အွန်လိုင်း သမ္မာကျမ်းစာ

Dzyèèsìbee mòdzin neè 3 - Bible Dzùùngoo Unicode

Yesù rìì blà Musà mà

¹ Tɔ̀ rii kamà n neema ì, Ŋaabla ye nìì reè kiriɔ è ye bà e raa, m'a gaa, ye e akiri to Yesù tsɛ, wò rii Ŋaablà re kɛɛraa è bà Saaka Jɔundzin, Ŋaablà re shia doùn, mùn tɔ̀ niì goo dèe.

² Àwà, Ŋaablà na Yesù boo faagoo nìi kamà, à bàu vu soo tsi Ŋaablà re, a ci Musà sa bàu vusootsi nìi tsuru dan, Ŋaablà re mòò rèè sapɛ re.

³ Gbàjibaà tsoo tàr'la nìi tsuru è geren gbà jiumaà tsɛ, tɔ̀ soo tsuru, Yesù sa wù blàbee ka, è geren Musà tsɛ.

⁴ Tɔ̀ gbà na ni mòò na nìi jiɔ̀ waa, mòò riì to gè sapɛ ɲɛun, tɔ Ŋaablà rii.

⁵ Musà kpɛ̀yn bàu vusootsi Ŋaablà re gbàà doùn, nìi Ŋaablà re mòò rèè, à to na faagoofadzin ni Ŋaablà re. Ŋaablà y'a tsùuŋ è wò re gooma reè ladzia mòdzian tsɛ.

⁶ Nìi Ŋaablà Jaara Modzìàn, à re dzin kpiribee doùn, tɔ̀ sa vusootsi à tsùuŋmaà doùn Fà Ŋaablà re mòò rèè sapɛ kuùn. Mùn kpɛ̀ynto à re mòò rèè, Ŋà, fɔ mìn to goo soo tsɛ, à wù mùn akiri yè bà tsùuŋnà, mùn si yè bà xɔ à tsɛ, tɔ̀ riì mùn wàsaà goò.

E to ɲɛn bɛy Ŋaablà ra, nìi ni tɔ̀ ɲan

⁷ Tɔ̀ rii y'à to, Ŋaablà re Dzia yè dzin nèe tsuru ci: «E ye Ŋaablà gooma vuà myɛ̀n she,

⁸ e maà e ba à myɛ̀n bɛy waa, a ci ye fàbɔɔ rèè y'à fau nìi tsuru jènjàà kor'nà doùn. Tɔ̀ waatsi rɔn, twɛy yè e mabaun Ŋaablà re, y'à dzuun bo siin.»

⁹ Ɔ̀ɔn, Ŋaablà ci: «Ye fàbɔɔ rèè mun dzuun bo siin jènjàà kor'nà doùn, tɔ̀ to y'à tàrà, è mun ne goo fakɔɔn reè jàu mɔn,

¹⁰ è bè tàrà fɔ jii dzyeè. Tɔ̀ rii kamà, mun vunun yè ta tɔ̀ jàmàkur'là mòdzin neè kpɛyn, mun to yè dzin ci: "Kudɛyn, è akir'là nàa fìrì ka è mà, mun taa ni à mà yè shi niì jìì, è na tɔ̀ tɔɔ̀ waa."»

¹¹ Tɔ̀un, mun ne vununtaà doùn, min n kɛɛ̀y ci: «Mun ɲànwɔma nìi lamɔnɔ̀n tsùuŋnà, min bà ni mɔn, è fa dɔ̀n mɔn dɛ fyeu.»

¹² Tɔ̀ gàneè doùn, n neema ì, ye e yɛrɛ kaàwɔ, mòò mà nà jà e ɲan, akiri ɲaan ni nìi ɲàn, à na ɲɛɔ̀n Ŋaablà ra waa, fɔ è bè bà saabu, è nɔn Ŋaablà jaamaa rè waa.

¹³ Tà doùn, màan ji o ji seroun, mìn bà dziàn ci 'she', ye e si màxɔ̀n, sànko, mòò mà nà jà e ɲan, gooɲaan nà nìi sàn fìrì, à y'à bà mòdzin nìi na e toro wɔɔ̀ Ŋaablà re waa.

¹⁴ Àwà, mùn ɲɛun Ŋaablà ra nìi tsuru fɔ à dziikuan, mùn ye to tɔ̀ tsɛ è bè suu fɔ à lataan dzu, mùn kpɛ̀yn Ŋaablà Jaara Modzìàn dzyèèsi rèè.

¹⁵ À deò nèe tsuru Ŋaablà re Goomaa doùn ci: «E ye Ŋaablà gooma vuà myɛ̀n she, e maà e ba à myɛ̀n bɛy waa, a ci ye fàbɔɔ rèè y'à fau nìi tsuru, yè bà na e mabaɔn.»

¹⁶ Àwà, tsi ì rìì Ŋaablà gooma vuà myɛ̀un, è to yè e maban Ŋaablà re ? Musà bou nìì reè sapɛ ka Misiran jamaan doùn, à na twɛy ɔ̀ ?

¹⁷ Ŋaablà yeè e vunun tau tsi ì rìì kpɛyn, è bè tàrà fɔ jii dzyeè ? Gooɲaan nìì reè sàn fìriu, è to yè san to jènjàà kor'nà doùn, à na twɛy ɔ̀ ?

¹⁸ Tsì ì rìì to y'à tou, Ŋaablà yeè e kɛɛ̀y nèe tsuru ci: «Mun ɲànwɔma nìi lamɔnɔ̀n tsùuŋnà, min bà ni mɔn, è fa dɔ̀n mɔn dɛ fyeu ? Nìì reè na ɲɛn à ra y'à dzugoomaa shi jiì, à na ye o ?»

¹⁹ Àwà, m'à jàa, ci è ɲɛnbɛybeè kamà Ŋaablà ra, è na dzi dɔn tɔ̀ ɲànwɔma nɔ̀n waa.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ