အွန်လိုင်း သမ္မာကျမ်းစာ

Dzyèèsìbee mòdzin neè 8 - Bible Dzùùngoo Unicode

Yesù Saaka Jɔundzin, nìi ko dzyee rèè na soo waa

¹ Àyìwà, mùn yɛ nìi sapɛ deè nèe, tɔ̀ goò kùngɔɔ̀ rìì yɛ, ci tɔ̀ tsuru Saaka Jɔundzin ni ɲe re, nìi tsùuŋnà Ŋaablà re màsà gbaaniɛn sirama si jaa rè, ŋaablaxɔɔ̀ doùn.

² À ni e re Saaka Jɔundzinbee faagoò rà Ŋaablà re bùù gba vyamaa gàne fɛnɛɛ doùn. Tɔ̀ bùù gba vyama taki takìà, mòdzin ì na tɔ̀ gbaɔn waa, ŋà, Tsìfa Ŋaablà yɛr'la rìì y'à gbaɔn.

³ Saaka jɔundzian gè o ge, à tsùuŋnà nì, è bà kwɛ̀y faa gè rèè, ko saaka rèè ladzia Ŋaablà tsɛ. Tà doùn Yesù, ɲe raa saaka jɔundzian, tɔ̀ sa wù, è bà ge ì ladzia Ŋaablà tsɛ.

⁴ È bà na ni dzɔ̀nxɔɔ̀ rìì tsɛ, à yɛ̀rɛ̀ fa bà saakagoojaabobaa tsu waa, kàtsu, saakagoojaabobaa ì ni nòn, yè bà kwɛ̀y faa gè rèè ladzia Ŋaablà tsɛ, a ci Musà rè sàrìyaa y'à kpàdeò nìi tsuru.

⁵ Twɛy saaka goojaabo reè faagoò faa bùù gba vyamaa gàne fɛnɛ riì doùn, tɔ jìran nɔ̀n naà bosi rìì, è bà à ɲɛyn. À ni a ci Ŋaablà y'a kpàdèu Musà rà nìi tsuru bùù gba vyamaa gban bwèy rɔ̀n. Ŋaabla dziun ci: «Musà, à fau'n kur'liì kpàdèu wo ra jèèn tsɛ, a maxɔbe, a fa tà tsuru.»

⁶ Dòònuùn, nìì Yesù, saaka goojaabo niì wɔɔ tɔ̀ suun, tɔ ni saaka goojaabo dzyee reè raà jɔun peu, kàtsu à sòròn fau, è dzyèèsìbè ye riì dɔ̀n Ŋaablà ko mòdzian fi, tɔ̀ dzyèèsìbee vùn jɔ̀naà mà peu. Tɔ gbaɔn làyiri ì tsɛ, nìì reè tsuru na ni waa.

Dzyèèsìbè yee ni bɔrɔɔ jɔun

⁷ Àwà, Dzyèèsìbee jɔ̀naà yè bà na bàu dzyèèsìbe nìi dzii tsyɛɔ̀n, dzyèèsìbe kpɛrɛ yè gaa kɔn, tɔ̀ yeè ka à ɲancinan, tɔ̀ kùn naà ni dɛ.

⁸ Ŋà m'à jàa, ci Ŋaablà jàaŋ e re mòò rèè rà è re fìrìgoo rèè kàjaa tsɛ, nìi doùn à ci è ra ci: «Àwà, Jisee ì nàa, mun Dzyèèsìbee Ŋaabla mun nà Dzyèèsìbe yeu wɔ Isirayɛli tɔɔn mòdzin neè ko Yuda tɔɔn mòdzin neè ka.

⁹ Mun yè è fàbɔɔ rèè kuun e si ra jisee riì, mun yè bo è ka Misiran jamaan doùn, mun Dzyèèsìbe riì wɔu è ka, à fa bà tɔ̀ tsuru dzyèèsìbe waa. È yɛ̀r'leè rìì tɔ̀ dzyèèsìbee barau. Tɔ̀ kamà, mun Dzyèèsìbee Ŋaablà, mun sa yeè n magoo bo è ɲan.

¹⁰ Àwà, twɛy jisee reè shɔ̀ùn, mun nà Dzyèèsìbe riì wɔ ko Isirayɛlì mòdzin neè ka, tɔ̀ rii siin: Mun Dzyèèsìbee Ŋaablà, mun nà n ne sàrìya reè ji è akir'là ɲàn, mun y'à ɲììri è vunun tsɛ. Mun nà bà è re Ŋaablà, yè bà mun ne mòdzin ì.

¹¹ Sɔn yeè bà ni e fadzìnsi tàmafa e neema karàn è ɲan kɔn, ci è mun tɔ̀, tɔ gooma fa bà ni à ɲan dɛ, kàtsu mòdzin kiɲaanin sen ɲɛn modzin bla tsɛ, è sapɛ nà mun tɔ̀.

¹² È ɲɛn à tsɛ, è re terenbɛy goo reè, mun nà n yɛrɛ to è re twɛy rà, mun to fa n taa to è re gooɲaantsii reè rè dɛ fyeu.»

¹³ Àwà, Ŋaabla tɔ̀ Dzyèèsìbee kiri nìi fau ci Dzyèèsìbè ye, à jɔ̀naà bàu bɔrɔɔ. Gèè to ye bɔɔ, à mà bà màgoo wubee dɛ, à bèe fìrìma nì.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ