အွန်လိုင်း သမ္မာကျမ်းစာ

Lukì 2 - Bible Dzùùngoo Unicode

Yesù keremàà
( Matsiyù 1.18-25 )

¹ Àyìwà, tɔ̀ waatsi rɔn, màsa bla sɔn na ni Ɔ̀rɔ̀mùn jamaan ɲàn, è bà tsùuŋnà jàmàan giri kùùn. Tɔ̀ màsaa tsoo na ci Ogisì. Tɔ̀un, Ogisì yè dzin jàmaàn mòdzian sapɛ tsoo yè sɛbɛn, è dzii yè tɔ̀.

² Tɔ̀ na tà goò fa jaa jɔ̀na nì. À goò faa waatsi riì bwèy, tɔ̀ y'a tàrà Siiri jàmààntsià tsoo ci Kirinisì.

³ Tà tsoo sɛbɛɛn doùn, à na deò ci mòdzian sapɛ yeè bè e raa fa e fatsii doùn.

⁴ Tɔ̀ ɲan, Yusufù sa yeè bo Nazarɛtsì nìi Galile mar'la wɔ̀ɔ̀ sɔn, è bè Bɛtsilɛmùn, Yude mar'la ɲàn. Màsà kpiri Dawudà kereu tà wɔ̀ɔ̀ rìì ɲàn. Yusufù bèu mɔn, kàtsu à sa na Dawudà raa tsua mòdzian sɔn ni.

⁵ À bèkɔɔn, à ko e re màkùn taan Mariyamùn yè bè e si re, yè bè e tsoò sɛbɛn. Tɔ̀ y'a tàrà doòn na ni Mariyamùn ɲàn.

^6-7 È bèu wɔ mɔn Bɛtsilɛmùn, yè b'a jà ci tɔn'leè yè e jaa gbà nìi doùn, tɔ̀ gbàà ŋòoŋnà. Tɔ̀un, dzwɛkà rèè raa gàne rìi ni, yè bè mɔn. È bèu mɔn, Mariyamùn kere waatsi yeè nà wɔ. Tɔ̀un, Mariyamùn yè e dzin jɔnaa kere, dzin kpiri. À kereu, è vya don sɔn minin minin à mà. Tɔ̀ y'a tàrà, shùkondo sɔn na ni tɔ̀ gàne rɔ̀n, è dzwɛkà rèè rè vun ɲɔnàmaà jia nìi doùn. Tɔ̀un, yè dziɛ̀n sen, yè bè à ɲɛn tɔ̀ shùkondoò doùn.

⁸ Àyìwà, sàà kplàtsuubaa swey na ni Bɛtsilɛmùn wɔ̀ɔ̀ joon nèè ɲàn, twɛy yè bà feèn faa mɔn e re sàà rèè tɛyn, yè è kààwɔɔ̀.

⁹ Àwà, tɔ̀ fen nɔ̀n, sàà kplàtsuu reè ni e re sàà rèè tɛyn, Ŋaablà re mɛ̀rɛ̀kɛ sɔn yeè e yɛrɛ kpadè è ra. Mùn Tsìfa Ŋaablà nɔɔrɔɔ̀ yè è laguru ko vyevyee ka. Yè shi tɔ̀un, fɔ è bè geren.

¹⁰ Tɔ̀un, mɛ̀rɛ̀kɛɛ̀ yè dzin è ra ci: «E maà shi waa. Mun naɔ̀ kùnàgoo dziù rìì dè ye ra, nìi nà bà Dzyèèsìbee mòdzian sapɛ taamadzibe goo.

¹¹ Fen nèe ɲan, mòo kereo màsà kpiri Dawudà tà rɔ̀n, nìi ye tsibaà. Ŋaabla wò rii boo e jaara, è bà Tsìfaà.

¹² Ye ye be, tàànmàshɛn niì nà à to y'a tɔ̀, tɔ̀ rii siin: Ye nà bè dzinyɛy sɔn ɲɛunma jà shùkondo doùn, vya don sɔn minin miniɔ̀n à mà.»

¹³ Tɔ̀ nɔ̀nkɔɔrɔn, mɛ̀rɛ̀kɛ rèè kuru brisi yè bo jìran nɔ̀n, yè nà e ba tɔ̀ mɛ̀rɛ̀kɛ soo tɛ̀y, yè e maa yè tsoo dzi ɲɛɛn Ŋaablà tsɛ nèe tsuru ci:

¹⁴ «Blàbee Ŋaablà rii laa, fɔ Ŋaablaxɔɔ̀ jiraàn doùn mɔn. Nìì reè to ni dzɔ̀nxɔɔmaà tsɛ, twɛy yè bà à sàò rà modzìn ì, à re jaancin yè bà ni twɛy tsɛ.»

¹⁵ Àyìwà, mɛ̀rɛ̀kɛ rèè tà goomaa dè dòu min niì, yè sèè e kpɛyn jìrànxɔɔ̀ doùn. Tɔ̀un, sàà kplàtsuu reè yè dzin e si ra ci: «Y'a to mùn y'a wa Bɛtsilɛmùn. Goo nìi faɔ̀, mùn Tsìfa Ŋaablà yeè bà à too ɲe y'à tɔ̀, è bo mɛ̀rɛ̀kɛɛ̀ ɲàn, fɔ ɲe yè tɔ̀ jà.»

¹⁶ Yè e tabe be tɔ̀un. È bèu wɔ, yè Mariyamùn, ko Yusufù ko dzinyɛɛ̀ jà, dziɛ̀n ɲɛɔ̀n shùkondoò doùn.

¹⁷ Àwà, sàà kplàtsuu reè dzinyɛɛ̀ jàu min niì, mɛ̀rɛ̀kɛɛ̀ nìi dèu è ra à re goò ɲàn, yè e ji yè tɔ̀ lakɛɛ.

¹⁸ Gè o ge tà goomaa myɛ̀un sàà kplàtsuu reè dzu, à jiu è sapɛ dzii tsɛ.

¹⁹ Twɛy goo rèè pɛn naà boò Mariyamùn duùn waa. Waatsi giri à na e kɛsɛɛ̀ è ra.

²⁰ Àyìwà, tà shɔ̀ùn sàà kplàtsuu reè yè e kpɛyn sèè. È bèkɔɔn, è nìi sapɛ myɛun, ko è nìi sapɛ jau, yè blàbe ko tsoo dzi ɲɛn beè Ŋaablà tsɛ twɛy goo rèè rà. È na tɔ̀ faa, kàtsu mɛ̀rɛ̀kɛɛ̀ y'à dèu è ra nìi tsuru, à sapɛ kuun tɔ̀ rii tsuru taki.

Yesù bèu kɛ̀ɛ̀yfa min niì Ŋaablà ma gbà blàa rà

²¹ Dziɛ̀n kereomaà nàu bwèy ŋaalòn tsyɛn, y'à shɛn. Tɔ̀un, y'à tsoo wɔ Yesù. Sani Mariyamùn yè doòn sen, mɛ̀rɛ̀kɛɛ̀ na tà tsoò rìì kpàdeò.

²² Àwà, kɛɛra Musà rè sàrìyaa nìi kpàdeò, ci taàn kereomaà shɔ̀ùn à wù è waatsi niì fa ker'lakɔɔn gbaà doùn, è kòmànà fɛnɛbe, Yusufù, ko Mariyamùn y'à to fɔ tɔ̀ waatsia yè bè tsyɛn. Tɔ tsyɛun, yè kòmànà dziɛ̀n sen, yè dɔ̀n be à ka Yerusalɛmùn, yè b'a kɛ̀ɛ̀yfa mùn Tsìfa Ŋaablà ma,

²³ kàtsu à sɛbɛɔ̀n tɔ̀ re sàrìyaa doùn nèe tsuru ci: «Dzin jɔna ge o ge, è ba dzin kpiri, tɔ wù è to Ŋaablà re e si.»

²⁴ Àwà, mùn Tsìfa Ŋaablà re sàrìyaa to y'à gaa ci nìi yè bo saaka, yè tɔ̀ sa bo, nìi yɛ: kerenaantsi fii, tàmafa màsàkèrè dzin fii.

²⁵ Àyìwà, kpiri sɔn na ni Yerusalɛmùn yè bà à kir'là ci Simeyɔn. Tɔ̀ kpir'la na tereòn, è bà shia Ŋaablà jɔun. Ŋaablà na à làyiri seòn, ci wò Jaara Moo rìi nà Isirayɛlì mòdzin neè tsi, Simeyɔn na tɔ̀ rii màshua. Ŋaablà re Dzi Fɛnɛɛ na ni à ɲan.

²⁶ Tɔ̀ Dzi Fɛnɛ ree rìì na à kpàdeò à ra, ci mùn Tsìfa Ŋaabla nà e Jaara Modzìn nìi ka na, ci à fa san fyeu, à mà bà tɔ̀ jaɔ̀ e jaa ra.

²⁷ Àwà, Ŋaablà re Dzia yè Simeyɔn jaa ji Ŋaablà re gbà blàa rà, è bè dɔ̀n à fɔɔn doùn. Sàrìyaa nìi kpàdeò, ci è fa, Yesù naà, ko à fàà yè nà dɔ̀n à ka Ŋaablà re gbà blàa fɔɔn doùn, ci ye nà tà shi jiì à re.

²⁸ È nàu dɔ̀n à ka min niì, Simeyɔn yeè Yesù tsi, à y'à kun e suun. Tɔ̀un, è tsoo dzi ɲɛn Ŋaablà tsɛ nèe tsuru ci:

²⁹ «Àyìwà, mùn Tsìfaà, wo na làyir'lìi seòn, dòònuùn à bou e shi tsɛ. A dzia a re jòn kpir'là rè kɛ̀ɛ̀yfaa tsi dòònuùn, à y'à waa xɛɛrɛ ra.

³⁰ Wo ci nìi nà mòdzian tsi, mun yɛ̀r'la jaadzin fiɛ̀ tɔ̀ jàu she.

³¹ Wo wò rii ka dziɲan modzian sapɛ jɔun wɔ tsùuŋnà.

³² À vyevyee rìì, nìi nà à to dziɲantsiɛ mòdzian sapɛ yeè wo tɔ̀. À baraka rɔ̀n, wo re mòò rèè nà tsoo dzi tarà nìi Isirayɛlì mòdzin neè.»

³³ Simeyɔn na nìi sapɛ deè Yesù rè goò ɲàn, tɔ̀ na jiɔ̀ à fàà, ko à naà sa dzii tsɛ.

³⁴ Tɔ̀un, Simeyɔn yeè dzwɛ ji è ra. Nìi Mariyamùn Yesù naà, è dzin tɔ̀ ra ci: «Nèe dzin nìi yɛ nèe, Ŋaablà y'a boo, è bà saabu mòò giri yè mɛɛy, tà ko mòò giri yè fù Isirayɛlì mòdzian ɲàn. À nà bà Ŋaablà re tàànmàshɛn kpadèuma mòdzian nà, è fa e tsiì nìi rà waa.

³⁵ Tɔ̀ tsuru mòò giri duungoo dzuun nà bo ji vyevyeè rà. Nìi wo Mariyamùn goò sɔn ɲinìnbe nà dɔ̀n wo ɲan, a ci kaamunun nì ka wo vɔɔ̀.»

³⁶ Àwà, Ŋaablà re kɛɛra taan sɔn sa na ni mɔn, yè bà na tɔ̀ kir'là ci Anì. Àwà, Anì naa fàà tsoo na ci Fanuyɛlì, nìi Asɛr'laa tsua mòdzian sɔn. Anì sìà na wɔɔ sɔn ma. Kpir'liì y'à cangurukɔɔn màgoo fau, à jii ɲɛɛ̀nun nì fau ko tɔ̀ ka.

³⁷ Tà shɔ̀ùn, tɔ̀ kpir'la yè dò, à y'à to. Tɔ̀un, Anì yè to e soone, à sìà yè bè wɔ fɔ jii cɛɛ̀n ko dzin nààlen. Kudɛyn, à na ni Ŋaablà re gbà blàa fɔɔn doùn. Feèn ko bwèè sa, à na goo faa Ŋaablà re, nìi yɛ, à suàn wɔɔ̀, è bà Ŋaablà mafyɛ̀ɛn.

³⁸ Àwà, è Yusufù, ko Mariyamùn, ko Yesù to Ŋaablà re gbà blàa doùn mɔn, tà waatsi soo ɲàn, Anì sa yeè wɔ mɔn. À wɔu mɔn, è tswɛ̀y sin Ŋaablà ra. Tɔ̀un, nìì reè sapɛ taa na ni à mà, ci Ŋaabla nà Yerusalɛmunka reè tsi, è dziɛ̀n gooma de twɛy sapɛ ra.

³⁹ Àyìwà, mùn Tsìfaà rè sàrìyaa na nìi gaa ci è fa, Yesù ker'làgè rèè nàu tɔ̀ goo rèè shi jii do waatsi riì bwèy, yè e kpɛyn sèè na e re Nazarɛtsì, Galile mar'la ɲàn.

⁴⁰ Àwà, dziɛ̀n yè bɔɔ bèe, à akir'là sa yeè bɔɔ bèe. Akiriblabe na ni à ɲan, Ŋaablà taa yeè bà na ni tsuù à mà kudɛyn.

Yesù jii teeŋ fii, yè b'a ka Ŋaablà re gbà blàa doùn Yerusalɛmùn

⁴¹ Jii sapɛ è re sɛr'lìi na kir'là ci Geren n tsɛ, tɔ̀ waatsi ye ba na wɔu, Yesù ker'là gè rèè na bèe à fa Yerusalɛmùn.

⁴² Yesù sìà nàu jii teeŋ fii tsyɛn jii riì rà, sɛr'là làndà shià jììŋ'n kùrù bɔrɔɔ tsɛ, à ker'làgè rèè yè fù, yè dɔ̀n be à ka Yerusalɛmùn.

⁴³ Sɛr'là goo rèè nàu dò min niì, Yusufù, ko Mariyamùn yè fù, yè e re tsii shià kun. Jàa, Yesù tou è shɔ̀ùn Yerusalɛmùn, è na à ɲantɔ waa.

⁴⁴ Àyìwà, y'à siɛ̀n, ci Yesù nà bà ni ye jìì fà si rèè ka nìi fa, yè geren jìɛ̀ rè tà tsuru, fɔ bwèy sɔn. Tɔ̀un, yè nà e maa, y'à gaa beè e neema reè, ko e tɔ si rèè fi.

⁴⁵ È tɔ̀ sapɛ fau, è na à jà. À na na wùbe, yè e kpɛyn sèè, y'à gaa na, fɔ Yerusalɛmùn wɔ̀ɔ̀ doùn e shɔùn.

⁴⁶ À gaakɔɔn bwèy zhììgìraa sii sèè, yè bè à jà Ŋaablà re gbà blàa fɔɔn doùn. À na tsùuŋnà Sàrìyà Kaamoo reè ka, è bà e toro wɔɔ twɛy rè, è teè sa.

⁴⁷ Gè o ge na ni mɔn yè bà e toro wɔɔ à re, Yesù rè akiriblabeè, ko à re goomaa latsiu'n kur'la na jiɔ̀ twɛy sapɛ dzii tsɛ.

⁴⁸ À ker'làgè rèè y'à jàu min niì, à goò yè ji twɛy sa dzii tsɛ. Namaa yè dzin à ra ci: «Mun dziàn, wo nèe fau ɲe ka feera ? Mun ko wo fàà sa duungoo dooma nì na wo gaa beè.»

⁴⁹ Yesù yè dzin è ra ci: «Feera, ye yè bà na mun gaa ? Ye naà à tɔ̀ ci à wù min bà ni n faà rè goo rèè rìì là gbɛ ?»

⁵⁰ Àwà, Yesù tɔ̀ dèu, è na dzi tɔ̀ dzuun taki tɔ à re waa.

⁵¹ Yesù yè fù è ka tɔ̀un, yè dɔ̀n na Nazarɛtsì. À re blàbe na ni è tsɛ. Twɛy goo rèè gè o ge na faa, à sapɛ na toò à naà duùn.

⁵² Àwà, Yesù yè bɔɔ bèe, à akir'là yè blàbe beè, à goò dzi Ŋaablà ra, à goo yè bà dzi mòdzian nà.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ