn ko dzunwɛyn sɔn fun ka. È na bèe à ka fùn wɔma nɔ̀n. Tɔ̀ dzunwɛɛn soo den ni na ni e naà rè. Tɔ̀ taàn sa re kpir'la na saɔn nòn. Wɔ̀ùndzin neè na boo giri, yè bà bèe taàn ka e dziàn fùn wɔma nɔ̀n.

¹³ Tsìfa Yesù tɔ̀ taàn gɛynkɔɔn jau, à màtsuru y'a kun. È dzin à ra ci: «A mɛnshɛ̀n, maà gɛyn waa.»

¹⁴ Tɔ̀un, Yesù yè e kpɛrɛ̀ fùn sen neè rà, è bè e dzyɛn fùn seen gèè rà. Fùn sen neè yè e tsiì. Twɛy yè e tsiiŋ, è gooma fùàn tsɛ ci: «Dzunwɛyn, mun ci e fù.»

¹⁵ Yesù tà goomaa dèu min niì, dzunwɛɛn yè kpunan, è fù è tsuù è maa è goomaa. Tɔ̀un, Yesù yè dzin dzunwɛɛn naà nà ci: «Tàan, a dzin kpir'la yɛ.»

¹⁶ Mòdzian gè o ge na ni mɔn, à goò yè è sapɛ shi, è ji è dzii tsɛ. Yè e maa, yè tsoo dzi ɲɛɛn Ŋaablà tsɛ, yè dziàn ci: «Ŋaablà re kɛɛra blaa sɔn ni ni ɲe fi !» Yè dziàn kɔn ci: «Ŋaabla naɔ̀ wɔ e re mòò rèè rà.»

¹⁷ È gooma ge o ge dèe Yesù rè goò ɲàn, tɔ̀ yeè wɔ Yudè màr'là ko e lagur'la gàne rèè sapɛ ɲan.

Yesù ko Yùxanà raa goo rèè
( Matsiyù 11.2-19 )

¹⁸ Àyìwà, è Yùxanà to kàsoò doùn, Yesù na goo nìì reè sapɛ faɔ̀, Yùxanà rè kàràndzin neè yè bè tɔ̀ sapɛ lakɛ̀ɛ̀y à ra mɔn. Yùxanà tɔ̀ myɛ̀un min niì, à yè e re kàràndzin neè fii kiri,

¹⁹ è twɛy ka bè Tsìfa Yesù rè, ci yè b'a tey ci: «À dèu ci mòò riì nà nà, tɔ wo rìì làà, tàà mùn mòò kpɛr'lì màshua ?»

²⁰ Kàràndzin fiɛ̀ bèu wɔ Yesù tsɛ waatsi riì bwèy, yè dzin à ra ci: «Tsìfaà, Mòdzìn Jààràfoobaa Yùxanà ɲe ka naɔ wo rìì lè. À ci ɲe yè nà wo tey ci mòò riì goo na deò, ci à nà nà, ta wo rìì làà, tàà mùn mòò kpɛr'lì màshua ?»

²¹ Tɔ̀ waatsia yɛ̀r'la ɲàn, Yesù ɲìnìnkɔɔn giri cɛrɛmabeu. È ɲìnìnkɔ̀ɔ̀n ɲan giri cɛrɛmabe. È kweykɔɔn gir'le kwey kaa bo è kpɛyn. È jaana giri jaa dzii san.

²² Tà shɔ̀ùn, Yesù yè kòmànà Yùxanà rè kɛɛra fii rèè rè goomaa latsi ci: «Ye nìi jàu tà ko ye nìi myɛ̀un, ye bè twɛy lakɛɛ̀y Yùxanà nà. Ye bè dzin à ra ci: Jaana reè jɛ̀y faa, mùrùku reè jìɛ, byèèma reè cɛrɛmabeè, yè fɛnɛbe, torokper'neè myɛ̀yn faa, fùn nèè sèè kpunaàn, Kùnàgoo Dziɔ̀ yè bà dèe gbakɔɔn reè rà.

²³ Àwà, mun ma dzi ba mòò o moò sàn nà baan kpàà fyeu, tɔ̀ tsìfa raà wùbeu !»

²⁴ Àyìwà, Yùxanà rè kɛɛra reè dɔ̀n bèuma shɔ̀ùn, Yesù yè e maa è dziàn jàmaà nà Yùxanà raa goò tsɛ ci: «Ye bèumaà nà jènjàà kor'nà doùn, ye bèu fee rìì jà ? Ye bèu vun maana ni jà fyɛɛn y'à flɛ̀flɛɛra ɔ ?

²⁵ Ye to bou ye bè fee rìì jà ? Ye bèu mòò rìì jà nìi vya wùù jiunà e ma ɔ̀n ? Àwà nìì reè vya wùù reè wɔɔ̀, yè bà e re jaamabee faa dziɔ̀ tsɛ, twɛy ni màsà gba rèè rìì doùn.

²⁶ Ye to bou ye bè fee soo rii jà ? Ŋaablà re kɛɛra gbɛ ? Ɔ̀ɔn, mun nì ci e ra, è bà gereon Ŋaablà re kɛɛra sa tsɛ.

²⁷ Ŋaablà re goomaa doùn, à re kɛɛra sɔn na kùnàgoo sɔn sɛbɛɔ̀n kpiri sɔn tsɛ nèe tsuru ci: "Mun Ŋaablà nà n ne kɛɛraa sɔn baji be wo jɔun, è bè wo jɔun lamɔnɔ̀n tsùù." Tɔ̀ kɛɛraa rìì yɛ Yùxanà.»

²⁸ Yesù yè dzin kɔn ci: «Mun nì ci e ra, tàan pɛn na dzin kere jà ŋe, nìi blà Yùxanà mà waa. Tɔ̀ to y'à tàrà mòò riì dzyɛ̀n mòdzian sapɛ ma Ŋaablà re màsàbee doùn, tɔ̀ sa blà à mà.»

²⁹ Yesù yè sèè è dzin kɔn ci: «Mòdzian gè o ge yè e toro wɔu Yùxanà rè, arì xɔnsɔɔn tsi reè sa, y'à tou Yùxanà yè ye jaara foò Ŋaablà re shia goo rèè rà. Twɛy sapɛ y'a jàu ci Ŋaablà tereòn.

³⁰ Ŋà, nìi Faridziɲɛn rèè, ko Sàrìyà Kaamoo reè, Ŋaablà na nìi gaaŋnà twɛy rè, yè e nɔun tɔ̀ mà. È to na e tsiì Yùxanà yè ye jaaraa fòò waa.»

³¹ Yesù yè dzin kɔn ci: «Mùn yɛ waatsi riì ɲàn ci she, mun nà tɔ̀ mòdzian ko tsi rìì gɔ̀n ? È boò tsì ì rìì lè ?

³² È ni a ci dziin kòòmɛ̀yn ì, nìì reè tsùuŋnà siikpaa ɲan, yè bà e vu boò e si ra ci: "Ɲe gwɛ̀ɛn fyɛu ye re, ye to na ɲɔun ji waa ! Ɲe yè shì ye ì cèè ye re, ye to na gɛyn waa !"

³³ Àwà, Mòdzìn Jààràfoobaa Yùxanà nàu, à na ɲwɛyn cèreoma ɲɔɔ̀n, à to na mììnge ɲaùn mìan. Ye dziàn ci: "À kweykɔɔn !"

³⁴ Àwà, Adamà dziàn nàu, tɔ ɲwɛɛ̀n ɲɔɔ̀n, è bà mìɛn faa. Ye dziàn ci: "À nwɛ̀yn ɲan, à mììnfabaa, è bà xɔnsɔɔn tsi reè ko mòdzin faadzii ɲaan neè dzunwɛynsi."

³⁵ Ŋà, dzi sìan Ŋaablà re akiriblabeè rà, à dzin nèè sapɛ yeè bà saabu.»

Tàan sɔn ɲinin kinin dziù koun Yesù sàn nèè tsɛ min niì
( Matsiyù 26.6-13 ; Marikì 14.4-9 ; Yùxanà 12.1-8 )

³⁶ Faridziɲɛn kpiri sɔn na ni, tɔ̀ tsoò yè bà na ci Shimɔ̀n. Sii sɔn see, tɔ̀ kpir'la yè nà Yesù kiri, ci è bè ɲwɛyn ɲɔn wò re tsii. Yesù yè bè. À bèu wɔ kpir'la rè tsii rɔ̀n, yè e maa yè ɲwɛɛ̀n ɲɔɔ̀n.

³⁷ È to ɲwɛɛ̀n nà, tàan sɔn yeè nà dɔ̀n mɔn. Wɔ̀ dòùn dzin neè na dziàn ci tɔ̀ taàn faadziɛ nooŋnà. Taàn y'à myɛ̀un nìi fa, ci Yesù ni Faridziɲɛn kpir'là rè tsii rɔ̀n, à nàkɔɔn è nà ko ɲinin kinin dziù sɔn ka e suun. Tɔ̀ ɲin'nà na ni bwèyn sɔn doùn nìi kpaxɔ fɔ è bè geren.

³⁸ Taàn nàu wɔ, è dɔ̀n Yesù bonè, è bè e kunun gban à sàn nèè tɛyn, è maa è gɛɛ. È gɛyn fɔ à jaayuà yè bè Yesù sàn nèè fyee. Tà shɔ̀ùn, è kungwɛ̀ɛn ka à sàn nèè tsùsa, è mà nùù nùù. Tɔ̀un, è ɲin'nà kon à sàn nèè tsɛ.

³⁹ Faridziɲɛn kpiri nìi na Yesù kiri naɔ e re tsii rɔ̀n, tɔ tɔ̀ jàu min niì, è dzin e duùn ci: «Nèe kpir'lee na Ŋaablà re kɛɛraa sɔn dɛ ! È ba na Ŋaablà re kɛɛra taki, tàan nìi yɛ e dzyɛɛn à sàn nà, à na nà à tɔ̀, à mòò riì kuru. À na nà à tɔ̀, ci à tàan faadzii nooŋma.»

⁴⁰ Yesù yè dzin Faridziɲɛn kpir'là rà tɔ̀un ci: «Shimɔ̀n, gooma ni mun ne, mun y'à dè wo ra.» Shimɔ̀n sa yeè dzin à ra ci: «Àyìwà, gooma n karanfaà.»

⁴¹ Yesù ci tɔ̀un: «Kpiri sɔn na tsìì wɔɔ kpiri fii ra. Tsìì tsi mòò sɔɔn raà na gbaa càànmoò nùn, soo raà yè bà na gbaa dzyèètsyeùn.

⁴² Kpir'la nàu à jà tsìì tsi rèè pɛn fa dzi wò re tsìɛ̀ sàrà nìi fa waa, è dzin, ci wo yàfau à shɔ̀ùn. Wo re o, twɛy tsìì tsi fiɛ̀ ɲàn, kpir'la goo nà dzibe geren tsì rii là ?»

⁴³ Shimɔ̀n yè dzin tɔ̀un ci: «Mun jaa ra, nìi raa tsìì na giri, kpir'la goo nà dzibe geren tɔ̀ rii là.» Yesù ci: «Wo sààben deu.»

⁴⁴ Tà shɔ̀ùn, è jaa kere taàn nà, è dzin Shimɔ̀n nà ci: «Wo tàan rèe jàa kɛ̀ ? Mun nàu wo kpà, wo na yu pɛn sìn, è ka mun san nèè fòò waa. À to yè e jaayuà ka mun sàn nèè fòoŋ è tsùsa e kungwɛ̀yn neè ka.

⁴⁵ Mun nàu dɔ̀n wo re mìin, wo na mun kùùntsi blàbe doùn waa. Fɔ mun to yè dɔ̀n mìin nɔn, tàan rèe ko blàbe rii mun sàn nèè mà nùù nùɔ.

⁴⁶ Wo na ɲinin yɛ mun kùùn waa, à to nàu làtsìkɔrɔ kinin dziù kon mun sàn nèe tsɛ.

⁴⁷ Tà doùn, mun nì ci a ra, ci à mun kɛ̀n nìi fau nèe tsuru cèreoma, tɔ̀ y'a kpàdèe ci à re gooɲaan tsìɛ̀ sapɛ mɛɛy bou à vu ra. Gooɲaan giri tsìì ma mɛɛy bo mòò riì vu ra, tà tsìfa ɲan kɛ̀ɛ̀n bà dzyɛ̀n.»

⁴⁸ Yesù yeè dzin taàn nà tɔ̀un ci: «Wo re gooɲaan tsìɛ̀ mɛɛy bou wo vu ra.»

⁴⁹ À ko nìì reè na ni ɲwɛɛ̀n nà esire, twɛy yè e maa yè dziàn e duùn ci: «Ee ! Nèe tsì rii tà tsuru, è bà gooɲaan tsìɛ̀ mɛɛy boò mòdzian vu ra ?»

⁵⁰ Tà ko e sa ra, Yesù yè dzin taàn nà ci: «Wo ɲɛn niì fau mun na, tà wo tsiu. Bèe ! Ŋaa yè b'à ko xɛɛrɛ tsi !»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ