အွန်လိုင်း သမ္မာကျမ်းစာ

Yùxanà jɔ̀naà 3 - Bible Dzùùngoo Unicode

Nìì reè kiriɔ Ŋaablà dzin

¹ À siin, Fà Ŋaabla ɲe kɛ̀niun kɛ̀nìùn'n kur'liì rà, è bè wɔ fɔ ɲe yè kiri à dzin ì ! Ɲe to tɔ̀ rii. Tɔ̀ rii kamà dziɲaan na ɲe tɔ̀ waa, kàtsu dziɲaan na à tsu tɔ waa.

² Mun ne kɛ̀niunma rèè, ɲe kpɛ̀yn Ŋaablà dzin ì dòònuùn, ŋà ɲe nà nà bà nìi, tɔ̀ na kpadè ŋe waa. M'à tɔ̀ ci Kirisà ye na e kpadè, ɲe nà bà à bosi ì, kàtsu, ɲe nà à jà a ci à ni nìi tsuru.

³ Mòò o moò si xɔ à tsɛ, è ɲɛn tɔ̀ tsɛ, tɔ̀ yeè e yɛrɛ fɛnɛbeè a ci à sa fɛnɛ nìi tsuru.

⁴ Mòò o moò gooɲaan faa, tɔ̀ na goo tereonma faa waa, kàtsu gooɲaan nì yɛ, goo teren bɛɛ.

⁵ Y'a tɔ̀ ci Yesù nàu, è bà ni mòdzian rè gooɲaantsiɛ mɛɛy bo è vu ra, nìi to y'à yɛ̀r'la, gooɲaantsii na ni à vu ra waa.

⁶ Mòò o moò ni à ɲan, tɔ̀ na gooɲaan faa waa. Mòò o moò to gooɲaan faa, tɔ̀ na à jàunà, à to na à tɔ̀.

⁷ N ne dziniin ì, e maà à to mòò pɛn yè e san fìrì. Mòò riì terenbee goo rèè shi jiɛ, tɔ tereòn a ci Kirisà sa tereòn nìi tsuru.

⁸ Mòò riì gooɲaan faa, tɔ Sànwɔbaà raa rìì, è ɲɛn à tsɛ fɔ dan, Sànwɔbaà ni gooɲaan faa rà. Ŋaablà Dzin Kpir'la to nàu nì, è Sànwɔbaà faadzii reè bara.

⁹ Mòò o moò kere bou Ŋaablà re, tɔ̀ na gooɲaan faa waa, kàtsu Ŋaablà re gètsua ni à ɲan. À na dzia gooɲaan fa waa kàtsu à kere boo Ŋaablà re.

¹⁰ Nèe kàjaa ree rìì y'à toò Ŋaablà dzin nèè ko Sànwɔbaà dzin nèè yè tɔ̀ bo e si ɲan: mòò o moò na terenbee shi jiɛ, ko mòò o moò na e neemasia kɛ̀ɛn waa, tɔ̀ na Ŋaablà raa waa.

¹¹ È ɲɛn à tsɛ ye nìi myɛ̀un fɔ dan, tɔ̀ rii yɛ ci mìn si kɛ̀n.

¹² N mà bà a ci Kayinìn tsuru waa, tɔ̀ niì bàu ɲan Sùtan'naa, è tseyn kpir'la vu. Feera à y'à vu ? Kàtsu à faadziɛ na ɲaan, tseyn kpirimaa raà yè bà na tereòn.

Yùxanà nìi dèu kɛ̀nbààbee tsɛ

¹³ Neema ì, dziɲaan ye ba e kpɛynbee, tɔ mà ji e dzii tsɛ waa.

¹⁴ Ɲe y'à tɔ̀ ci ɲe bou saàn ɲàn, ɲe yè dɔ̀n jaamabee ɲàn, è ɲɛn à tsɛ, ɲe yè e neema reè kɛ̀niɔ̀n. Mòò riì na e neemaa kɛ̀niɔ̀n waa, tɔ ni saàn ɲàn.

¹⁵ Mòò o moò yè e neemaa kpɛynbee, tɔ mòdzìn vubaa, ye to y'à tɔ̀ ci jaamabe dziù dòbɛɛ na dzia bà ni mòdzìn vubaa pɛn ɲan.

¹⁶ Ɲe kɛ̀nbààbee tɔ̀ è ɲɛn nìi tsɛ, tɔ̀ rii siin: Kirisà yè e xɔɔn sìun ɲe kamà. Tà doùn, ɲe sa wù ɲe yè e xɔɔn sìn neema reè kamà.

¹⁷ Dziɲan nafor'la ni mòò riì suun, tɔ̀ ye e neemasia byɛunma jà, à to na matsuru à ra waa, Ŋaablà kɛnbààbe ni tɔ̀ ɲan dzùrù ?

¹⁸ Dziniin ì, n mà kɛ̀nbààbee fa dziira goòmàà ko nɛɛ̀n bàsɔùn ka waa, ŋà faadziɛ ko sààbeen.

¹⁹ Mùn nà à tɔ̀ tɔ̀ rii tsuru ci mùn ni sààbeen tsɛ, mùn akiri to nà bà tsùuŋnà à bììn.

²⁰ È ɲɛn à tsɛ, mùn dùsùkuan ye ba mùn jààkia, Ŋaabla blà mùn dùsùkuan mà, à to goo sapɛ tɔ.

²¹ Mun ne kɛ̀niunma rèè, mùn dùsùkuan ma ba mùn jààkia fyeu, mùn akiri tsùuŋma bàa ni Ŋaablà biìn.

²² Tà tsuru mìn gè o ge gaa à re, mùn tɔ̀ tàr'la, kàtsu mùn y'a dzugooma xɔù rèè màraɔ̀, mìn bà à dzibee goo reè faa.

²³ À dzugooma xɔɔ̀ rìì yɛ, mùn ye ɲɛn Yesù Kirisà tsoò rà, à Dzin Kpir'la, tà ko mùn yeè e si kɛ̀n a ci à y'à dèu mùn na nìi tsuru.

²⁴ Mòò riì y'à dzugooma xɔù rèè màr'la, tɔ ni à ɲan, è bà ni tɔ̀ ɲan. M'à tɔ̀ nìi rà ci à ni mùn ɲan, tɔ̀ rii yɛ, è re Dzi riì sìun mùn na.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ

﻿Yùxanà jɔ̀naà 3 - Bible Dzùùngoo Unicode

Yùxanà jɔ̀naà 3 - Bible Dzùùngoo Unicode