အွန်လိုင်း သမ္မာကျမ်းစာ

Tsìmotè jɔ̀naà 3 - Bible Dzùùngoo Unicode

Polì ci ɲɛynamoo kur'là kuru kun neè yè ba ni nìi tsuru

¹ Àwà mòo dzia ɲɛn nèe gooma ree ra, nìi yɛ ci sɔn ye ba à gaa wò yeè ɲɛynamoo kur'là kuru kun, tɔ faagoo wùù gaa.

² Ŋà, fɔ ɲɛynamoo kur'là kààwɔbaà yè bà mòdzin, jààma na ni nìi rà waa, è bà tààn dzìn sòòtsi, è bà e yɛrɛ kuàn, è bà akiritsi, à sɔ̀bɛ̀n modzìn, à tɔnɔnladɔnbaa, è bà dzia mòdzian kàràn.

³ À mà bà mììnfabaa waa, à to mà bà mòdzin vunun ɲan waa. Ŋà è bà mòdzin vunun ma dzi, kaa na dzi à ra waa, à to na ɲɛɛn kɛ̀niɔ̀n waa.

⁴ È bà dziɔ̀ e re yɛr'la rè tsun'nà nà, è re dziin nèè koron koroun'n kuru wuu ra, blàbe doùn.

⁵ È ɲɛn à tsɛ, mòò riì na dziɔ̀ e yɛr'la rè tsun'nà nà, tɔ nà dzi Ŋaablà re ɲɛynamoo kur'là ladɔn dzùrù ?

⁶ À mà bà mòdzin nìi tuubiɔ̀ yeu waa. Tɔ mà nà bà saabu è yɛrɛ blabe fɔ è bè geren, tɔ̀ yeè nà kitsi mɛɛy ka à tsɛ, a ci kitsi riì mɛrɔun Sànwɔbaà tsɛ waa.

⁷ À wù sa, à tsoo dzi yeè bà ni ɲɛynabɛy reè dzu, gè riì ni à to à mà nà bà ɲanfyɛnbee gè, tɔ̀ yeè nà bà saabu è mɛɛy Sànwɔbaà rè yɔ̀ɔ̀ doùn waa.

Polì ci ɲɛynamoo kur'là goojaabo reè yè bà ni nìi tsuru

⁸ Tɔ̀ soo tsuru, ɲɛynamoo kur'là goojaabo reè sa wù yè bà mòdzìn sɔbɛn ì, è na gooma fii debaa ì waa, è na mììn faa waa, è to na tàrà faa nanmarama waa.

⁹ Yè ɲɛynaà gòndoo màrà ko kɛ̀sɛmà wùù ka.

¹⁰ È re jaamabee ɲan yeè siin ŋe, jààma ma ja è ra, yè kòmànà goojaaboo faagoò fa.

¹¹ Tɔ̀ soo tsuru, tàan rèè, twɛy sa wù yè bà mòdzìn sɔbɛn ì. È na mòdzìn fìvyɛbaa ì waa, yè e yɛrɛ kuɔn, mòò to dzia ɲɛn è ra goo sapɛ doùn.

¹² Ɲɛynamoo kur'là goojaabo reè wù yè bà tààn dzìn sòòtsi ì, yè bà e dzin nèè koroun'n kuru wuu faɔ̀, yè dzi e yɛr'la rè tsun'nà nà.

¹³ È ɲɛn à tsɛ, nìi reè goojaaboo faagoò faa fau'n kuru wuu ra, twɛy jɔundzinbe tar'la, blàbe ni nìi doùn, tà ko yè akiritsuu bla tarà ɲɛynaà doùn, tɔ̀ niì ni Yesù Kirisà ɲàn.

Ŋaablà jɔun shiɲaanbeè gòndoo

¹⁴ Mun nèe sɛbɛn nee sìan wo ra, min bà à kɛ̀sɛɛ̀ ci sani dɛyn mun nà bè wo re mɔn.

¹⁵ Tà tsuru mun kɛ̀nsɛɛn ye cin, mòo wù è re goo shi jiì jììŋ'n kur'liì rà Ŋaablà jaamaa rè gbàà doùn, tɔ̀ niì y'à rè ɲɛynamoo kur'là, sààbeen tsindzian ko à sàngbanmaà, wo yè tɔ̀ tɔ̀.

¹⁶ Àwà Ŋaablà jɔun shiɲaanbee gòndoo, tɔ blà. Mòò pɛn na dzia tɔ̀ sɔ̀swɛy waa. Ŋaablà yeè e yɛrɛ kpadèu adamàdzin mòdzin niu'n kur'la. À re Dzia y'à kpàdè ci à tereòn. È yɛrɛ kpadè mɛ̀rɛ̀kɛ rèè rà. À waajibia yè fa kun neè mòdzin neè fi. Mòdzian yè ɲɛn à ra dziɲaan doùn. È sen fu dɔ̀n be jìran nɔ̀n, nɔɔrɔɔ̀ ɲàn.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ

﻿Tsìmotè jɔ̀naà 3 - Bible Dzùùngoo Unicode

Tsìmotè jɔ̀naà 3 - Bible Dzùùngoo Unicode