အွန်လိုင်း သမ္မာကျမ်းစာ

Tsìmotè jɔ̀naà 4 - Bible Dzùùngoo Unicode

Polì nìi dèu mòdzìn sànfìrì kar'neè tsɛ

¹ Ŋaablà re Dzia y'à dè fyɛɛ̀ ci waatsi latan neè ɲan, swey nà sèè bo ɲɛynaà kpɛyn yè gban mòdzìn sànfir'leè, ko kwey kar'nèè kpɛyn.

² Doodebaa duungoofiitsi rèè nà è sàn fìrì, twɛy nìì reè kɛ̀sɛmàà ni a ci myɛ̀ɛ̀n xe ka gè riì fyɛ̀ jiɔ̀.

³ Twɛy rìì dziàn ci furu mà fa waa, ci ɲwɛyn nèè swey to mà ɲɔn waa. Tɔ̀ to y'à tàrà Ŋaablà twɛy gè rèè sapɛ ɲɛun, gè riì n'a to ɲɛynamoo rèè yè bà ni à ɲɔn baraka sin doùn Ŋaablà ra, twɛy nìì reè sààbeen tɔ̀.

⁴ Àwà, Ŋaabla gè o ge ɲɛun, à sapɛ wù. À pɛn na maarama waa. À dààn yɛ mìn ba à ɲɔɔ̀n, mìn baraka sìn Ŋaablà ra.

⁵ È ɲɛn à tsɛ, Ŋaablà re goomaa ko màfyɛɛ̀n baraka rɔ̀n, à fɛnɛbeè.

Yesu Kirisà rè faagoofadzin wuɔ

⁶ Àwà wo ye neema reè kàràn tɔ̀ ra, wo nà bà Yesù Kirisà rè faagoofadzin wuu, ɲɛynaà gooma reè ko kàràn wùɔ baɔ̀ wo xɔɔn ɲwɛyndzii, wo y'à gbaɔn twɛ̀y nìì ree kpɛyn.

⁷ Tàànbɔ̀ɔ̀rìì sina niì reè ko Ŋaabla goòmàà na byɛɛ̀n waa, twɛy jà e to mɔn, a yɛrɛ karàn Ŋaablà jɔun shiɲaanbeè rìì là.

⁸ E a gɔɔ̀n dɛ̀ɛ̀y ɲuun fa ra, tɔ̀ nàfaà dzyɛ̀n, ŋà nàfa ni nìi ɲàn è geren, tɔ̀ rii Ŋaablà jɔun shiɲaanbeè, è ɲɛn à tsɛ jaamabee làyir'là seòn tɔ̀ rii ɲàn she ko gbey sa.

⁹ Nèe gooma, mòo dzia ɲɛn nìi rà, è tsiì à sapɛ ra.

¹⁰ Tɔ̀ rii y'à to ɲe ni faagoo xɔɔ̀ rà ko sikuan. È ɲɛn à tsɛ, ɲe yè e si ɲɛɔ̀n Ŋaablà jaamaa tsɛ, tɔ̀ niì mòdzian sapɛ Tsibaa, gooma na ni ɲɛynamoo rèè ma waa.

¹¹ Twɛy goo rèè dè modzian nà, a kàràn è ra.

Polì ci Tsìmotè yè bà ɲɛynamoo rèè jaa kpadee mòdzin

¹² Maà à to mòò pɛn y'à dzyɛnbe ci a dziinkòòmɛ̀yn waa. Ŋà bà jaakpadeyra rìì ɲɛynamoo rèè rè, goomaa kàjaa tsɛ, jaamabee fau'n kur'la kàjaa tsɛ, kɛ̀nbààbee kàjaa tsɛ, ɲɛynaà kàjaa tsɛ, ko duunfyɛɛ̀ kàjaa tsɛ.

¹³ Sani min wɔ mɔn, a shi Ŋaablà re goomaa kàr'nà nà mòdzian rè, e màxɔ̀ɔn, ta ko e kàr'na.

¹⁴ Ŋaablà ɲanwùɔ kwɛ̀yge rìi sìun a ra, è ɲɛn kɛɛrabe goòmà tsɛ, ko ɲɛynamoo kur'là bɔɔ rèè si tsùuŋmaà a tsɛ, m'a tɔ̀ bo a si bònè waa.

¹⁵ A ɲanshì twɛy goo rèè rà, e kun a sii fii ka, gè riì ni à to è sapɛ y'a jà ci a beè jɔun.

¹⁶ A taa to a yɛr'le, a taa to a re kàr'nà rè. A ɲanshì tɔ̀ ra, è ɲɛn à tsɛ à fakɔɔn tɔ̀ tsuru, tɔ nà wo yɛ̀r'la tsi, è wo lamyɛnbaa rèè sa tsi.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ

﻿Tsìmotè jɔ̀naà 4 - Bible Dzùùngoo Unicode

Tsìmotè jɔ̀naà 4 - Bible Dzùùngoo Unicode