Efɛsika reè 3 - Bible Dzùùngoo Unicode

Kirisà raa goò gòndoo

¹ È ɲɛn tɔ̀ tsɛ, mun Polì, mun Yesù Kirisà rè kàsòdzin ye kun kpɛrɛ mòdzin neè kamà.

² Ŋaablà ɲanwùɔ doùn, à faagoo rìi kɛ̀ɛ̀yfaɔ̀ mun mà ci mun y'à fa ye kàjaa tsɛ, ye kpɛ̀yn toro jiɔ̀ tɔ̀ ɲan.

³ Mun yè tɔ̀ gòndoo tɔ̀, tɔ kpàdèu mun na ni, a ci mun y'à dɛyn sɛbɛn dɔun nìi tsuru mun y'à dè ye ra.

⁴ Tɔ̀ kàrànkɔɔn doùn, akir'lìi ni mun ne min dzi Kirisà rè gòndoo tɔ̀, ye yɛ̀r'la nà à jà.

⁵ Tɔ̀ gòndoo gooma na de waatsi dɔn boumaà mòdzin neè rà waa, a ci à yɛ kpàdèu nìi tsuru dòònuùn, Ŋaablà re kɛɛradzin neè ko kɛɛra reè rà, à re Dzia baraka rɔ̀n.

⁶ Tɔ̀ gòndoo rìì yɛ, Yesù Kirisà ɲàn, kun kpɛrɛ mòdzin neè, ko Dzyèèsìbee mòdzin sapɛ bàu e si shɛnsensi. È sa bàu gɔnkungɔ soo, è sa nin yè jà Ŋaablà re làyiri seunmaà ɲàn, Kùnàgoo Dziɔ̀ baraka rɔ̀n.

⁷ È kòrò Ŋaablà ɲanwùɔ kwɛ̀ygeè ka, à tɔ̀ niì sìun mun na e re dzibaabee faagoò baraka rɔ̀n, mun bàu tɔ̀ Kùnàgoo Dziɔ̀ faagoofabaa.

⁸ Mun nìi Ŋaablà re mòò rèè sapɛ ɲan kiɲaaniàn, à yè e ɲanwùù reè kɛ̀ɛ̀yfau mun nì mà, nìi yɛ min Kùnàgoo Dziɔ̀ dè kun kpɛrɛ mòdzin neè rà, Kirisà ɲàn nàforo dan tɔ̀ bɛɛ.

⁹ Tɔ̀ gòndo riì na mɛnɛn tsùuŋnà fɔ waatsi gbaan gè sapɛ ɲɛnbaa Ŋaablà ɲan, tɔ nà kun nìi tsuru, min tɔ̀ bo vyevyeè rà mòdzian sapɛ re.

¹⁰ Tɔ̀ yeè fa, gè riì ni à to, jìrànxɔ rɔ̀n kùntsii rèè ko fààntsi rèè y'à tɔ̀ dòònuùn ɲɛynamoo kur'là baraka rɔ̀n, Ŋaablà ɲan akiriblabee kaatsià giribee nìi boò.

¹¹ À tɔ̀ fau Yesù Kirisà ɲàn, mùn Tsìfaà, è kòrò à re goo dòbɛy sɔn byɛ̀unmaà ka.

¹² Kirisà rìì ɲàn, ɲɛynaà baraka ɲan à ra, mùn ko akiritsuu dzia e kpɛrɛ̀ Ŋaablà ra, mìn gooma à ka, mùn na shiɔ̀ waa.

¹³ Tà doùn, mun nìi gaa ye re, tɔ̀ rii yɛ, ci mun ni byɛnbe riì rà ye kamà, tɔ mà e gɔn vun waa. È ɲɛn à tsɛ, tɔ nɔɔrɔ rìì ɲɛɛn ye tsɛ.

Pol'lè màfyɛɛ̀n Efɛsì ɲɛynamoo kur'là rè

¹⁴ Tɔ̀ kamà, min kunun gbaàn Fà Ŋaablà biìn,

¹⁵ tɔ̀ niì tsoo ɲɛɔ̀n jìrànxɔ rɔ̀n mòdzìnbe reè ko dzɔ̀nxɔɔ̀ tsɛ raa rèè sapɛ tsɛ.

¹⁶ È ɲɛn à re nɔɔrɔ brìsià tsɛ, m'a gaa è fààn wɔ ye ɲan duùn nɔn ko dzibaabe ka, à re Dzia baraka rɔ̀n.

¹⁷ Àwà m'a gaa sa, Kirisà yè e tsuùma bo ye dùsùkuan doùn, ɲɛynaà baraka rɔ̀n. Ye jiɛ̀ ye gban kɛ̀nbààbee ɲàn, ye dzuun bau'n kuru yeè bà wù à tsɛ.

¹⁸ Tà tsuru, Kirisà rè kɛ̀nbààbee jaa blabee, ko a jaa gbanbee, ko a koobee, ko a tsunbee nìi boò, ye yè bà ni tɔ̀ fàànmun ko Ŋaablà re mòò rèè sapɛ ka.

¹⁹ Ɔ̀ɔn, ye yè Kirisà rè kɛ̀nbààbee tɔ̀, tɔ̀ niì gereon mòdzin tɔmaà sapɛ tsɛ, ye ɲan yeè bà ni tsyɛn Ŋaablà ɲan, tsyɛun'n kur'la sapɛ ra.

²⁰ À dzi ni Ŋaablà riì ɲàn è dzi goò sapɛ fa è geren mun ne gaaŋmaà ko mùn kɛ̀sɛmàà sapɛ tsɛ à re dzibaabee baraka rɔ̀n, tɔ̀ niì ni faagoò rà mùn ɲan,

²¹ arì she, nɔɔrɔ yè ɲɛn tɔ̀ tsɛ ɲɛynamoo kur'là doùn ko Yesù Kirisà ɲàn waatsia sapɛ modzin ì rè, waatsi sen ɲɛn waatsi tsɛ. Àmiinà !

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ