Tsìmotè jɔ̀naà 6 - Bible Dzùùngoo Unicode

Polì nìi dèu jòn nèè ko e kuntsii rèè, ko ɲɛɛn kɛ̀n gereunmaà tsɛ

¹ Àyìwà, nìì reè sapɛ ni jònbee gè doùn, è sapɛ yeè dan e kuntsii rèè ɲàn, yè è blàbe, gè riì ni à to Ŋaablà tsoo mà bara waa, ko kàr'nà.

² Nìì reè kùntsii ɲɛynamoo ì, twɛy mà to e kuntsii rèè blàbe bɛy kàtsu yè e si neema ì waa. Ŋà, yè sɔn ni bà e re faagoò tɛ̀y fau'n kuru wuu ra è re, è ɲɛn à tsɛ, è ɲɛynamoo ì rìì ko neema kɛniunma ì, nìì reè yè è re faagoò nàfa tàr'la. A naà goo nìì reè kàràn mòdzian nà e màxɔ̀n à ra, twɛy rìì yɛ.

³ Mòò riì kàràn kpɛrɛ sìan, nìi yè e si mùn Tsìfa Yesù Kirisà rè gooma taki reè rà, à ko Ŋaablà jɔun shiɲaanbee goomaa to na soo waa,

⁴ tɔ mòdzin, nìi tsyɛɔ̀n yɛ̀rɛ̀blàbeè rà, à na gèsɔn pɛn tɔ̀. Sɔ̀swɛy gɔ̀r'la ko gooma ì kùùn kaa, twɛy rìì ɲinin ni à ra. Twɛy rìì nàa jaaɲininbeè, ko kaà, ko tsoo bar'la, ko ŋɛ̀nɛ̀ɲàn ɲaan,

⁵ ko sɔ̀swɛy xɔù dòbɛy mòdzin akiri barauma ì ko e si fi, sààbeen na ni è ɲan waa, è to yè bà Ŋaablà jɔun shiɲaanbeè jàa tɔ̀nɔ̀n tàrà shi.

⁶ À sààben, Ŋaablà jɔun shiɲaanbeè tɔ̀nɔ̀n tàrà shi blà, ŋà fɔ a suun naà yè bà a jaa cɛɛ̀n.

⁷ È ɲɛn à tsɛ, mùn na na gèsɔn pɛn ka dziɲaan doùn, mùn to na naà sèè gèsɔn pɛn ka.

⁸ Tà doùn, dziira ɲwɛɛ̀n ko vya wɔràma ye ba ni nòn, tɔ boyi faa.

⁹ Àwà nìì reè sapɛ y'a gaa ye yè bà gètsi, dzuunbweè twɛy sapɛ tar'la. È kur'la goo ɲaan ɲaùn gir'lèè yɔ̀ɔ̀ yè è kuàn, twɛy nìì reè mòdzian bar'la, yè è kùngɔ fìrì peu.

¹⁰ È ɲɛn à tsɛ, ɲɛɛn kɛ̀nbààbee rìì gooɲaan sapɛ jiɛ̀. À saabu ɲan, mòò giri yè e dan gbànbeu ɲɛynaà nà, yè byɛnbe giri ji e yɛrɛ tsɛ.

Polì ci Tsìmotè yè nìi fa

¹¹ Ŋà nìi wo, Ŋaablà re mòdzian, vwɛ̀yn twɛy goo rèè jɔun. A gban nìì reè kpɛyn, tɔ̀ rii yɛ terenbee, ko Ŋaablà jɔun shiɲaanbee, ko ɲɛynaà, ko kɛ̀nbààbee, ko mɔ̀ɲɔɔn, ko vununmadzibeè.

¹² Ɲɛynaà kaa wùɔ fa, e jaamabe dziù dòbɛɛ kun gban gban, Ŋaabla wo kiriu tɔ̀ riì kamà, wo yè bà à shɛɛrɛbe wuu bou shɛɛrɛ giri jaa ra.

¹³ Ŋaablà riì jaamabee sìan gè sapɛ ra, ko Yesù Kirisà rìi shɛɛrɛbe wuu bou Pɔɔnsi Pilatsì jaaterema, twɛy jaa ra, mun nìi jia wo jɔun, tɔ̀ rii siin:

¹⁴ Ŋaablà dzugooma xɔɔ̀ màrà, fyɛ mà ji à ra, jààma to mà jà a ra, fɔ è bè suu mùn Tsìfa Yesù Kirisà nà e yɛrɛ kpadè jisee riì.

¹⁵ Dzwɛɛ̀ Tsìfa Ŋaablà, Dzitsi soo pee, tɔ̀ rii nà à kpàdè e waatsi wuu ɲan, wò riì màsa reè raa Màsaa, è bà tsìfa rèè raa Tsìfaà.

¹⁶ Wò rii soo pe na saàn waa, è bà ni vyevyee ɲan, mòo na dzia e kpɛrɛ̀ nìi rà. Mòò pɛn na à jà jà ŋe, mòò to na dzia à jà. Arì she, blàbee ko dzibaabe dobɛɛ yè bà à raa ! Àmiinà !

Polì ci Tsìmotè yè gètsi rèè latsi nìi ka

¹⁷ Nèe dziɲan ree gètsi rèè, à dè màxɔbe twɛy rà, ci è mà e yɛrɛ blabe waa, è mà e si ɲɛn gè dòràmaà tsɛ waa. Ŋà yè e si ɲɛn Ŋaablà rii tsɛ, tɔ̀ riì gè sapɛ siàn mùn na giri, m'a dzibe bo.

¹⁸ À dè è ra, ci yè goowùɔ rìì fa, yè bà gètsi faadzii wuɔ kàjaa tsɛ. È si yè bà forouna, è sɔ̀n yè bà byɛɔ̀n yè mòò kɔ̀.

¹⁹ Tà tsuru è nà nàforo ladzyèè tsùù gàne gban gban ɲan e jɔun gbey, yè bà ni jaamabe takia tàrà.

Polì Tsìmotè latsiu nìi ka kɔn ko dzwɛɛ̀

²⁰ Àwà Tsìmotè, nìi kɛ̀ɛ̀yfaunà a ma, tɔ̀ màrà. Gooma nafà bɛy reè, nìì reè ko Ŋaabla goòmàà na byɛɛ̀n, e twɛy jɔun bo. È to twɛ̀y goòmà nìì reè ka sɔ̀swɛy faa, sààben to na ni è ɲan waa, e twɛy sa jɔun bo.

²¹ Swey tɔ̀ bàu e re faagoo, yè ɲɛynaà shia bàji. Arì she, Ŋaablà ɲanwùɔ yè bà ni e tsɛ !