Dzyèèsìbee mòdzin neè 1 - Bible Dzùùngoo Unicode

Dzin kpir'liì boo Ŋaablà ɲan, tɔ blà mɛ̀rɛ̀kɛ rèè mà

¹ Dan dan, Ŋaabla goomau ɲe fàbɔɔ rèè ka, è bo à re kɛɛra reè dzu. À tɔ̀ fau jaa giri, à y'à fa fau'n kuru gir'la.

² Ŋà dòònuùn, nèe waatsi latan nee doùn, à goomau mùn ka, è bo e Dzin Kpir'la ɲàn. Àwà, Ŋaabla gè sapɛ ɲɛun è bo wò rii ɲàn, à to gè sapɛ tsifàbe wɔɔ wò rii suun.

³ Ŋaablà blabee vyeè, tɔ wò rii, Ŋaablà to ni niu'n kur'liì rà taki, à sa ni tɔ̀ rii tsuru. À dzugooma barakamaa rìì kamà, dziɲan doùn gè sapɛ ma kun tsùuŋnà. Wò rii mòdzian fɛnɛbeu gooɲaantsiɛ yè bo è vu ra. Tɔ̀ faumaà nì shɔ̀ùn, à bèu e tsuù màsa blaa sirama si jaa rè jìrànxɔɔ̀ doùn, nìi Ŋaablà.

⁴ Tà tsuru, tɔ̀ Dzin Kpir'liì boo Ŋaablà ɲan, tɔ bàu ni dziira, è geren mɛ̀rɛ̀kɛ rèè tsɛ, kàtsu, Ŋaabla tsoo sìun à ra, nìi blà mɛ̀rɛ̀kɛ rèè raà mà peu.

⁵ Àwà, Ŋaabla dzin jàu mɛ̀rɛ̀kɛ rèè kɛ̀n ni nà nèe tsuru ci: «Wo rìì mun Dzin Kpir'la, Mun bàu wo Fàà she.» À to dzin jàu è kɛ̀n ne goo ɲan nèe tsuru kɔn ci: «Mun nà bà à Fà, è bà mun dzin.»

⁶ Ŋà, Dzin Kpir'liì boo Ŋaablà ɲan, è bà ni gè sapɛ jɔun, à ci e ye tɔ̀ ka na dziɲan doùn waatsi riì bwèy, à dziun ci: «Mɛ̀rɛ̀kɛ rèè sapɛ yeè e kuu à bììn, y'à blàbe.»

⁷ Nìi mɛ̀rɛ̀kɛ rèè, à ci twɛy raa goò ɲàn ci: «Mɛ̀rɛ̀kɛ rèè, twɛy fyɛn tsuru kɛɛra ì mun ne, yè bà sàden tsuru faagoofadzin ì.»

⁸ Ŋà, à Dzin Kpir'la, à dziun tɔ̀ raa goò ɲàn ci: «Dò na ni wo raa màsàbee mà waa Ŋaablà. Wo màsàbee faa a re mòò rèè tsɛ ko sààben ka.

⁹ Goo nìi tereòn, tɔ̀ rii dzi wo ra, gooɲaan yè bà xɔ wo mà. Tɔ̀ rii y'à to, Ŋaablà, wo re Ŋaabla wo bou e si, è ɲinin kon wo kùùn, wo yè bà blà a dzyeèsi rèè sapɛ ma, tɔ̀ yeè bà taamadzibe brìsi wo re.»

¹⁰ Ŋaabla dziun kɔn ci: «Goo rèè jɔ̀n bwey, Tsìfaà, wo rìì dzɔ̀nxɔɔ̀ ɲɛun, ŋaablaxɔɔ̀, tɔ̀ wo sifyɛ̀.

¹¹ Twɛy gè rèè sapɛ nà dò, ŋà wo, wo nà to tsùù a yɛrɛ tsuru kudɛyn. È sapɛ nà bɔɔ, a ci vya bɔɔ̀ nìi tsuru.

¹² Wo nà è minin, a ci moo mɛ̀yɛ bla min'na nìi tsuru, wo yè è ɲancinan, a ci moo vya wɔràma ɲancinaan nìi tsuru. Ŋà nìi wo, wo nà to tsùù a yɛrɛ tsuru kudɛyn, dò na ni wo sìà mà waa.»

¹³ Ŋaabla dzin jàu nòn mɛ̀rɛ̀kɛ rèè kɛ̀n na ci: «Nà a tsuù n sirama si jaa rè, fɔ min b'à ɲan rèè sapɛ wɔ a san dzuun.»

¹⁴ Mɛ̀rɛ̀kɛ rèè Ŋaablà re kɛɛra ì rìì, jaa na nìì reè jàa waa, yè bà ni Ŋaablà re faagoò rà. Nìì reè wù yè tsi gbey, Ŋaablà yeè è ka bèe, yè bè wɔ twɛy rà.