အွန်လိုင်း သမ္မာကျမ်းစာ

Piyɛrì jɔ̀naà 4 - Bible Dzùùngoo Unicode

Piyɛrì nìi dèu jaamabe bɔrɔɔ ko jaamabe yee tsɛ

¹ Àwà, a ci Kirisà byɛun gɔɔ̀n ɲàn nìi tsuru, e sa yeè fààn wɔ e ɲan tɔ̀ kɛ̀sɛmà soo ka. È ɲɛn à tsɛ, mòò riì byɛun gɔɔ̀n ɲàn, tɔ dzi tarau gooɲaan tsɛ.

² Tà tsuru à mà nà e re jaamabee fa adamàdzin mòdzin neè raa kur'la goo reè tsɛ dɛ waa, ŋà à y'à fa Ŋaablà raa sàɔ tsɛ, e re waatsi dzyee faramaà doùn dzɔ̀nxɔɔ̀ tsɛ.

³ Àwà dan, ye nìi fau Ŋaabla tɔ bɛy reè raa sàɔ doùn, tɔ boyi fau. Tɔ̀ riì yɛ: seeybɛybeè, kur'la goo ɲaan neè, dɔ̀ɔ̀kɔ̀ɔ̀nbeè, ɲwɛɛ̀n ɲɔn gereunmaà, mìɛn fa gereunmaà, ko ɲɔ̀n rèè kɔ̀ɔ̀, tɔ̀ niì cɛn.

⁴ È jà ci ye na vwɛɛ twɛy seeybɛy goo kaatsi rèè kpɛyn ye ka dɛ, tɔ jiɔ̀ è dzii tsɛ. Tɔ̀ tsuru, è ye tsoo bar'la.

⁵ Ŋà, Ŋaablà riì sɔn byɛɔ̀n è jaama reè ko fùn nèè sa kitsi, è nà nà kùn dey fa tɔ̀ ra.

⁶ È ɲɛn tɔ̀ tsɛ, Kùnàgoo Dziɔ̀ bèu dè fùn nèè sa ra, gè riì ni à to è kitsiumaà shɔ̀ùn gɔɔ̀n ɲàn adamadzin dzyee reè tsuru, yè jaamabee fa Ŋaablà re Dzia baraka rɔ̀n.

Piyɛrì nìi dèu kwɛ̀yge rèè faagoò fau'n kur'la tsɛ

⁷ Goò sapɛ do waatsi tsyɛnbeò. Tà doùn, ye akir'là tsùù soo tsɛ, ye e taa to e yɛr'le, ye bà ni dzi màfyɛɛ̀n fa.

⁸ Goò sapɛ jɔun, ye e si kɛ̀n cɛyn. È ɲɛn à tsɛ, kɛ̀nbààbee saabu ɲan, gooɲaantsii gir'lì mɛɛ̀.

⁹ Ye e si ladɔn, ŋùnùnŋunun mà jà à ɲan waa.

¹⁰ E sa kwɛ̀yge rìi tàraɔ̀ Ŋaablà re, y'a ka faagoò fa e si re. Tà tsuru, Ŋaablà re kwɛ̀ygeè kaatsi gir'là, e naà bà tɔ̀ goojaabobaa wùu ì.

¹¹ Mòò riì waajibia faa, tɔ̀ y'a fa è kòrò Ŋaablà re goomaa ka. Mòò riì faagoò faa dzyee rèè rè, tɔ̀ y'a fa è kòrò Ŋaablà re fààn siunma ka à ra. Tɔ̀ tsuru goò sapɛ doùn, nɔɔrɔ yè bà ni ɲɛn Ŋaablà tsɛ Yesù Kirisà baraka ɲan, nɔɔrɔɔ̀ ko dzibaabee tɔ̀ niì raa, waatsi sen ɲɛn waatsi tsɛ. Àmiinà !

Piyɛrì ci e byɛn Kirisà kamà, tɔ taamadzibe

¹² N ne kɛ̀niunma rèè, dzuunbwey xɔù rìi ni ye tsɛ dòònuùn, a ci ye ni sà rìì ɲàn, tɔ mà ji e dzii tsɛ è bà jàci à ye tor'na goo waa.

¹³ Ŋà ye yè e nin jà nìi faɔ̀ Kirisà rè byɛnbee ɲàn, ye e taama nì dzibe. Ye tɔ̀ fa, gè riì ni à to à nɔɔrɔɔ̀ nà e kpadè sii riì seè, tɔ̀ sa ye bà e re taamadzibe brìsi.

¹⁴ Yè ba ye ɲɛ̀ɛn Kirisà tsoò kamà, ye raà wùbeu. È ɲɛn à tsɛ, nìi nɔɔrɔɔ̀ Dzia, Ŋaablà re Dzia, tɔ ni ye tsɛ.

¹⁵ E sɔn mà byɛn ni ci e vuifabaa, tàmafa shɔn, tàmafa gooɲaanfabaa, tàmafa ci e ye e dzii jiɔ̀ mòò rèè goo ɲan waa.

¹⁶ Ŋà à tsìfa ye ba byɛɛn rìì ci à ɲɛynamoo, tɔ mà bà à seè goo waa. È nɔɔrɔ rìì ɲɛn Ŋaablà tsɛ, tɔ̀ tsoò kamà.

¹⁷ Àwà kitsia dziikun bwèy wɔu, à to jɔ̀ɔn Ŋaablà re gbàdòùndzin neè rìì tsɛ. À to ye ba jɔ̀ɔn ɲe rìì tsɛ, nìì reè na e tsiiŋnà yè ɲɛn Ŋaablà re Kùnàgoo Dziɔ̀ goomaa nà, twɛy raà nà e latan dzùrù ?

¹⁸ A ci à sɛbɛɔ̀n Ŋaablà re Goomaa doùn nìi tsuru ci «Mòdzin tereonmaà tsi ye ɲanbe, mòò riì na shia Ŋaablà jɔun waa ko gooɲaanfabaà, twɛy raà nà kun dzùrù ?»

¹⁹ Tà tsuru, nìì reè byɛɛn è kòrò Ŋaablà saɔ ka, twɛy yè e kɛɛ̀yfa Ɲɛnbaà mà, tɔ̀ niì vusootsi, yè geren goowuu faa rè.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ

﻿Piyɛrì jɔ̀naà 4 - Bible Dzùùngoo Unicode

Piyɛrì jɔ̀naà 4 - Bible Dzùùngoo Unicode