အွန်လိုင်း သမ္မာကျမ်းစာ

Korɛntsika reè fiiraa 2 - Bible Dzùùngoo Unicode

¹ Àwà tɔ̀ kamà, mun y'à ji n duùn, ci mun fa n kpɛyn sèè ye re mɔn taamaŋununbeè ɲàn kɔn kpɛrɛ waa.

² Min ba ye taama ŋununbe saabu, tsì rii nà taamadzibe sìn mun na ? Mun mòò riì taama ŋununbeò, à na tɔ̀ ɔ̀ ?

³ Tɔ̀ rii na mun ne sɛbɛɛn fa kuàn, nìi yɛ mun mà nà bè wɔ, nìì reè wù yè mun taama dzibe, twɛy yè mun taama ŋununbe waa. Mun ɲɛɔ̀n à ra ye soo sookɔɔn sapɛ kajaa tsɛ, ci mun ne taamadzibeè ye sapɛ raa rìì.

⁴ Mun ko byɛnbe brisi, ko vununkɔn ko jaayu bùù rìì nèe sɛbɛn nee fau, m'a sìn ye ra. Mun na à fa m'a ka ye taama ŋununbe dɛ, ŋà ye bà ni à tɔ̀ rii, ci mun ye kɛ̀niɔ̀n fɔ è bè geren.

Polì ci yè e yɛrɛ to fìrìgòòtsià rè

⁵ Mòò ye ba bàu taamaŋununbe saabu, à na mun bàsɔùn taama ŋununbe waa, ŋà à ye sapɛ rii, tàmafa ye swey, mùn mà nà à dè m'à si tsi geren waa.

⁶ Mòò giri nìi dèu ye ɲan, y'à ka tɔ̀ kpir'la jààki, tɔ boyi faa.

⁷ Ye nìi fa, tɔ̀ rii yɛ ye e yɛrɛ to à re, ye vununcin sìn à ra, taamaŋununbeè si mà nà tsi geren à mà waa.

⁸ Tà doùn mun nà nìi ka ye màxɔ̀n, tɔ̀ rii yɛ y'a kpàdè à ra ci ye y'à kɛ̀niɔ̀n.

⁹ Àwà mun ne sɛbɛɛn fa kuàn sɔn ni siin kɔn, min ye dzuun bo siin, min bà ni à tɔ̀, ye ye ba mun vu kuɔn goò sapɛ doùn o.

¹⁰ Ye ye e yɛrɛ to mòò riì rè, mun sa yeè n yɛrɛ toò tɔ̀ tsìfa re. A to y'a jà min n yɛrɛ tou goò sɔn na sɔn ne, mun tɔ̀ fau ye rii kamà, è ɲɛn à tsɛ Kirisà jaà ni mun na.

¹¹ Tà tsuru, Sùtana fa nà dzi tarà mùn tsɛ waa, kàtsu mùn na fìriɔ̀ à duungoo mà waa.

Polì vyɛ̀ɛ̀yràgoo Torowasì wɔ̀ rɔ̀n

¹² Àyìwà, min bè wɔ Torowasì wɔ̀ rɔ̀n tɔ̀un, ci mun nà Kirisà rè Kùnàgoo Dziɔ̀ dè. Mun wɔu mɔn, min b'a jà Tsìfaà dziɛ san jiɔ̀ mun ne mɔn.

¹³ Tà ko e sa ra, mun akiri naà tsùuŋnà waa, è ɲɛn à tsɛ mun na n neema kpiri Tsitè jà waa. Mun to yè shi gaa è re tɔ̀un, min dɔ̀n be Maseduwanin mar'lɔùn.

Poli ci dzia tàr'la Kirisà rìì baraka ɲan

¹⁴ Baraka yè sìn Ŋaablà ra, wò riì mùn bàa dzibaa e ka waatsia sapɛ doùn Kirisà baraka rɔ̀n, à y'à to ɲe saabu rɔ̀n Kirisà yè tɔ̀ min niì sapɛ, a ci ɲinin kinin dziù.

¹⁵ Ɔ̀ɔn, nìì reè ni bar'la gè doùn, ko nìì reè ni tsià gè doùn, ɲe ni Ŋaablà re a ci Kirisà rè ɲinin kinin dziù twɛy fi.

¹⁶ Swey rè à saàn kinin nì saàn kamà. Swey rè è bà jaamabee kinin, jaamabee kamà. Tsì rii soo to dzia tɔ̀ faagoò fa ?

¹⁷ Mòò giri ni, twɛy Ŋaablà re Goomaa baɔ̀ durukun. Ɲe na ni a ci twɛy waa. Ɲe goomaa fyɛɔ rìì tsɛ. Ɲe tɔ̀ faa è bo Ŋaablà rii lè, Ŋaablà jaa ra, ko Kirisà ɲàn.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ