အွန်လိုင်း သမ္မာကျမ်းစာ

Piyɛrì jɔ̀naà 5 - Bible Dzùùngoo Unicode

Piyɛrì ci ɲɛynamoo bɔɔ rèè yè nìi fa

¹ Àwà bɔɔ nìì reè ni ye fi, min vu boò twɛy rìì là dòònuùn, min màxɔ̀n. Mun sa yeè è tsuru bɔɔ, nìi Kirisà rè byɛnbe goo reè shɛɛrɛ. Nɔɔrɔ nìi nà nà e kpadè, mun sa nin ni tɔ̀ ɲan.

² Ŋaablà re sààkur'lìi kɛ̀ɛ̀yfaɔ̀ e ma, ye tɔ̀ kɔ̀ ɲwɛyn, y'a kààwɔ. E maà à fa a ci à yè e ma fààn waa, ŋà y'a fa rii ci à dzi ye ra, a ci Ŋaablà ci è fa nìi tsuru. E maà à bà tɔ̀nɔ̀n gàà shi nanmara ni nìi ɲàn waa, ŋà y'a bà e dusùkùn nà goo.

³ Twɛy nìì reè kɛ̀ɛ̀yfaɔ̀ ye mà, e maà e faan ɲinan è tsɛ waa, ŋà ye bà sààkur'là jaakpadebaa ì rìì.

⁴ Tà tsuru, sàà kplàtsuu reè kùntsiɛ ye na sii rìi sèè, ye nà màsà baanfla nɔɔrɔmaa tarà, nìi na bar'la waa.

Piyɛrì ci ɲɛynamoo dzunwɛyn neè yè nìi fa ko làtsii kpɛrɛkuru ì

⁵ Tɔ̀ soo tsuru, ye dzunwɛyn neè sa yeè e majàà bɔɔ rèè rè. E re goo rèè doùn e ko e si fi, e sapɛ yeè e majàà e si re, è ɲɛn à tsɛ à deò Ŋaablà re Goomaa doùn ci: «Nìì reè blà e yɛr'le, Ŋaablà kaa faa twɛy ka, è bà e ɲanwùɔ kpàdèe mòdzin majàaŋma rèè rà.»

⁶ Tà doùn, ye majàà Ŋaablà si barakamaa dzuun, gè riì ni à to à yè e ɲansen e waatsi ɲan.

⁷ Ye e vyɛɛ̀yràgoo sapɛ to à suun, kàtsu wò rii tsìiŋnà ye re goo sapɛ ka.

⁸ Ye e akiri to e yɛr'le, e maà cìi waa. È ɲɛn à tsɛ, ye ɲan Sànwɔbaà yè e gurugur'la a ci jɛ̀r'liì gɛyn boò, è bà mòò kunàma gaa à y'à tàà.

⁹ Ye dzun wɔ à ra, e san gbaunma yè to ɲɛynaà doùn. Ye b'a tɔ̀ ci byɛnbe riì ni ye tsɛ, tɔ̀ soo rìì ni ye neema dzyee reè sa tsɛ dziɲantsiɛ doùn.

¹⁰ Àwà ye byɛunmaà shɔ̀ùn waatsi dɛɛnin doùn, Ŋaablà riì wùɔ sapɛ Tsifaà è bà ye kiriu Yesù Kirisà ɲàn e nɔɔrɔ dòbɛɛ doùn, tɔ nà ye màbyɛ̀n, è ye sàn gban, è fààn wɔ ye ɲan, à y'à fa gèsɔn pɛn na dzia ye yuuyuu bo e shɔùn waa.

¹¹ Arì she, dzibaabee yè bà à raa, waatsi sen ɲɛn waatsi tsɛ ! Àmiinà !

Piyɛr'lè goomaa lataan, ko tswɛ̀ɛ ko dzwɛɛ̀

¹² Àwà Silivɛ̀n, mun tɔ̀ niì jàtsikuàn mùn neema è bà vusootsi, mun nèe dzii jaa fii sɛbɛn nee fau tɔ̀ rii ka, min bà ni ye màxɔ̀n, tà ko m'a dè ye ra, ci ye yè shiɔ̀ nìi rà, tɔ̀ rii Ŋaablà ɲanwùɔ takia.

¹³ Ŋaabla nìì reè boo e jaa ra a ci ye, yè bà ni Babilɔnìn, twɛy ye tswàa, mun dzin kpiri Marikì sa yeè bà ye tswàa.

¹⁴ Ye e si tswà kɛ̀nbààbè tswɛy doùn. E ge o ge ni Kirisà ɲàn, arì she jaancin yè bà ni e sapɛ tsɛ !

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ

﻿Piyɛrì jɔ̀naà 5 - Bible Dzùùngoo Unicode

Piyɛrì jɔ̀naà 5 - Bible Dzùùngoo Unicode