အွန်လိုင်း သမ္မာကျမ်းစာ

Piyɛrì jɔ̀naà 3 - Bible Dzùùngoo Unicode

Piyɛrì ci kpir'leè ko tàan rèè wù yè e si kun nìi tsuru tsùɔ̀ doùn

¹ Nìi ye tàan rèè sa, ye e majàà e re kpir'leè rè. Tà tsuru è swey ma ba e tsiiŋnà yè ɲɛn Ŋaablà re Goomaa nà, yè dzi tarà bà Ŋaablà raa e re tààn fau'n kuru wuɔ saabu ɲan, à mà bà gooma tsu ka waa.

² È ɲɛn à tsɛ, è nà ye jìì saàn kààwɔ, y'à jà ci blàbe ni ye ɲan, ye duùn yè bà fyɛɔ.

³ E re màwɔɔ mà bà da rɔ̀n màwɔ waa, nìi yɛ kùngɔɔ̀ myɛ̀unma wùɔ, vurage sɛnuma reè ko vya kpàxɔù rèè.

⁴ Ŋà e re màwɔɔ yè bà duùn naa màwɔɔ rìì, nìi màwɔ mɛnɛunma. Tɔ̀ rii yɛ vununmadzibeè ko vununciàn. Tɔ màwɔ, nìi na bar'la waa, à kpà yè bà xɔ Ŋaablà re.

⁵ Dan dan, tààn fɛnɛ niì reè si na xɔ Ŋaablà tsɛ, twɛy na e mawɔɔ̀ tɔ̀ rii tsuru. È mà na jàaŋnà e re kpir'leè rè.

⁶ A ci Saràn, à na e majàaŋnà Ibraximà rè, à y'à kir'la ci wò «tsìfaà.» Ye baɔ̀ wò rii dzin taan ì, ye kpɛ̀ynto ye ba wùɔ faa, shiɲaan goo pɛn mà bà ye akiri fùa waa.

⁷ Tɔ̀ soo tsuru, jaamabee dzyèè doùn, ye kpir'leè sa yeè e re tààn rèè kun akiritsifabe ka, ye bà à tɔ̀ ci tàànbee nìi tsuru gè, à fàan dzyɛ̀n. Ye è blàbe, è ɲɛn à tsɛ, jaamabe riì tàr'la Ŋaablà ɲanwùɔ baraka ɲan, ye tɔ̀ shɛɛ̀n seen esire. Ye tɔ̀ fa, gè riì ni à to goo sɔn pɛn mà e re Ŋaabla mafyɛyn nèè jɔun shu waa.

Piyɛrì ci ɲɛynamoo rèè yè e re jaamabee fa nìi tsuru

⁸ Àwà tà sapɛ shɔùn, e sapɛ yeè byɛ̀n soo ma, ye e taa to e si re, ye si kɛ̀n neemabe doùn, ye màtsuru e si ra, ye e majàà e si re.

⁹ E maà ɲaan ka ɲaan sarà, e to mà ɲɛ̀yn ka ɲɛ̀yn sarà. Ŋà ye dzwɛ rìì ji, è ɲɛn à tsɛ ye kiriɔ tɔ̀ rii là, nìi yɛ ye yè dzwɛɛ̀ tàrà shɛn.

¹⁰ È ɲɛn à tsɛ, à sɛbɛɔ̀n nèe tsuru ci: «Mòò riì ci wò re jaamabee yè wùbe wò suun, è sì gbààn tarà, è nɛɛ̀n tààn ɲaan dee mà, è dziɛ̀ kààwɔ nanmara gooma dee rà.

¹¹ È vwɛ̀yn ɲaan jɔun, è wùɔ fa. È jaanciàn gaa, è gban à kpɛyn.

¹² È ɲɛn à tsɛ, Tsìfaà jaa ni mòdzin tereonma rèè tsɛ, à toro yè bà wɔɔ è re màfyɛɛ̀n rè. Ŋà gooɲaan fa reè, è jaa ker'la twɛy kpɛyn.»

¹³ Tsì rii yɛ̀rɛ̀ to nà ɲaan fa ye ra, ye ye ba e shiɔ̀ goowuu faa rìì là ?

¹⁴ Àwà ye to kɛ̀nsɛɛn ye byɛn, terenbee yè bà saabu, ye raa wùbeu. E maà shi è shia goo pɛn jɔun, e akiri to mà gbiiman.

¹⁵ Ŋà Kirisà rìi Tsìfaà, y'a to tɔ̀ yeè bà gè fɛnɛ e dusùkuan doùn. E si to xɔ nìi tsɛ, mòò ye e tey tɔ̀ mà, e mabyɛ̀n tsuuŋma yè bà ni kudɛyn, ye jaabi wuu sin à tsìfa ra.

¹⁶ Ŋà, y'a goò fa vununmacin ko blàbe doùn, akiri wùù yeè bà ni e ɲan. Tà tsuru, ye re jaamabee fau'n kuru wuɔ doùn Kirisà ɲàn, nìì reè y'à gaa ye yè ye tsoo bara y'à bà ci ye ɲaan faa, twɛy kùngɔ yè sùùru.

¹⁷ È ɲɛn à tsɛ, e bà byɛɛn goowuu faa kamà, tɔ̀ rii ye ba Ŋaablà saɔ, tɔ fyan e bà byɛɛn gooɲaan faa kamà.

Piyɛrì nìi dèu Kirisà saàn ko à re dzi tar'la tsɛ

¹⁸ Àwà Kirisà sa saun jaa soo pe gooɲaantsii reè kamà. Wò riì tereòn, à tɔ̀ fau terenbɛy reè tsɔ̀saan ɲàn, gè riì ni à to è ye wɔ Ŋaablà tsɛ. À saun gɔɔ̀n ɲàn, è sèè bà jaama Ŋaablà re Dzia baraka rɔ̀n.

¹⁹ Nìì reè xɔɔn ni kàsoò rà laxaran, à bèu tɔ̀ rii tsuru, è bè Kùnàgoo Dziɔ̀ dè twɛy rà.

²⁰ Ɔ̀ɔn nìì reè yè mabaun dan, Ŋaablà yeè bà e mɔɲɔun è tɛyn Nuùn nè konkoron blaa lamɔnɔ̀n bwey, nìì doùn mòkun danman, ŋaalon pe tsi bou yuà fi.

²¹ Tɔ̀ na jaara foo tàànmàshɛn ni, nìi ye tsià dòònuùn. À na gɔɔ̀n raa noo reè boò jaara foo waa, ŋà a ye a dzii rìì sìn Ŋaablà ra, akiri wùù ka. Jaara foo ye tsià Yesù Kirisà sèè kpunaunmaà nì baraka ɲan, è bo saàn ɲàn.

²² À tèyn bèu jìrànxɔɔ̀ doùn, è bà tsùuŋnà mɔn Ŋaablà sirama si jaa rè. Mɛ̀rɛ̀kɛ rèè ko kùntsii rèè, ko dzibaabe reè sapɛ koroòn à re.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ

﻿Piyɛrì jɔ̀naà 3 - Bible Dzùùngoo Unicode

Piyɛrì jɔ̀naà 3 - Bible Dzùùngoo Unicode