အွန်လိုင်း သမ္မာကျမ်းစာ

Korɛntsika reè jɔ̀naà 6 - Bible Dzùùngoo Unicode

Polì nìi dèu kitsi goo tsɛ ɲɛynamoo rèè ko e si fi

¹ Àwà, goo ye dɔn ye sɔn ko sɔn fi, fee bèe à to ye yè bè tɔ̀ kitsi kunun terenbɛy reè rè, ye yè Ŋaa re mòdzin neè to ?

² Ye na à tɔ̀ ci Ŋaa re mòdzin neè rìì nà kitsia kùnùn dziɲan tsɛ ɔ ? Ye rìì to ye ba nà kitsia kùnùn dziɲan tsɛ, ye ni gba ye yè twɛy goorii rèè kitsi kunùn ɔ̀n ?

³ Ye to yè b'a tɔ̀ ci ɲe nà kitsia kùnùn mɛ̀rɛ̀kɛ rèè tsɛ kɛ̀ ? Tà doùn, gooma na ni dziɲan ree goo rèè mà waa.

⁴ Tà bwèy twɛy dziɲaan goo rèè kaatsi ye dɔn ye sɔn ko sɔn fi, ɲɛynamoo kur'là na nìì reè daàn, ye ni à to twɛy yè bà à goò kitsikununbaa ì ɔ̀ ?

⁵ Mun nèe dèe ye re seey rìì kamà. Tà bwèy, akiritsi pɛn na ni ye fi nìi nà dzi twɛy goo rèè kitsi kunùn twɛy neema reè ko e si fi ɔ ?

⁶ Ŋà è bè wɔ fɔ neemaa sɔn yeè e neemasi kitsia, à to na min kpɛrɛ fɔ ɲɛynabɛy reè bììn !

⁷ À kɛ̀nsɛɛn ma ba goo kpɛ̀rɛ̀, kitsi jauma ye ko e si fi nòn, tɔ ye re mɛɛy. Fee to y'à toò tɔ̀un ye fa e tsiì terenbɛy goo rà ? Feera ye fa e tsiì mòo yè bà ni ye suun gee tsi ye ra ?

⁸ Ŋà ye rìì terenbɛy goo faa, ye yè dzyee rèè suun ge reè tsi è ra, nìi ye neema reè.

⁹ Ye na à tɔ̀ ci terenbɛy goo fa reè nìn na ni Ŋaablà re màsàbee ɲàn ɔ̀n ? E maà e yɛrɛ maniin dɛ ! Kɛ̀kɛ̀ɛ̀y gòò fa reè, ko ɲɔ̀n kɔ reè, ko ɲànmɔ̀ɔ̀bè fa reè, ko kpiri ì bàuma tàan ì, ko kpiri ko kpiri gaa reè,

¹⁰ ko shɔn rèè, ko wàsà bɛy reè, ko dɔ̀ɔ̀kɔɔn reè, ko ɲɛ̀yn fa reè, ko jàànfà moo rèè, twɛy nìn na ni Ŋaablà re màsàbee ɲàn waa.

¹¹ Àwà ye swey na ni tɔ̀ rii tsuru. Ŋà ye fòoŋ, ye yè fɛnɛbe ye bà Ŋaablà raa, è kpàdè ci ye tereòn Tsìfa Yesù Kirisà tsoò baraka rɔ̀n, ko mùn ne Ŋaablà re Dzia baraka rɔ̀n.

Gɔɔ̀n Tsìfaà raa rìì

¹² Goò sapɛ dàaŋnà mun ne, tɔ sààben, ŋà nàfa na ni à sapɛ ɲan waa. Ɔ̀ɔn, goò sapɛ dàaŋnà mun ne, ŋà mun fa n tsiì min bà gèsɔn pɛn ne jòn waa.

¹³ Ɲwɛyn ge rèè, twɛy doòn raa, doòn tɔ̀ yeè bà ɲwɛyn ge rèè raa. Ŋaablà to nà twɛy fiɛ̀ sa bara bo mɔn. Ŋà gɔɔ̀n, tɔ̀ na kɛ̀kɛ̀ɛ̀ybee raa waa. À Tsìfaà raa rìì, Tsìfaà yè bà à raa.

¹⁴ Tà doùn, Ŋaabla Tsìfaà sèè kpunaun nìi tsuru è bo saàn ɲàn, à nà ɲe sa seè kpunan tɔ̀ tsuru, e re dzibaabee baraka rɔ̀n.

¹⁵ Ye na à tɔ̀ ci ye gɔɔ̀n Kirisà gɔɔ̀n gàne rèè rìì ɔ̀ ? Mun ni dzi Kirisà gɔɔ̀n gàne rèè sen m'a bà ɲànmɔ̀ɔ̀taan gɔɔ̀n gàne ì ɔ̀ ? Ayi dɛrɛ !

¹⁶ Ye na à tɔ̀ ci mòò riì dzyèe ɲànmɔ̀ɔ̀taàn ka, à y'à ko e gɔɔ̀n bàa gɔn soo rii ɔ̀ ? È ɲɛn à tsɛ, à deò Ŋaablà re Goomaa doùn nèe tsuru ci: «È fiɛ̀ nà bà gɔn soo.»

¹⁷ Ŋà mòò riì yè e shià Tsìfaà rà, à ko tɔ̀ sa bàa gè soo rii xɔɔn kàjaa tsɛ.

¹⁸ Ye vwɛ̀yn kɛ̀kɛ̀ɛ̀ybee jɔun ! Mòdzin gooɲaan dzyee niì reè sapɛ faa, à sapɛ gɔɔ̀n dà kèrè goo, ŋà kɛ̀kɛ̀ɛ̀ybee, tɔ gooɲaan, à nìi faa e yɛr'la gɔɔ̀n rà.

¹⁹ Tàà ye na à tɔ̀ ci ye gɔɔ̀n Ŋaablà re Dzi Fɛnɛɛ rè gbà blàa rìì ɔ̀, Ŋaabla tɔ̀ niì siɔ̀n ye ra, è bà ni ye ɲan ? Tà doùn, ye na e yɛr'laa dɛ !

²⁰ È ɲɛn à tsɛ, ye kùngɔ mabou kpàxɔù rà. Tà doùn, ye nɔɔrɔ ɲɛn Ŋaablà tsɛ e gɔn nɔ̀n !

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ