အွန်လိုင်း သမ္မာကျမ်းစာ

Tesalonikika reè jɔ̀naà 2 - Bible Dzùùngoo Unicode

Polì faagoo rìi fau Tesalonikì

¹ Àyìwà neema reè, ye yɛ̀r'la y'à tɔ̀, ci ɲe wɔumaà ye re mɔn, tɔ̀ na ba goo maana waa.

² Y'a tɔ̀ sa, ci ɲe byɛunmaà ko ɲe kuun'n kuru ɲaan faumaà shɔ̀ùn Filipi wɔ̀ rɔ̀n, Ŋaabla akiritsuu siun ɲe ra, ɲe yè dzi à re Kùnàgoo Dziɔ̀ dè ye ra, kaa gir'là ko e raà sa ɲe ka.

³ Àwà, ɲe re waajibia gooma reè naà sànfìrì goòmà ì, è naà ŋɛ̀nɛ̀ɲàn ɲààn goòmà ì, è to naà mòdzìn mànììn goòmà ì.

⁴ Ŋà Ŋaablà re à jàumaà ci Kùnàgoo Dziɔ̀ goomaa dzia kɛ̀ɛ̀yfa ɲe mà, ɲe na à dèe ci ɲe goo yè dzibe mòdzin ì nà dɛ, fɔ Ŋaablà, tɔ̀ riì mùn dùsùkun neè ɲansiɛ̀n.

⁵ Ye sa y'a tɔ̀ ci ɲe na gooma ì dè jà nìì reè mòdzìn mànììn goòmà ì, à ŋɛ̀nɛ̀ɲan to na ja jà ɲe ɲan, ɲe yè mòò ɲɔn. Ŋaabla ɲe shɛɛrɛ.

⁶ Ɲe na blàbe gaa è bo mòdzin ì nè. Ɲe na à gaa ye re, ɲe to na à gaa mòò kpɛrɛ ì rè.

⁷ Tà to y'à tàrà ɲe Kirisà re kɛɛradzin ì nìi fa, ɲe na dzia fààn ɲinan ye tsɛ. Ŋà ɲe yè e yɛrɛ bau dziinkòòmɛ̀yn ì tsuru ye fi. A ci na yè e taa toò e dzin ì nè nìi tsuru,

⁸ ye goojaa na ni ɲe vunun tsɛ tà tsuru. À na ni niu'n kur'la, fɔ ɲe naà n'a re ɲe yè dàn Ŋaablà re Kùnàgoo Dziɔ̀ bàsɔùn dèè mà ye ra waa, ŋà ɲe yè e re jaamabee sìn sìùn'n kur'la sapɛ ra ye kamà, kàtsu ɲe ye kɛ̀niun fɔ è be geren.

⁹ Àwà neema reè, ye taa ni ɲe re faagoo xɔɔ̀ ko ɲe re byɛnbee rè. Ɲe faagoò fau feèn ko bwèè sa, ɲe mà nà bà ye sɔn ne seyn waa, ɲe yè Ŋaablà re Kùnàgoo Dziɔ̀ dè ye ra.

¹⁰ Ye ɲe shɛɛrɛ, Ŋaablà sa yeè bà ɲe shɛɛrɛ, ci ye ɲɛynamoo rèè kàjaa tsɛ, ɲe yè e re jaamabee fau fyɛu tsɛ, ɲe y'à fa terenbe tsɛ, jààma to naà ni ɲe ra.

¹¹ Ye y'à tɔ̀ sa, ci ɲe na ni ye soo soo sapɛ ka, a ci fa ni e dzin ì ka nìi tsuru.

¹² Ɲe ye màxɔ̀un, ɲe yè fààn wɔ ye ɲan, ɲe y'à gaa ye re gaaŋ'n kur'la sapɛ, ci ye yè e re jaamabee fa a ci Ŋaablà ci è fa nìi tsuru, wò riì ye kir'là ye yè dɔ̀n à re màsàbee doùn, è nɔɔrɔɔ̀ sìn ye ra.

Polì baraka sìan Ŋaablà ra kɔn Tesalonikika reè rè ɲɛynaà kamà

¹³ Tɔ̀ kamà, kudɛyn ɲe baraka sìan Ŋaablà ra sa, è ɲɛn à tsɛ ye y'à re gooma niì myɛ̀un ɲe re, ye na e tsiì à ra, ci à adamàdzin mòdzin ì nè gooma waa, ŋà ci à Ŋaablà re gooma ni taki, nìi faagoò faa ye ɲɛynamoo rèè ɲàn.

¹⁴ Àwà neema reè, Ŋaablà re ɲɛynamoo kuru nìì reè ni Yesù Kirisà ɲàn Yude mar'lɔùn, ye bàu twɛy shɔ̀ùnminanbaa ì. È ɲɛn à tsɛ, ye yɛ̀r'la fàdzìnsi reè ye byɛun a ci Dzyèèsìbee mòdzin neè yè è sa byɛun nìi tsuru.

¹⁵ Ye rìì Tsìfa Yesù ko kɛɛra reè sa vuu, ye rìì to byɛnbe shiu ɲe sa ra. È goo na dzi Ŋaablà ra waa, è to mòdzian sapɛ ɲan ì.

¹⁶ È ɲe jɔun shuà ɲe mà nà to gooma kun kpɛrɛ mòdzin neè ka, yè bà ni tsi waa. Tɔ̀ tsuru, è sɔn ba bèe e re gooɲaantsiɛ tɛ̀y. Ŋà à lataan, Ŋaablà re vununtaà bàu ni è tsɛ.

Poli na à gaa wò yeè Tesalonikika reè jà kɔn

¹⁷ Nìi ɲe, neema reè, ɲe ko ye jaa kpɛ̀yn fɔun e si ra waatsi dɛɛnin doùn, ŋà dùsùkuan ɲàn, mùn ni esire. Ɲe goò sapɛ ko e kuru fau ɲe yè bà ni ye jà kɔn, kàtsu tɔ̀ kuru na ni ɲe ra fɔ è bè geren.

¹⁸ È ɲɛn tɔ̀ tsɛ, ɲe sàò na ni ɲe yè bè bo ye kpà, mun Polì yɛ̀r'la y'à jaa gaa jaa soo, fii tsuru fau, ŋà Sùtana ɲe jɔun shuu.

¹⁹ Àwà mùn Tsìfa Yesù nà sii sèè, ɲe si nà bà xɔ tsi ì rìì tsɛ, yè bà ɲe re taamadzibe ko ɲe yɛ̀rɛ̀blàbè kun, nìi ɲe re dzi tar'la màsà baanfla à bììn ? À na ye o ?

²⁰ Ɔ̀ɔn, ɲe nɔɔrɔɔ̀ ko ɲe re taamadzibeè, tɔ ye rìì.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ