အွန်လိုင်း သမ္မာကျမ်းစာ

Goo kpàdèuma rèè 8 - Bible Dzùùngoo Unicode

Tàànmàshɛɛn ɲɛ̀ɛ̀nùnaa raa goo rèè

¹ Àyìwà, sààtòmòìriɛ tàànmàshɛɛn ɲɛ̀ɛ̀nùnaa warakau waatsi riì bwèy, jìrànxɔɔ̀ ŋɔ̀n yè dzin tɛn, è bè tàrà fɔ waatsi tara.

² Mɛ̀rɛ̀kɛ ɲɛ̀ɛ̀nun nìi yè e tsiɛ Ŋaablà jaaterema, min twɛy jà. Tɔ̀un, vuru ɲɛɛ̀nun yè wɔ twɛy suun.

³ Tɔ̀ ɲan, mɛ̀rɛ̀kɛ kpɛrɛ yè nà kɔn, tɔ̀ yeè nà e tsiì saakabomaà tɛyn, wushuna tsyɛn sɛnuma yeè bà ni à suun. Wushuna kinin dziù giri yè sìn à ra, è bà ni tɔ̀ ko Ŋaablà re mòdzin neè sapɛ re màfyɛyn nèè sìn esire saaka saakaboma sɛnumaa tsɛ, tɔ̀ niì ni màsà gbaaniɛn jaaterema.

⁴ Wushunaà sàtsur'la yè fù tèyn mɛ̀rɛ̀kɛɛ̀ suun ko Ŋaablà re mòdzìn neè rè màfyɛyn nèè ka Ŋaablà jaaterema.

⁵ Mɛ̀rɛ̀kɛɛ̀ yè wushuna tsyɛɛ̀n sen tɔ̀un, à y'à tsyɛn saakabomaà tsɛ sàà rà, à y'à kere dzɔ̀nxɔɔ̀ tsɛ. Tɔ fau min niì, ŋaà sɛ̀ɛ̀y vuà, ko gooma vuà, ko ŋaà myɛ̀ɛ̀nkɔɔn, ko dzɔ̀nxɔ̀ɔ̀mà kpin'na yè fù.

⁶ Tɔ̀ ɲan, vuru ɲɛɛ̀nuàn ni mɛ̀rɛ̀kɛ ɲɛ̀ɛ̀nun nìi suun, twɛy yè e mabyɛ̀n vuru fyɛɛ kamà.

⁷ Mɛ̀rɛ̀kɛɛ̀ jɔ̀naà yè vur'la fyɛ tɔ̀un. Sankaamadzian, ko sàà, ko tsìɛn gbiimaunmaà e si ɲan, tɔ̀ yeè kere ji dzɔ̀nxɔɔ̀ tsɛ. Dzɔ̀nxɔɔ̀ tara zhiigia tara soo sapɛ yeè dzu, gɔ̀ɔ rèè tara zhiigia tara soo sapɛ yeè dzu, vun ciraan sapɛ yeè dzu.

⁸ Tà shɔ̀ùn, mɛ̀rɛ̀kɛɛ̀ fiiraa yè vur'la fyɛ. Gè sɔn yeè fù tɔ̀un a ci jèn tsuru sàden brìsi, tɔ̀ yeè ji kòòyua ɲàn. Kòòyua tara zhiigia tara soo sapɛ yeè e lakere ba tsììn.

⁹ Kòòyu rɔn jaama ge ɲɛunma rèè tara zhiigia tara soo sapɛ yeè san. À tsɛ konkor'neè tara zhiigia tara soo sapɛ yeè bara.

¹⁰ Tà shɔ̀ùn, mɛ̀rɛ̀kɛɛ̀ zhììgìraa yè vur'la fyɛ. Swɛyn brìsi yè shɛn bo jìran nɔn, à deon a ci sàkɔ̀ɔ̀dziira, è nà mɛɛy ba rèè tara zhiigia tara soo tsɛ, ko donkungɔ reè.

¹¹ Tɔ̀ swɛɛ̀n tsoo na gè soòn. Tɔ̀un, yu rèè tara zhiigia tara soo sapɛ yeè sonbe. Twɛy yu rèè sonbee kamà, mòò giri yè san.

¹² Tà shɔ̀ùn, mɛ̀rɛ̀kɛɛ̀ nààlènaa yè vur'la fyɛ. Tɔ̀un, bwèè, ko kuɔ̀, ko swɛyn nèè baragoò yè twɛy tàrà, è tara zhiigia tara soo soo reè sapɛ yeè siin yè tsì. Bwèè tara zhiigia tara soo vyeè na ba bɛrɛ dɛ, feèn tà tsuru.

¹³ Àwà, mun siin fau kɔn, min bibi sɔn tsyɛunma jà jìran nɔ̀n mɔn seynfi, m'a myɛ̀n, tɔ dziàn fààn na ci: «Gooɲaan, gooɲaan, gooɲaan dzɔ̀nxɔɔ̀ mòdzian mà ! Gooɲaan dzɔ̀nxɔɔ̀ mòdzian mà, mɛ̀rɛ̀kɛ rèè dzyee zhììgia raa vuru fyɛɛ yè bà saabu !»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ